Lionel Messi និងគ្រួសារទៅដល់អាមេរិក ត្រៀមពិធីបង្ហាញខ្លួនផ្លូវការជាមួយក្លិបថ្មី
សហរដ្ឋអាមេរិក ៖ យន្តហោះឯកជនដឹកកំពូលខ្សែប្រយុទ្ធ Lionel Messi រួមជាមួយភរិយា និងកូន
សហរដ្ឋអាមេរិក ៖ យន្តហោះឯកជនដឹកកំពូលខ្សែប្រយុទ្ធ Lionel Messi រួមជាមួយភរិយា និងកូនពួកគេ បានចុះចតនៅអាកាសយានដ្ឋាននៅក្នុងទីក្រុង Ft.Lauderdale នៃរដ្ឋផ្លរីដា សហរដ្ឋអាមេរិក កាលពីថ្ងៃ១១ ខែកក្កដា ឆ្នាំ២០២៣ ដើម្បីត្រៀមខ្លួនសម្រាប់ពិធីបង្ហាញខ្លួនជាផ្លូវការ ដែលត្រូវបានរៀបចំដោយក្លិប Inter Miami នៅថ្ងៃទី១៦ ខែកក្កដា ឆាប់ៗខាងមុខនេះ។
ក្លិប Inter Miami នៅលីគកំពូលសហរដ្ឋអាមេរិក MLS ក៏បានធ្វើការប្រកាសបញ្ជាក់ពីព្រឹត្តិការណ៍ស្វាគមន៍ប្រធានក្រុមជម្រើសជាតិអាហ្សង់ទីនម្ចាស់ពានរង្វាន់ FIFA World Cup 2022 រូបនេះ ដែលត្រូវបានហៅថា «The Unveil» ហើយនឹងចាប់ផ្តើមនៅម៉ោង៦:០០នាទីល្ងាចតទៅ (ម៉ោងនៅអាមេរិក) នៅកីឡដ្ឋាន DRV PNK ខណៈដែលអ្នកទិញសំបុត្រពេញមួយរដូវកាលរបស់ Inter Miami នឹងអាចចូលទស្សនាពិធីស្វាគមន៍ដ៏ពិសេសមួយនេះ ដោយឥតគិតថ្លៃ។
នៅក្នុងបទសម្ភាសន៍មួយពីទូរទស្សន៍អាហ្សង់ទីន ដែលបានចេញផ្សាយកាលពីថ្ងៃទី១១ ខែកក្កដា កន្លងទៅ Messi បាននិយាយថា រូបគេនឹងផ្តល់គ្រប់យ៉ាងសម្រាប់ក្លិប Inter Miami ដែលឥឡូវនេះ បានបំបែកកំណត់ត្រាអាក្រក់ ដោយមិនអាចរកជ័យជម្នះបាន ១០ប្រកួតជាប់ៗគ្នា បន្ទាប់ពីលទ្ធផលស្មើ ២-២ កាលពីថ្ងៃអាទិត្យសប្តាហ៍មុនជាមួយនឹងក្រុម DC United ។
ក្លិប Inter Miami មិនទាន់បានធ្វើការចុះហត្ថលេខាជាផ្លូវការនៅឡើយទេ បន្ទាប់ពីបានឈានដល់កិច្ចព្រមព្រៀងជាមួយនឹងកំពូលខ្សែប្រយុទ្ធអាហ្សង់ទីនរូបនេះ ដែលបានចំណាយពេល ២រដូវកាលជាមួយក្លិប PSG ម្ចាស់ជើងឯកលីគកំពូលបារាំង Ligue 1 ក្រោយចាកចេញពីក្លិប FC Barcelona។
ជាមួយគ្នានោះ ក្លិប Inter Miami ដែលមានលោក David Beckham អតីតកំពូលខ្សែបម្រើក្រុមជម្រើសជាតិអង់គ្លេសជាសហម្ចាស់ក្លិបនោះ បានកំណត់គោលយកការប្រកួត Leagues Cup នៅថ្ងៃទី២១ ខែកក្កដា ខាងមុនរបស់ខ្លួនជាមួយនឹងក្រុម Cruz Azul ដើម្បីជាថ្ងៃបង្ហាញខ្លួនប្រកួតដំបូងរបស់ Lionel Messi៕ (ប្រភពពី ESPN FC)
ចែករំលែកព័តមាននេះ