ខេត្តព្រះវិហារ ៖ រសៀលថ្ងៃទី៧ ឧសភា នៅសាខាកាកបាទក្រហមខេត្ត មានរៀបចំប្រារព្ធពិធីទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០១១ ក្រោមអធិបតីភាពលោកនាយឧត្តមសេនីយ៍ មាស សុភា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានក្រុមការងារគណៈកម្មាធិការកណ្តាលគណបក្សប្រជាជនកម្ពុជា ចុះជួយខេត្តព្រះវិហារ ។
ពិធីនោះមានការចូលរួមពីលោកអ៊ុំ ម៉ារ៉ា អភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជាខេត្ត និងសមាជិក សមាជិកាកាកបាទក្រហមខេត្ត អង្គការក្រៅរដ្ឋាភិបាល ក្រុមហ៊ុនសហគ្រាស អាជីវករសរុបប្រមាណជាង១.០០០នាក់។
លោកជំទាវ ចិក ហេង សមាជិកាក្រុមប្រឹក្សាខេត្ត និងជាប្រធានសាខាកាកបាទក្រហមខេត្តព្រះវិហារ បានអានរបាយការណ៍ឱ្យដឹងថា កន្លងទៅ សាខាកាកបាទក្រហមខេត្តបានបំពេញតួនាទីយ៉ាងសំខាន់របស់ខ្លួនក្រោមការដឹកនាំប្រកបដោយគតិបណ្ឌិតរបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជួយសង្គ្រោះដល់ប្រជាពលរដ្ឋជួបការលំបាកដែលកើតឡើងដោយសារគ្រោះមហន្តរាយផ្សេងៗដែលមាននៅក្នុងភូមិសាស្ត្រនៃទឹកដីខេត្តព្រះវិហារ។ ពិសេសគឺជួយសង្គ្រោះដល់ប្រជាពលរដ្ឋភៀសសឹកពីតំបន់ព្រំដែនដោយសារសង្គ្រាមឈ្លានពានពីសំណាក់កងទ័ពសៀម។
លោកអ៊ុំ ម៉ារ៉ា អភិបាលខេត្ត និងជាប្រធានកិត្តិយសសាខាកាកបាទក្រហមខេត្តបានអានសុន្ទរកថារបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាថ្លែងក្នុងទិវាពិភពលោកកាកបាទក្រហមអឌ្ឍចន្ទក្រហម៨ឧសភា ក្នុងឱកាសនោះដែរ។
លោកនាយឧត្តមសេនីយ៍ មាស សុភា បានមានមតិសំណេះសំណាលទៅ កាន់អង្គពិធីដោយបានបញ្ជាក់អំពីសារសំខាន់របស់តួនាទីកាកបាទក្រហមពិភពលោក ដែលជាអង្គការមួយមិនអាចខ្វះបាននៅគ្រប់បណ្តាប្រទេសក្នុងពិភពលោកទាំងមូល ។ កាកបាទក្រហមមានតួនាទីយ៉ាងសំខាន់ក្នុងការជួយសង្គ្រោះស្រោចស្រង់ជីវិតមនុស្សលោកទាំងមូលដោយមិនគិតពីឋានៈ តួនាទី ជាតិសាសន៍ និងពណ៌សម្បុរ ។ នាពេលនោះដែរ លោកនាយឧត្តមសេនីយ៍ មាស សុភា ក៏បានរំលឹកដល់ស្ថានការណ៍ព្រំដែនកម្ពុជា-សៀមថា ពេលនេះទោះបីមានការឈ្លានពានឥតអៀនខ្មាសពីសំណាក់កងទ័ពសៀមតាមបញ្ជាមេដឹកនាំវង្វេងប្រវត្តិសាស្ត្ររបស់គេអស់រយៈកាលជិតបីឆ្នាំកន្លងមកក៏ដោយ ក៏កងយោធពលខេមរភូមិន្ទយើងបានការពារទឹកដីបានយ៉ាងរឹងមាំមិនមានការបាត់បង់ទឹកដីសូម្បីតែមួយមិល្លីម៉ែត្រ ឡើយ ហើយរហូតមកទល់ពេលនេះសភាពការណ៍ព្រំដែនមានភាពស្ងប់ស្ងាត់វិញហើយ។ ដោយឡែកប្រជាជនភៀសសឹកក៏បានវិលត្រឡប់ទៅកាន់ភូមិឋានវិញហើយ ដែរ។
ក្នុងឱកាសប្រារព្ធពិធីទិវាពិភពលោកកាកបាទក្រហមអឌ្ឍចន្ទក្រហមរបស់សាខាកាកបាទក្រហមកម្ពុជាខេត្តព្រះវិហារនេះ មានការចូលរួមបរិច្ចាគធនធានសម្រាប់មនុស្សធម៌ពីសប្បុរសជន និងពីសមាជិក សមាជិកាសាខាកាកបាទក្រហមខេត្តដោយប្រមូលថវិកាសរុបបាន៤៨.៣៤៧.៨០០រៀល និង១៦.៥៧៥ដុល្លារ សហរដ្ឋអាមេរិក។ ថវិកាទាំងអស់នេះត្រូវបានរក្សាទុកនៅសាខាកាកបាទក្រហមខេត្ត៕
ចែករំលែកព័តមាននេះ