រាជធានីភ្នំពេញ ៖ ក្មេងស្ទាវមួយក្រុមបានបង្កហិង្សាទៅលើយុវជនម្នាក់ និងបានវាយកម្ទេចម៉ូតូមួយគ្រឿង ផ្អើលផ្សារឌុយមិច ដែលហេតុការណ៍នេះបង្កការភ្ញាក់ផ្អើលកាលពីវេលាម៉ោង៧ និង៤០នាទីយប់ថ្ងៃទី១៦ ខែកក្កដា ឆ្នាំ២០២៣ ត្រង់ចំណុចផ្សារឌុយមិច ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ ។
ប្រភពព័ត៌មានពីពលរដ្ឋដែលជាអ្នកលក់នៅក្បែរកន្លែងកើតហេតុបានអោយដឹងថា មុនពេលកើតហេតុ គាត់កំពុងតែលក់បាយ និងម្ហូបឱ្យជនរងគ្រោះ ក៏ស្រាប់តែគាត់បានឃើញក្មេងស្ទាវមួយក្រុម មានគ្នីគ្នាប្រមាណជាង១០នាក់បានជិះម៉ូតូប្រហែល៦-៧គ្រឿង ប្រដាប់ដោយប៉័តោ ខ្សែក្រវ៉ាត់ និងខ្លះទៀតកាន់មួកសុវត្ថិភាព បានប្រើប្រាស់ហិង្សាទៅលើ យុវជនម្នាក់នោះ ដែលកំពុងតែឈប់ទិញម្ហូប បណ្តាលឱ្យបែកក្បាល និងវាយកម្ទេចម៉ូតូជនរងគ្រោះថែមទៀតផង ។ ភ្លាមៗនោះ ជនបង្កទាំងអស់បានរត់គេចខ្លួនដោយសុវត្ថិភាព មិនបានរំខានដល់សមត្ថកិច្ចសោះឡើយ ។
ក្រោយពេលកើតហេតុ បងប្អូនសាច់ញាតិជនរងគ្រោះបានយកម៉ូតូ និងជនរងគ្រោះយកទៅមន្ទីរពេទ្យភ្លាមៗ ។ បន្ទាប់ពីមានការប្រតាយប្រតបគ្នាចប់ វត្តមានមេប៉ុស្តិ៍មនោរម្យនិងកម្លាំងសមត្ថកិច្ចចុះមកដល់កន្លែងកើតហេតុ ដើម្បីអន្តរាគមន៍ ។ ដោយ៖ រដ្ឋា
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