នៅពេលដែលហ្វេសប៊ុកកំពុងមានរឿងជាមួយប្រមុខរាជរដ្ឋាភិបាលកម្ពុជា គេរំពឹងថា នឹងមានកំណើតទៅលើការប្រើប្រាស់បណ្តាញសង្គមផ្សេង ជាពិសេស គឺតេលេក្រាម និងតិកតុក ។ នៅដើមឆ្នាំ២០២៣ កន្លងទៅនេះតេឡេក្រាម គឺមានអ្នកប្រើប្រាស់ប្រមាណជា១០លាននាក់…
នៅពេលដែលហ្វេសប៊ុកកំពុងមានរឿងជាមួយប្រមុខរាជរដ្ឋាភិបាលកម្ពុជា គេរំពឹងថា នឹងមានកំណើតទៅលើការប្រើប្រាស់បណ្តាញសង្គមផ្សេង ជាពិសេស គឺតេលេក្រាម និងតិកតុក ។
នៅដើមឆ្នាំ២០២៣ កន្លងទៅនេះតេឡេក្រាម គឺមានអ្នកប្រើប្រាស់ប្រមាណជា១០លាននាក់ ហើយតិកតុកវិញ នៅកម្ពុជាមានប្រមាណជា ៧លាននាក់ ប៉ុន្តែរហូតដល់ដាច់ឆ្នាំ បណ្តាញសង្គមទាំងពីរអាចនឹងមានអ្នកប្រើប្រាស់លើសនេះច្រើនថែមទៀត ដោយសារតែពេលនេះ សន្ទុះ និងការលើកទឹកចិត្តនៅក្នុងចំណោមមន្ត្រីជាន់ខ្ពស់ រាជរដ្ឋាភិបាល ស្ថាប័ន និងក្រសួង ហើយសូម្បីតែមន្ត្រីរាជការ និងស្ថាប័នព័ត៌មានក៏កំពុងតែយកចិត្តទុកដាក់រត់តាមសភាពការណ៍ ។
ផ្អែកតាមសន្ទុះនៃការគាំទ្រ និងលើកទឹកចិត្តនេះតេឡេក្រាម និងតិកតុក អាចថាជាដៃគូប្រកួតប្រជែងដ៏មុ.តស្រួច នៅលើថ្នាលនៃការប្រកួតប្រជែងឌីជីថលនៅកម្ពុជាជាមួយនឹងហ្វេសប៊ុក ប៉ុន្តែទោះបីជាយ៉ាងណាក៏ដោយអ្នកវិភាគបានអះអាងថា មុខងារ និងប្រព័ន្ធឌីជីថលនៃកម្មវិធីនៅលើហ្វេសប៊ុកនៅតែមានសភាពចម្រុះជាងបណ្តាញសង្គមផ្សេងៗ ។
សម្រាប់តេឡេក្រាម វាអាចងាយស្រួលនៅក្នុងការទំនាក់ទំនងចែករំលែកព័ត៌មានបានធំលឿនរហ័ស ហើយមិនប្រកាន់ ឬចោទបញ្ហាច្រើន ក៏ដូចជា មិនមានលក្ខខណ្ឌសាំញ៉ាំច្រើនដូចជា ហ្វេសប៊ុក ប៉ុន្តែទោះបី ជាយ៉ាងណាក៏ដោយថ្នាលនៃវេទិកាហ្វេសប៊ុក នៅតែត្រូវបានគេអះអាងថា មានភាពទូលំទូលាយជាង ហើយអ្វីៗ គឺមាននៅក្នុងនោះ ដូច្នេះហើយពលរដ្ឋ គឺមានការងាយស្រួលដោយពួកគេគ្រាន់តែបើកហ្វេសប៊ុក គឺគេចង់បានអី គឺនៅក្នុងនោះទាំងអស់ ។
ដោយឡែក តិកតុកក៏អាចនឹងប្រើប្រាស់ពេលវេលា និងការខិតខំបន្ថែមទៀត ប្រសិនបើចង់ឲ្យពលរដ្ឋកម្ពុជាចាប់អារម្មណ៍កាន់តែច្រើនជាងហ្វេសប៊ុក ។ នៅពេលនេះតិកតុក ភាគច្រើន គឺមានមុខងារចែករំលែកដែរ តែកំសាន្តច្រើនជាង ហើយសូម្បីតែស្ថាប័នផ្លូវការដែលប្រើប្រាស់ តិកតុកក៏ជាទូទៅសារដែលគេផ្ញើ និងចែករំលែកនៅលើថ្នាលនៃប្រព័ន្ធបណ្តាញសង្គមឌីជីថលនេះនៅតែមានចរិតលក្ខណៈកំសាន្ត សំណើច បំពេរអារម្មណ៍ ជាជាងប្រភព ឬថ្នាលដែលគេទទួលអ្វីដែលមានភាពជឿជាក់ ។
