Dele Alli ទម្លាយរឿងដ៏ឈឺចា.ប់ពីកុមារភាព និងការធ្លា.ក់ចូលវិប.ត្តិផ្លូវចិ.ត្តធ្ងន់ធ្ងរ
អង់គ្លេស ៖ ខ្សែបម្រើ Dele Alli របស់ក្រុមស្ករគ្រាប់ Everton បានចេញមុខទម្លាយការពិតអំពី
អង់គ្លេស ៖ ខ្សែបម្រើ Dele Alli របស់ក្រុមស្ករគ្រាប់ Everton បានចេញមុខទម្លាយការពិតអំពីកុមារភាពដ៏ឈឺចាប់របស់ខ្លួន និងការធ្លាក់ចូលទៅក្នុងបញ្ហាសុខភាពផ្លូវចិត្តធ្ងន់ធ្ងរ ក្រោយការបាក់ទឹកចិត្តអំពីជីវិតបាល់ទាត់មិនល្អរបស់ខ្លួន នៅប៉ុន្មានឆ្នាំចុងក្រោយនេះ។
នៅក្នុងបទសម្ភាសន៍ដ៏រំជួលចិត្តមួយ ជាមួយនឹងអតីតខ្សែការពារក្រុមជម្រើសជាតិអង់គ្លេស Gary Neville នៅក្នុងនោះខ្សែបម្រើ Dele Alli បានរៀបរាប់ពីការរំលោភបំពានផ្លូវភេទ ដែលរូបគេបានរងទុក្ខកាលពីកុមារភាព មុនពេលត្រូវបានគេយកទៅចិញ្ចឹមនៅអាយុ ១២ឆ្នាំ។ Alli បាននិយាយថា រូបគេត្រូវបានគេរំលោភបំពានផ្លូវភេទនៅអាយុ ៦ឆ្នាំ ហើយចាប់ផ្តើមចេះជក់បារីនៅអាយុ ៧ឆ្នាំ និងក្លាយជាអ្នកជួញដូរគ្រឿងញៀននៅអាយុ ៨ឆ្នាំ។
អតីតខ្សែបម្រើក្រុមមាន់ខ្នាយមាស Tottenham Hotspur ដែលបច្ចុប្បន្នមានអាយុ ២៧ឆ្នាំ បានបន្តថា រូបគេបានចំណាយពេល ៦សប្តាហ៍ក្នុងការស្តារនីតិសម្បទា រួមទាំងបញ្ហាផ្លូវចិត្តធ្ងន់ធ្ងរ ដោយសារតែការញៀនថ្នាំងងុយគេង ដែលរងទុក្ខកាលពីពេលថ្មីៗកន្លងទៅនេះ។
Dele Alli គឺជាកីឡាករវ័យក្មេងដ៏ទេពកោសល្យម្នាក់ ហើយធ្លាប់ជាផ្នែកមួយដ៏សំខាន់នៃក្រុមតោកំណាចអង់គ្លេស ដែលឈានដល់វគ្គពាក់កណ្តាលផ្តាច់ព្រ័ត្រព្រឹត្តិការណ៍ FIFA World Cup ឆ្នាំ ២០១៨ នៅប្រទេសរុស្ស៊ី និងបានជួយក្រុម Tottenham ឈានដល់វគ្គផ្តាច់ព្រ័ត្រក្របខណ្ឌ UEFA Champions League នៅក្នុងឆ្នាំ ២០១៩ ផងដែរ។
ទោះបីជាយ៉ាងណាក៏ដោយ ទម្រង់លេងរបស់កីឡាកររូបនេះធ្លាក់ចុះយ៉ាងខ្លាំង ហើយរូបគេបានចាកចេញពីក្លិប Tottenham ទៅចូលរួមជាមួយ Everton នៅក្នុងខែកុម្ភៈ ឆ្នាំ ២០២២ មុនពេលត្រូវបាន Everton ឱ្យទៅក្លិប Besiktas នៅប្រទេសតួកគី ខ្ចីជើង កាលពីរដូវកាលមុន ហើយបានវិលត្រឡប់មកកាន់ Everton វិញ នៅជិតបញ្ចប់រដូវកាល ដោយសារតែរបួស។
Dele Alli បានថ្លែងប្រាប់កម្មវិធី The Overlap ថា «នៅពេលខ្ញុំត្រឡប់ពីបតួកគីវិញ ខ្ញុំដឹងថា ខ្ញុំត្រូវការវះកាត់ ហើយខ្ញុំស្ថិតក្នុងបញ្ហាផ្លូវចិត្តទៅហើយ។ ខ្ញុំបានសម្រេចចិត្តទៅកន្លែងស្តារនីតិសម្បទាទំនើបសម្រាប់សុខភាពផ្លូវចិត្ត ដើម្បីដោះស្រាយជាមួយនឹងការញៀនថ្នាំងងុយគេង សុខភាពផ្លូវចិត្ត និងបញ្ហារបួសរបស់ខ្ញុំ»។
កីឡាករកម្ពស់ ១.៨៨ម៉ែត្ររូបនេះ បានបន្តថា «ខ្ញុំមានអារម្មណ៍ថា ដល់ពេលហើយ ដើម្បីបញ្ជាក់ពីការពិត។ អ្នកត្រូវតែដឹង និងធ្វើការសម្រេចចិត្តដោយខ្លួនឯង។ ខ្ញុំបានធ្លាក់ចូលក្នុងវដ្តដ៏អាក្រក់។ ខ្ញុំភ្ញាក់ពីគេងជារៀងរាល់ថ្ងៃ ហើយខ្ញុំកំពុងឈ្នះការប្រកួត ចូលហ្វឹកហាត់ ញញឹម បង្ហាញថា ខ្ញុំសប្បាយចិត្ត ប៉ុន្តែការពិត ខ្ញុំប្រាកដជាចាញ់ការប្រយុទ្ធនឹងការបាក់ទឹកចិត្ត ដូច្នេះវាដល់ពេលហើយ ដែលខ្ញុំត្រូវផ្លាស់ប្តូរ»។
សេចក្តីថ្លែងការណ៍មួយរបស់ក្លិប Everton បានឱ្យដឹងថា គ្រប់គ្នាគោរព និងសាទរចំពោះភាពក្លាហានរបស់ Dele ក្នុងការនិយាយអំពីការលំបាក ដែលគេបានជួបប្រទះ ក៏ដូចជាស្វែងរកជំនួយដែលត្រូវការចាំបាច់។ Dele នឹងមិនធ្វើការសម្ភាសន៍បន្ថែមទៀតទាក់ទងនឹងការស្តារនីតិសម្បទារបស់គេទេ ហើយយើងសុំឱ្យឯកជនភាពរបស់គេត្រូវបានគោរព ខណៈពេលដែលគេកំពុងបន្តការព្យាបាលរបួស ហើយទទួលបានការថែទាំ និងការគាំទ្រពេញលេញ ដែលត្រូវការសម្រាប់សុខុមាលភាពផ្លូវកាយ និងផ្លូវចិត្តរបស់គេ»៕
ចែករំលែកព័តមាននេះ