ចិនបន្ថែមពន្ធ ៥៥% លើការនាំចូលសាច់គោលើសកូតា ដើម្បីការពារឧស្សាហកម្មក្នុងស្រុក
ទីក្រុងប៉េកាំង ៖ ប្រទេសចិន កាលពីថ្ងៃទី៣១ ខែធ្នូ ឆ្នាំ២០២៥ បានប្រកាសថា ខ្លួននឹងដាក់ពន្ធគយបន្ថែម ៥៥% លើការនាំចូលសាច់គោពីប្រទេសមួយចំនួន…
ទីក្រុងប៉េកាំង ៖ ប្រទេសចិន កាលពីថ្ងៃទី៣១ ខែធ្នូ ឆ្នាំ២០២៥ បានប្រកាសថា ខ្លួននឹងដាក់ពន្ធគយបន្ថែម ៥៥% លើការនាំចូលសាច់គោពីប្រទេសមួយចំនួន រួមទាំងប្រេស៊ីល អូស្ត្រាលី និងសហរដ្ឋអាមេរិក ដែលលើសកូតា ចាប់ពីថ្ងៃទី១ ខែមករា ឆ្នាំ២០២៦ ហើយការផ្លាស់ប្តូរថ្មីនេះ ក៏ដើម្បីការពារឧស្សាហកម្មក្នុងស្រុកផងដែរ។ នេះបើតាមការចេញផ្សាយពីទីភ្នាក់ងារសារព័ត៌មាន Reuters និង AFP ។
ក្រសួងពាណិជ្ជកម្មចិន បានលើកឡើងថា កូតានាំចូលសរុបឆ្នាំ ២០២៦ សម្រាប់ប្រទេស ស្ថិតក្រោមវិធានការថ្មីរបស់ខ្លួនគឺ ២,៧ លានតោន ស្របនឹងកំណត់ត្រា ២,៨៧ លានតោន ដែលខ្លួននាំចូលសរុបកាលពីឆ្នាំ ២០២៤។ កម្រិតកូតាប្រចាំឆ្នាំថ្មី ទាបជាងកម្រិតនាំចូលសម្រាប់រយៈពេល ១១ ខែដំបូង ឆ្នាំមុន សម្រាប់ប្រទេសផ្គត់ផ្គង់កំពូលប្រេស៊ីល និងអូស្ត្រាលី។
ក្រសួងបានបញ្ជាក់ក្នុងការប្រកាសវិធានការនេះ បន្ទាប់ពីការស៊ើបអង្កេត ដែលបានចាប់ផ្តើមកាលពីខែធ្នូ ឆ្នាំមុនបង្ហាញថា ការកើនឡើងបរិមាណសាច់គោនាំចូលបានធ្វើឱ្យខូចខាតយ៉ាងធ្ងន់ធ្ងរដល់ឧស្សាហកម្មក្នុងស្រុករបស់ចិន។ តាមរយៈវិធានការថ្មីនេះ ចូលជាធរមាននៅថ្ងៃទី១ ខែមករា ឆ្នាំ២០២៦ សម្រាប់រយៈពេល ៣ ឆ្នាំ រហូតដល់ថ្ងៃទី៣១ ខែធ្នូ ឆ្នាំ ២០២៨ ដោយកូតាសរុបត្រូវបានកំណត់ឱ្យកើនឡើងជារៀងរាល់ឆ្នាំ។ ដូច្នេះមានន័យថា ប្រទេសទាំងអស់ត្រូវបានកំណត់ការនាំចូលប្រចាំឆ្នាំ ហើយសាច់គោដឹកជញ្ជូនទៅប្រទេសចិននឹងត្រូវយកពន្ធបន្ថែម ៥៥% បើការនាំចូលលើសពីកូតា។
ការនាំចូលសាច់គោទៅកាន់ប្រទេសចិនបានធ្លាក់ចុះ ០,៣% ក្នុងរយៈពេល ១១ ខែដំបូងនៃឆ្នាំ ២០២៥ មកនៅត្រឹម ២,៥៩ លានតោនប៉ុណ្ណោះ។ អ្នកវិភាគជាន់ខ្ពស់ក្រុមហ៊ុន Beijing Orient Agribusiness Consultants បានលើកឡើងថា ការនាំចូលសាច់គោរបស់ចិននឹងធ្លាក់ចុះនៅឆ្នាំ ២០២៦ ដោយសារតែវិធានការនេះ។
សម្រាប់ឆ្នាំ ២០២៦ ប្រទេសប្រេស៊ីលមានកូតានាំចូលចំនួន ១ លានតោន ខណៈដែលអាហ្សង់ទីនមានកម្រិតកំណត់ប្រហែលពាក់កណ្តាលនៃចំនួននោះ។ អូស្ត្រាលីប្រឈមមុខនឹងកូតាប្រហែល ១៨១ ០០០ តោន និងសហរដ្ឋអាមេរិក ១៤០ ០០០ តោន។
ក្រសួងក៏បានបន្ថែមផងដែរថា ខ្លួនកំពុងផ្អាកផ្នែកខ្លះនៃកិច្ចព្រមព្រៀងពាណិជ្ជកម្មសេរីជាមួយអូស្ត្រាលីដែលគ្របដណ្តប់លើសាច់គោ។ អ្នកនាំពាក្យម្នាក់បានលើកឡើងនៅក្នុងសេចក្តីថ្លែងការណ៍ដាច់ដោយឡែកមួយថា ការអនុវត្តវិធានការការពារលើសាច់គោនាំចូល គឺមានបំណងជួយឧស្សាហកម្មក្នុងស្រុកឱ្យឆ្លងកាត់ការលំបាកជាបណ្តោះអាសន្ន មិនមែនដើម្បីរឹតត្បិតពាណិជ្ជកម្មសាច់គោនោះទេ៕
ចែករំលែកព័តមាននេះ