ខេត្តស្ទឹងត្រែង ហាមឃាត់ មិនឱ្យប្រើប្រាស់យន្តហោះបញ្ជា ដ្រូន ឡើយ
- ស្ទឹងត្រែង
ភ្នំពេញ៖ រដ្ឋបាលខេត្តស្ទឹងត្រែង ជាប់ព្រំដែនប្រទេសឡាវ និងវៀតណាម បានប្រកាស ហាមឃាត់ មិនឱ្យប្រើប្រាស់យន្តហោះបញ្ជា ហៅ ដ្រូន «Drone»…
ភ្នំពេញ៖ រដ្ឋបាលខេត្តស្ទឹងត្រែង ជាប់ព្រំដែនប្រទេសឡាវ និងវៀតណាម បានប្រកាស ហាមឃាត់ មិនឱ្យប្រើប្រាស់យន្តហោះបញ្ជា ហៅ ដ្រូន «Drone» ក្នុងភូមិសាស្ត្រខេត្តស្ទឹងត្រែង ឡើយ។
សេចក្តីប្រកាស បង្ហាញថា ដើម្បីធានាការគោរពសិទ្ធិឯកជនរបស់ប្រជាពលរដ្ឋ និងរក្សាបាននូវសន្តិសុខ សុវត្ថិភាព និងសណ្តាប់ធ្នាប់សាធារណៈ នៅអំឡុងពេលយុទ្ធនាការឃោសនាបោះឆ្នោត និងពេលបោះឆ្នោតជ្រើសតាំងតំណាងរាស្ត្រនិតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ រាល់ការបង្ហោះឧបករណ៍ដ្រូន «Drone» ដើម្បីថតយករូបភាព និងចាប់យកព័ត៌មានផ្សេងៗ នៅលើភូមិសាស្ត្រខេត្តស្ទឹងត្រែង ត្រូវបានហាមជាត់ដាច់ខាត លើកលែងតែក្នុងករណីចាំបាច់ ដែលមានការអនុញ្ញាតជាលាយលក្ខណ៍អក្សរជាមុនពីរដ្ឋបាលខេត្តស្ទឹងត្រែង។
សេចក្តីប្រកាស បន្តថា សម្រាប់បងប្អូនប្រជាពលរដ្ឋ ដែលមានដ្រូន សម្រាប់ប្រើប្រាស់ក្នុងការងារកសិកម្ម ដូចជា បាញ់ថ្នាំសម្លាប់សត្វល្អិត ឬជីលើផលដំណាំ អាចប្រើប្រាស់ដ្រូនបាន ចាប់ពីម៉ោង ៧ព្រឹក ដល់ម៉ោង ២រសៀល។ ករណីមានការបង្ហោះដ្រូនកសិកម្ម ក្នុងពេលវេលាក្រៅពីការអនុញ្ញាតនេះ ត្រូវទទួលខុសត្រូវចំពោះមុខច្បាប់។
សូមរម្លឹកថា សេចក្តីប្រកាស ហាមឃាត់ មិនឱ្យប្រើប្រាស់ដ្រូន នៅខេត្តស្ទឹងត្រែងនេះ បានធ្វើឡើង តែយូរថ្ងៃដែរ ក្រោយពីសម្តេចតេជោ ហ៊ុន សែន បានប្រកាសថា មានដ្រូន មិនស្គាល់ប្រភព បានហោះចូលទឹកដីកម្ពុជា ក្នុងខេត្តរតនគិរី ជាប់ព្រំដែនប្រទេសវៀតណាម។ សម្តេចតេជោ ក៏បានបញ្ជាឱ្យបញ្ជូនកងទ័ពរាប់រយនាក់ និងបាញ់ទម្លាក់ដ្រូនទាំងនោះ។ ប៉ុន្តែមកដល់ពេលនេះ ព័ត៌មានពីដ្រូនឆ្លងដែននេះ បានស្ងប់ស្ងាត់ឈឹង៕
ចែករំលែកព័តមាននេះ