ខេត្តប៉ៃលិន ៖ ប្រជាកសិករជាច្រើននាក់ ដែលរស់នៅក្នុងក្រុងប៉ៃលិន ខេត្តប៉ៃលិន កំពុងនាំគ្នាសម្រុកប្រមូលផលដំណាំដំឡូងមីនៅតាមចំការរបស់ខ្លួន ខណៈដែលតម្លៃទីផ្សារឡើងខ្ពស់ អាចឱ្យពួកគាត់ទទួលយកបាន ដែលការប្រមូលផលនេះ បានធ្វើឡើងនាថ្ងៃទី០១…
ខេត្តប៉ៃលិន ៖ ប្រជាកសិករជាច្រើននាក់ ដែលរស់នៅក្នុងក្រុងប៉ៃលិន ខេត្តប៉ៃលិន កំពុងនាំគ្នាសម្រុកប្រមូលផលដំណាំដំឡូងមីនៅតាមចំការរបស់ខ្លួន ខណៈដែលតម្លៃទីផ្សារឡើងខ្ពស់ អាចឱ្យពួកគាត់ទទួលយកបាន ដែលការប្រមូលផលនេះ បានធ្វើឡើងនាថ្ងៃទី០១ ខែមករា ឆ្នាំ២០២៦នេះ ស្ថិតនៅចំណុចបថ្មី ក្នុងភូមិបតាំងស៊ូ សង្កាត់បយ៉ាខា ក្រុងប៉ៃលិន ខេត្តប៉ៃលិន ដឹកលក់នៅតាមស្តង់នានា ក្នុងក្រុងតែម្តង ។
បើតាមការរៀបរាប់ពីកសិករម្នាក់ ឈ្មោះ ង៉ែត សុផល អាយុ៣៧ឆ្នាំ រស់នៅក្នុងភូមិខាងលើ បានរៀបរាប់ឱ្យភ្នាក់ងារយើងដឹងថា ៖ លោកបានដាំដំឡូងមី នៅលើដីចំការរបស់ខ្លួន ចំនួន៣ហិកតា អស់រយៈពេលជិត១ឆ្នាំមកហើយ រហូតមកដល់ពេលនេះ សង្កេតឃើញដំឡូងមី មានម្សៅគ្រប់គ្រាន់ ហើយល្មមដល់ពេលត្រូវប្រមូលផលលក់ ខណៈដែលតម្លៃទីផ្សារឈ្មួញទិញក្នុងតម្លៃខ្ពស់អាចទទួលយកបាន គឺខាងលោកដឹកយកទៅលក់នៅស្តង់ មានថៅកែចាំទិញ ១គីឡូក្រាម តម្លៃ២៤០រៀល។ ហើយលោកបានជួលកម្មករឱ្យនាំគ្នាដកដំឡូងមី ត្រូវចំណាយ ក្នុង១តោន ផ្តល់កម្រៃ៣០,០០០រៀល ។
លោកបានបន្តទៀតថា ដំឡូងមីរបស់ខ្លួន នាដើមឆ្នាំ២០២៦នេះ បង្កបង្កើនផលបានច្រើនគួរឱ្យកត់សម្គាល់ ព្រោះក្រោយពេលដាំរួចរាល់ក៏ត្រូវទឹកភ្លៀងស្ទើរតែរាល់ថ្ងៃ មិនបណ្តាលឱ្យងាប់ដើមនោះទេ ។ ដូច្នេះ បន្ទាប់ពីប្រមូលផលរួច លោកនឹងរក្សាទុកដើមដំឡូងមី រហូតដល់ខែមីនា ឬមេសា រួចជួលត្រាក់ទ័រឱ្យភ្ជួរដី ដើម្បីដាំសារថ្មីឡើងវិញ ដោយមិនចាំបាច់ទិញដើមដំឡូងមីគេយកមកដាំនោះឡើយ ។
ចំណែកបុរសម្នាក់ ឈ្មោះ ហូរ អាយុ៥០ឆ្នាំ ជាកម្មកររស់នៅក្នុងភូមិបតាំងស៊ូ បានឱ្យដឹងដែរថា ក្រុមរបស់លោកមានគ្នា៧ទៅ១០នាក់ ដោយសហការគ្នាដកដំឡូងមីឱ្យគេក្នុង១តោន ទទួលបានតម្លៃ៣ម៉ឺនរៀល លុះប្រមូលផលបានច្រើនតាំងពីព្រឹករហូតដល់ពេលល្ងាច និងលើកដាក់រថយន្តរួច ទើបម្ចាស់ចំការសរុបថវិកា បើកជូនពួកគាត់ចែកគ្នាស្មើ ។
លោកបានបន្តទៀតថា ក្នុង១ថ្ងៃម្នាក់ៗ អាចរកចំណូលបានចាប់ពី៤ ទៅ៥ម៉ឺនរៀល ដើម្បីយកផ្គត់ផ្គង់ជីវភាពប្រចាំថ្ងៃ។ ពួកគាត់មិនសូវជាលំបាកក្នុងការប្រមូលផលដំឡូងមីនោះទេ ព្រោះមានអ្នកខ្លះដក អ្នកខ្លះកាប់ដើម និងខ្លះទៀតជញ្ជូនដាក់លើរថយន្ត។ ពួកគាត់សហការគ្នាយ៉ាងសស្រាក់សស្រាំ ហើយពួកគាត់វេចខ្ចប់បាយយកទៅនាំគ្នាទទួលនៅឯចំការតែម្តង រហូតដល់ពេលល្ងាច ទើបនាំគ្នាត្រឡប់មកផ្ទះវិញ ៕
ចែករំលែកព័តមាននេះ