ខេត្តពោធិ៍សាត់៖ រដ្ឋបាលខេត្តពោធិ៍សាត់ បានប្រកាសថា កាលពីពេលថ្មីៗនេះ មានការផ្សព្វផ្សាយ​តាមហ្វេសប៊ុក អំពីព្រះពុទ្ធរូបផ្ចាញ់មា ១ព្រះអង្គ ស្ថិតនៅក្នុងបរិវេណវត្តវាល ភូមិ​ផ្សារលើ សង្កាត់លលកស ក្រុងពោធិ៍សាត់ ខេត្តពោធិ៍សាត់ ដែលមានលក្ខណៈ​មិនស្អាតល្អ​។

ករណីនេះ រដ្ឋបាលខេត្តពោធិ៍សាត់ បានប្រកាសថា ព្រះពុទ្ធរូបនេះ ត្រូវបានកសាងឡើងតាំងពីឆ្នាំ២០០៩ មកម្លេះ ក្រោមការផ្តួចផ្តើម​របស់ព្រះចៅអធិការវត្តវាល​។ ព្រះពុទ្ធរូបនេះ សង់ឡើង មានកម្ពស់ ២៩ម៉ែត្រ ព្រះភ្នែន ២១ម៉ែត្រ។ ការកសាង​ព្រះពុទ្ធរូបនេះ បានប្រើប្រាស់ជាង ដែលមានចំណេះដឹងតិចតួច និងបច្ចេកទេស​សូន្យរូប នៅមានកម្រិត ពុំមានរចនាបថបានត្រឹមត្រូវ​តាមក្បួនខ្នាតនោះទេ​។ តាមការពិនិត្យជាក់ស្តែង បើយើង​មើលចំពីមុខ ព្រះភក្ត្រព្រះអង្គ ពិតជាមានទម្រង់​សមរម្យជាងមើល​ពីចំហៀង។

យ៉ាងណាក៏ដោយ រដ្ឋបាលខេត្តពោធិ៍សាត់ បានប្រកាសថា នឹង​ណែនាំដល់​មន្ទីរជំនាញ សហការ​ជាមួយ​អ្នកបច្ចេកទេស និងព្រះចៅអធិការវត្ត ដើម្បី​បន្តពិនិត្យ និងវាយតម្លៃ​ឱ្យបាន​ល្អិតល្អន់នូវចំណុចខ្វះខាត ឆ្គាំឆ្គងណា ដែលគួរធ្វើការកែលម្អឱ្យបានសមរម្យ៕