ខេត្តតាកែវ ៖ លោកស្រី បេន អភិបាលខេត្តតាកែវ កាលពីថ្ងៃទី៨ ឧសភា បានដឹកនាំគណៈប្រតិភូរបស់ខេត្តដោយមានការចូលរួមពីលោកឧត្តមសេនីយ៍ត្រីអ៊ុក សំណាង ស្នងការនគរបាលខេត្ត យកអំណោយទៅសាកសួរសុខទុក្ខកងទ័ពសមរភូមិជួរមុខទិសខេត្តឧត្តរមានជ័យនៅទីបញ្ជាការសមរភូមិមុខ។
លោកឧត្តមសេនីយ៍ឯកឈិន ច័ន្ទពណ៌ មេបញ្ជាការរងកងទ័ពជើងគោក និងជាមេបញ្ជាការប្រចាំទិសទី៣ឧត្តរមានជ័យឱ្យដឹងថា ចាប់តាំងពីថ្ងៃទី២២ មេសា មកពួកចោរសៀមឈ្លានពានមានបំណងយកទឹកដីកម្ពុជាយើង ហើយពួកគេបានប្រើប្រាស់អាវុធធុនធ្ងន់គ្រប់ប្រភេទបាញ់ជញ្ជ្រំមកលើទឹកដីយើង តែដោយអនុវត្តគ្រប់បទបញ្ជារបស់សម្តេចតេជោហ៊ុន សែន ប្រមុខនៃរាជរដ្ឋាភិបាលកម្ពុជាយើងនាយទាហាន ពលទាហានគ្រប់អង្គភាព គ្រប់គោលដៅតស៊ូគ្រប់បែបយ៉ាង ការពារបូរណភាពទឹកដីឱ្យបានរឹងមាំ និងបានវាយតបវិញទៅលើពួកចោរសៀមឈ្លានពានបានដោយជោគជ័យ។
លោកស្រី បេន អភិបាលខេត្តបានសម្តែងនូវការកោតសរសើរដល់វីរកងទ័ពជួរមុខ ទិសឧត្តរមានជ័យដែលបានតស៊ូការពារទឹកដី និងព្រំដែនបានរឹងមាំ មិនឱ្យបាត់បង់មួយមិល្លីម៉ែត្រឡើយ។ អំណោយដែលគណៈប្រតិភូប្រគល់ឱ្យនាពេលនេះ រួមមានមី៧០០កេស ទឹកបរិសុទ្ធឱរ៉ាល់៥០០កេស សៀង៥តោន ប្រហុក២តោន ពងទាកូន៥៥០គ្រាប់ ថ្នាំពេទ្យម៉ាឡារីន៥៧៦បន្ទះ ស៊ីម៉ង់ត៍១០តោន ថវិកា១០លានរៀលជូនកងពលថ្មើរជើងលេខ៤២ និងថវិកា៥លានរៀលជូនប៉ូលិសការពារព្រំដែន។
នៅថ្ងៃដដែលលោកស្រី បេន បានដឹកនាំគណៈប្រតិភូជួបសំណេះសំណាលជាមួយលោកប៉ិច សុខឹន អភិបាលខេត្តឧត្តរមានជ័យ និងបានឧបត្ថម្ភជូនសាខាកាកបាទក្រហមខេត្តឧត្តរមានជ័យចំនួន១០លានរៀលសំរាប់ទ្រទ្រង់សកម្មភាពសាខាកាកបាទក្រហមខេត្ត និងបានចុះទៅឧបត្ថម្ភដល់វរនគរបាលការពារព្រំដែនខេត្តឧត្តរមានជ័យមានពី២វរៈ រួមមានមី២០០កេស សៀង៥០០គីឡូក្រាម ពងទាប្រៃ១.៥៥០គ្រាប់ ទុសៀរ៦០ វិទ្យុទាក់ទង១០គ្រឿង និងថវិកា៤លានរៀល ៕
ចែករំលែកព័តមាននេះ