ខេត្តព្រះសីហនុ ៖ លោកវរសេនីយ៍ឯក តី វិសាល អធិការនគរបាលក្រុងព្រះសីហនុ បានឲ្យដឹងថា ដោយទទួលបានបទបញ្ជាយ៉ាងម៉ឺងម៉ាត់ពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត កាលពីវេលាម៉ោងប្រមាណ៨យប់ថ្ងៃទី២២ ខែមិថុនា ឆ្នាំ២០២៣ កន្លងទៅ កម្លាំងនគរបាលក្រុង សហការជាមួយនគរបាលប៉ុស្តិ៍សង្កាត់លេខ២ បានឆ្មក់បង្ក្រាបទីតាំងហ្គេមខុសច្បាប់១កន្លែង មានយីហោ «ទៀនអ័នឆឹង» ស្ថិតក្នុងភូមិ២ សង្កាត់លេខ២ ក្រុងព្រះសីហនុ ។

នៅក្នុងការបង្ក្រាបនេះ សមត្ថកិច្ចបានឃាត់ខ្លួនអ្នកគ្រប់គ្រងទីតាំងចំនួន៣នាក់ និងភ្ញៀវចូលលេងចំនួន៣នាក់ ក្នុងនោះរួមមាន ៖ ១- ឈ្មោះ Lin Zhi Long ភេទប្រុស អាយុ៣០ឆ្នាំ ជនជាតិចិន ជាអ្នកគ្រប់គ្រងទីតាំងហ្គេមខាងលើ ។ ២- ឈ្មោះ ញឹម វណ្ណថា ភេទស្រី អាយុ២៤ឆ្នាំ ជនជាតិខ្មែរ ជាអ្នកកត់ពិន្ទុ ស្មាក់នៅកន្លែងខាងលើ ។ ៣- ឈ្មោះ ង៉ែត ចំងាយ ភេទស្រី អាយុ១៧ឆ្នាំ ជនជាតិខ្មែរ ជាអ្នកកត់ពិន្ទុ ស្នាក់នៅកន្លែងខាងលើ ។ ៤- ឈ្មោះ She Yu Yong ភេទប្រុស អាយុ៥០ឆ្មាំ ជនជាតិចិន ជាអ្នកលេងហ្គេម ។ ៥- ឈ្មោះ Lin Qing Hong ភេទប្រុស អាយុ៣១ឆ្នាំ ជនជាតិចិន ជាអ្នកលេងហ្គេម។៦- ឈ្មោះ តុប សាគង់ ភេទប្រុស អាយុ៤៦ឆ្នាំ ជនជាតិខ្មែរ មុខរបរបើករថយន្តឈ្នួល ជាអ្នកលេង ។

ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតវត្ថុតាងរួមមាន ៖ ទូហ្គេមបាញ់ត្រីធំចំនួន២គ្រឿង ទូស្លុតម៉ាស៊ីនចំនួន៨គ្រឿង និងកៅអីដែកអង្គុយចំនួន១០ ។
ក្រោយការឃាត់ខ្លួន ជនទាំង៦នាក់ រួមនឹងវត្ថុតាងខាងលើនេះ ត្រូវបានសមត្ថកិច្ចចាត់ការទៅតាមនីតិវិធីនៃច្បាប់ ៕
ចែករំលែកព័តមាននេះ