ខេត្តសៀមរាប ៖ អ៊ំស្រីម្នាក់អុជធូបចោលលើអសនៈចុះមកអង្គុយលេងក្រោម បណ្ដាលឱ្យឆេះផ្ទះហ្មត់ ដែលហេតុការណ៍នេះបង្កការភ្ញាក់ផ្អើលពេញស្រុកពួក នៅវេលាម៉ោង១១និង៣០នាទី នាថ្ងៃសៅរ៍ ទី១ ខែកក្កដា ឆ្នាំ២០២៣…
ខេត្តសៀមរាប ៖ អ៊ំស្រីម្នាក់អុជធូបចោលលើអសនៈចុះមកអង្គុយលេងក្រោម បណ្ដាលឱ្យឆេះផ្ទះហ្មត់ ដែលហេតុការណ៍នេះបង្កការភ្ញាក់ផ្អើលពេញស្រុកពួក នៅវេលាម៉ោង១១និង៣០នាទី នាថ្ងៃសៅរ៍ ទី១ ខែកក្កដា ឆ្នាំ២០២៣ ស្ថិតនៅក្នុងបរិវេណផ្ទះ ចេម យន់ ក្នុងភូមិប៉ាក់ ប៉ាន់ ឃុំសសរស្តម្ភ ស្រុកពួក ខេត្តសៀមរាប ។
បើតាមលោកវរសេនីយ៍ឯក ទេព ពុំ សែន អធិការនគរបាលស្រុកពួក បានប្រាប់តាមទូរស័ព្ទនៅវេលាម៉ោង១៧ និង៤៦នាទីល្ងាច ថ្ងៃទី១ ខែកក្កដា ឆ្នាំ២០២៣នេះថា មានករណីអគ្គិភ័យឆេះផ្ទះដែលមានម្ចាស់ផ្ទះឈ្មោះ ចៀម យន់ ភេទស្រី (ស្ត្រីមេម៉ាយ) អាយុ៦១ឆ្នាំ មុខរបរកសិករ រស់នៅភូមិប៉ាក់ប៉ាន់ ឃុំសសរស្តម្ភ ស្រុកពួក ខេត្តសៀមរាប ។
លោកបញ្ជាក់ថា ផ្ទះដែលឆេះទាំង២ខ្នងនោះមានប្រវែង៨ ម៉ែត្រគុណ ៩ ម៉ែត្រ ថ្មក្រោមឈើ លើប្រក់ស៊ីប្រូជញ្ជាំងក្តារ ។ លោកបន្ថែមទៀតថា ក្នុងពេលកំពុងកើតហេតុលោកបានឱ្យកម្លាំងនគរបាលប៉ុស្តិ៍សសរស្តម្ភ និងប្រជាការពារ និងប្រជាពលរដ្ឋជួយសង្គ្រោះ និងពន្លត់តែអកុសលភ្លើងឆេះខ្លាំងទើបបណ្តាលឆេះហ្មត់ បន្សល់ទុកនូវស្ត្រី មេម៉ាយ អាយុ៦១ឆ្នាំម្នាក់ និងកូនប្រសាព្រមទាំងចៅៗ ។
លោកបញ្ជាក់ទៀតថា ក្នុងករណីឆេះផ្ទះស្ត្រីមេម៉ាយម្នាក់នេះ បណ្តាលឱ្យខូចខាតទាំងស្រុង និងទ្រព្យសម្បត្តិផ្ទាល់ខ្លួនទាំងអស់ ។ បច្ចុប្បន្ន ផ្ទះស្ត្រីម៉េម៉ាយដែលឆេះអស់គ្មានសល់នោះ បើគិតជាទឹកប្រាក់អស់ប្រមាណជិត៥ ម៉ឺនដុល្លារ ៕
ចែករំលែកព័តមាននេះ