ម៉ូតូ១គ្រឿងដែលបុរសម្នាក់ឆោឡោ រហូតទៅដាក់ពាក្យបណ្ដឹង ប្តឹងសមត្ថកិច្ចថា បាត់ម៉ូតូ៣ថ្ងៃ ខណៈម្ចាស់ស្រវឹងស្រាជិះធ្លាក់ចូលព្រៃតាមបណ្តោយផ្លូវជាតិលេខ១ ដោយមិនដឹងថា តើទៅណានោះទេ?
ខេត្តព្រៃវែង ៖ បើតាមសេចក្តីរាយការណ៍បានឱ្យដឹងថា ម៉ូតូ១គ្រឿងដែលបុរសម្នាក់ឆោឡោ រហូតទៅដាក់ពាក្យបណ្ដឹង ប្តឹងសមត្ថកិច្ចថា បាត់ម៉ូតូ៣ថ្ងៃ ខណៈម្ចាស់ស្រវឹងស្រាជិះធ្លាក់ចូលព្រៃតាមបណ្តោយផ្លូវជាតិលេខ១ ដោយមិនដឹងថា តើទៅណានោះទេ?។ ហើយពេលនេះ នគរបាលមូលដ្ឋានបានរកឃើញ និងបានប្រគល់ម៉ូតូឲ្យទៅម្ចាស់ដើមវិញហើយ ខណៈម៉ូតូមួយគ្រឿងនោះ គឺស្ថិតនៅកន្លែងម្ចាស់ម៉ូតូដួលបាត់បង់ស្មារតីតែម្តង។
សូមជម្រាបថា កាលពីព្រឹកថ្ងៃទី៧ ខែកក្កដា ឆ្នាំ២០២៣ មានបុរសម្នាក់ឈ្មោះ ឈុំ តយ អាយុ៣២ឆ្នាំ រស់នៅភូមិជីអក ឃុំព្រៃពោន ស្រុកកំពង់ត្របែក ខេត្តព្រៃវែង បានទៅដាក់ពាក្យបណ្តឹងនៅប៉ុស្តិ៍រដ្ឋបាលកំពង់ត្របែក ថា នៅវេលាម៉ោងប្រមាណជិត៨យប់ ថ្ងៃទី៦ ខែកក្កដា ឆ្នាំ២០២៣ ខ្លួនបានធ្វើដំណើរចេញពីផ្ទះក្នុងគោលបំណងទៅភ្នំពេញ (ស្ថិតក្នុងស្ថានភាពស្រវឹងស្រា) ដោយជិះម៉ូតូទៅដល់ចំណុចម្តុំភូមិកំពង់ត្របែក ឃុំកំពង់ត្របែក លើផ្លូវជាតិលេខ១ ស្រាប់តែងងឹតមុខឈឹង ហើយដួលម៉ូតូនៅទីនោះ (កន្លែងកើតហេតុ) តែម្តង លុះពេលមួយសន្ទុះក្រោយក៏ដឹងខ្លួនឡើងវិញ ស្រាប់តែបាត់ម៉ូតូតែម្តង។
ក្រោយពីទទួលបានពាក្យបណ្តឹងខាងលើនោះភ្លាម សមត្ថកិច្ចនគរបាលមូលដ្ឋានប៉ុស្តិ៍កំពង់ត្របែក បានធ្វើការស្រាវជ្រាវយ៉ាងយកចិត្តទុកដាក់ ដើម្បីស្វែងរកភិនភាគម៉ូតូ១គ្រឿង ដែលបាត់ដោយសារម្ចាស់ម៉ូតូស្រវឹងនោះ។ លុះដល់ថ្ងៃទី៨ ខែកក្កដា វេលាម៉ោង១០កន្លះព្រឹក ពោលគឺរំលងបាន៣ថ្ងៃ សមត្ថកិច្ចក៏បានទៅរកឃើញម៉ូតូនោះនៅកន្លែងដែលម្ចាស់ម៉ូតូដួលធ្លាក់ក្នុងព្រៃ ចន្លោះគីឡូម៉ែត្រលេខ៩១ និង៩២ ស្ថិតក្នុងភូមិជ្រលង ឃុំប្រាសាទ ស្រុកកំពង់ត្របែក ខេត្តព្រៃវែង។
បន្ទាប់មក សមត្ថកិច្ចបានយកម៉ូតូមួយគ្រឿងនោះ ទៅរក្សាទុកនៅប៉ុស្តិ៍ និងបានប្រគល់ជូនទៅម្ចាស់ដើមវិញ។ ចំពោះមូលហេតុ គឺក្រោយពីបុរសរូបនោះស្រវឹងបាត់បង់ស្មារតី នៅពេលដឹងខ្លួនក៏ឆោឡោទៅប្តឹងសមត្ថកិច្ចតែម្តង នេះសំណាងហើយម៉ូតូនៅក្នុងព្រៃ៣ថ្ងៃ ប៉ុន្តែមិនជួបចោ.រ៕
ចែករំលែកព័តមាននេះ