តំណាង គ្មានដោះស្រាយអ្វីបាន លោកស្នងការខេត្តកំពត កោះហៅ ឧកញ៉ា ពិភពដីមាស ជាលើកទី២
ខេត្តកំពត ៖ លោកឧកញ៉ា ហ៊ី គឹមហុង និងលោកឧកញ៉ា ចេង សង្ហាក់ អគ្គនាយកក្រុមហ៊ុន «ពិភពដីមាស»…
ខេត្តកំពត ៖ លោកឧកញ៉ា ហ៊ី គឹមហុង និងលោកឧកញ៉ា ចេង សង្ហាក់ អគ្គនាយកក្រុមហ៊ុន «ពិភពដីមាស» មិនបានចូលខ្លួនមកបំភ្លឺ តាមការកោះហៅរបស់លោកស្នងការនគរបាលខេត្តកំពត នោះទេ បែរជាចាត់តំណាងម្នាក់ មកជួបប្រជាពលរដ្ឋរងគ្រោះ ទៅវិញ ទាំងដែលមិនអាចដោះស្រាយអ្វីបានទាំងអស់ ។
ក្នុងលិខិតកោះហៅរបស់លោកឧត្តមសេនីយ៍ទោម៉ៅ ចន្ទ័មធុរិទ្ធ ស្នងការនគរបាលខេត្តកំពត បានឲ្យឧកញ៉ា ហ៊ី គឹមហុង និងឧកញ៉ា ចេង សង្ហាក់ ដែលឧកញ៉ាទាំង២រូបនេះ គឺជាអគ្គនាយកក្រុមហ៊ុន «ពិភពដីមាស» ត្រូវមកជួបជជែកដោះស្រាយគ្នា ជាមួយប្រជាពលរដ្ឋចំនួន ៤៨៤គ្រួសារ ក្នុងនោះមកពីស្រុកឈូក, ស្រុកដងទង, ស្រុកទឹកឈូ និងស្រុកបន្ទាយមាស នៅព្រឹកថ្ងៃទី២៦ ខែមិថុនា ឆ្នាំ២០២៣នេះ ស្ថិតនៅស្នងការដ្ឋាននគរបាលខេត្តកំពត ប៉ុន្តែបែរជាចាត់លោក ប្រាក់ ពិន ជាតំណាង មកធ្វើការដោះស្រាយទៅវិញ ។
ប្រជាពលរដ្ឋដែលបានចាញ់បោកក្រុមហ៊ុនពិភពដីមាស ម្នាក់ៗអស់រាប់ម៉ឺនដុល្លារ សុទ្ធតែបាននិយាយទាមទារថា ខ្លួនមិនទទួលបានប្រាក់ការពីក្រុមហ៊ុនទេ និងសុំអោយក្រុមហ៊ុនសងប្រាក់ដើមឲ្យគ្រប់ចំនួន ដែលខ្លួនបានដាក់អោយក្រុមហ៊ុន ។
ប្រជាពលរដ្ឋដែលជាជនរងគ្រោះ ក៏បាននិយាយថា បើដឹងលោក ប្រាក់ ពិន ដែលក្រុមហ៊ុនចាត់មកជាតំណាងនោះពួកគាត់មិនបាច់មកទេ ព្រោះលោក ប្រាក់ ពិន រូបនេះនិយាយមិនពិតទេ និយាយកុហក និងចេះតែសន្យាខ្យល់តែប៉ុណ្ណោះ ។
លោកឧត្តមសេនីយ៍ទោ ម៉ៅ ចន្ទ័មធុរិទ្ធ ស្នងការខេត្តកំពត មានប្រសាសន៍ថា លោកនឹងខិតខំដោះស្រាយជូនបងប្អូនប្រជាពលរដ្ឋរងគ្រោះទាំងអស់ ក្នុងនាមជាអាជ្ញាធរឈរកណ្ដាល មិនលំហៀង ទៅខាងណាទេ គឺលោកយកច្បាប់ជាធំ ។
លោកឧត្តមសេនីយ៍ទោម៉ៅ ចន្ទ័មធុរិទ្ធ ឲ្យលោក ប្រាក់ ពិន ជាតំណាងក្រុមហ៊ុននោះ ស្ដាប់ដោយខ្លួនឯង គ្មាននណាបញ្ជាអោយប្រជាពលរដ្ឋនិយាយនោះទេ ។ ខណៈ «ឧកញ៉ាអគ្គនាយកក្រុមហ៊ុនទាំង២នាក់ ពិតជាខ្លាំងមែន! សុំសម្តេចតេជោ ស្នើសម្តេចក្រឡាហោម ឲ្យពិនិត្យសតិអារម្មណ៍ស្នងការខេត្ដកំពត» ។
លោកស្នងការខេត្តកំពត បញ្ជាក់ថា ការដោះស្រាយថ្ងៃនេះ មិនទទួលបានផ្លែផ្កាទេ ព្រោះពលរដ្ឋចង់ជួបលោកឧកញ៉ាទាំង២នាក់ ជាចាំបាច់ ។ សង្ឃឹមថា លោកឧកញ៉ា នឹងមកជួប ប្រជាពលរដ្ឋ ដោយមិនចាំបាច់មានលិខិតកោះហៅជាលើកទី០២ ពីមន្ត្រីនគរបាលយុត្តិធម៏ ដើម្បីបញ្ជាក់អំពីទំនួលខុសត្រូវ ច្បាស់លាស់របស់ក្រុមហ៊ុន ជាមួយ ប្រជាពលរដ្ឋ ៤៨៤គ្រួសារ ធ្វើការដោះស្រាយនៅលើកទី២នោះ ក៏មានឯកឧត្តមអភិបាលខេត្តកំពត ចូលរួមផងដែរ ៕
ចែករំលែកព័តមាននេះ