នៅក្នុងចំណោមបណ្តាញសង្គមនានាដែលកំពុងតែត្រូវបានពលរដ្ឋកម្ពុជាប្រើប្រាស់ហ្វេសប៊ុក ច្បាស់ជាមានភាគរយខ្ពស់ជាងគេ ប៉ុន្តែនៅឆ្នាំក្រោយៗអាចមិនប្រាកដពីព្រោះនៅពេលនេះហ្វេសប៊ុក គឺលែងត្រូវបានលើកទឹកចិត្ត និងគាំទ្រពីថ្នាក់ដឹកនាំកម្ពុជាហើយ ។
ប្រមាណជាជិត១០ឆ្នាំមកនេះ ហ្វេសប៊ុកត្រូវបានលើកទឹកចិត្តខ្លាំង ប៉ុន្តែចុងក្រោយនេះបញ្ហាបានកើតឡើងថ្មីៗនេះ ។ ប្រមុខរាជរដ្ឋាភិបាល បានបញ្ជាឲ្យលុបទាំងគណនីផ្លូវការដែលមានអ្នកគាំទ្រជាង១៤ លាននាក់ចោល ហើយបានលើកទឹកចិត្តឲ្យប្រើប្រាស់បណ្តាញសង្គម ថ្មីជំនួស ។
ក្រៅពីប្រតិកម្មពីថ្នាក់ដឹកនាំកម្ពុជាហើយនោះ ក្រសួងការបរទេសកម្ពុជាក៏បានប្រកាសឈ្មោះសមាជិកក្រុមប្រឹក្សាភិបាលត្រួតពិនិត្យនៃក្រុមហ៊ុន Meta Platforms Inc. ដែលគ្រប់គ្រងប្រតិបត្តិការបណ្តាញសង្គមហ្វេសប៊ុកចំនួន២២នាក់ មិនអោយចូល ឬមានវត្តមាននៅកម្ពុជា ដើម្បីទប់ស្កាត់ការជ្រៀតជ្រែកចូលកិច្ចការផ្ទៃក្នុងរបស់ប្រទេសកម្ពុជា ។
នៅពេលដែលកំពុងតែលើកទឹកចិត្តអ្នកដែលប្រើប្រាស់ហ្វេសប៊ុកនៅកម្ពុជារហូតដល់ខែមិថុនា ឆ្នាំ២០២៣ មានរហូតដល់ទៅជា១៣លាននាក់ឯណោះ ខណៈដែលបណ្តាញសង្គមផ្សេងៗមានក្រោម១០លាននាក់ទេ ប៉ុន្តែក្រោយពេលដែលប្រមុខរាជរដ្ឋាភិបាលកម្ពុជាបានដកសេចក្តីទុកចិត្តពីលើហ្វេសប៊ុក ហើយបានលើកទឹកចិត្តឲ្យប្រើប្រាស់បណ្តាញសង្គមផ្សេងជាជម្រើសជំនួសវិញនោះបណ្តាញសង្គមផ្សេង គឺកំពុងតែមានកំណើន ជាពិសេស គឺតេឡេក្រាម និងតិកតុក ។
សរុបមកវិញ បើនិយាយអំពីចំនួនអ្នកប្រើប្រាស់បណ្តាញសង្គមតេឡេក្រាម និងតិកតុកអាចនឹងមានគណនីចុះឈ្មោះប្រើប្រាស់ច្រើនជាងហ្វេសប៊ុកនៅពេលខាងមុខ ប្រសិនបើថ្នាក់ដឹកនាំ និងស្ថាប័ននានានៅតែបន្តលើកទឹកចិត្ត ប៉ុន្តែពលរដ្ឋក៏នៅតែមិនអាចកាត់ផ្តា.ច់ពីថ្នាលនៃការទំនាក់ទំនង ស្មារតីជាសហគមន៍ អាជីវកម្ម ព័ត៌មាន រកស៊ី … ពីបណ្តាញ សង្គមហ្វេសប៊ុកបានដែរ ៕ ដោយៈ ហេង ចេស្តារ
ចែករំលែកព័តមាននេះ