ឡាន និងម៉ូតូពន្លះគ្នាលើផ្លូវជាតិលេខ៤ ឆ.ក់យកជីវិតមនុស្ស២នាក់
- ព្រះសីហនុ
ខេត្តព្រះសីហនុ ៖ បុរសចំនួន២នាក់បានស្លា.ប់ និង២នាក់ទៀតជាជនបរទេស បានរងរបួសស្រាល
ខេត្តព្រះសីហនុ ៖ បុរសចំនួន២នាក់បានស្លា.ប់ និង២នាក់ទៀតជាជនបរទេស បានរងរបួសស្រាល ក្នុងហេតុការណ៍គ្រោះថ្នាក់ចរាចរណ៍មួយកើតឡើងរវាងម៉ូតូនិងរថយន្ត ។
ហេតុការណ៍ខាងលើនេះបានកើតមានឡើងកាលពីវេលាម៉ោង១រសៀលថ្ងៃទី២៥ មិថុនា ឆ្នាំ២០២៣ នៅដងផ្លូវជាតិលេខ៤ ចន្លោះគីឡូម៉ែត្រលេខ ២០៥-២០៦ ស្ថិតនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ ។
តាមប្រភពពីសមត្ថកិច្ចបានឲ្យដឹងថា ភាគីខាងម៉ូតូ១គ្រឿង ម៉ាក HONDA DREAM ពណ៌ខ្មៅ ពាក់ផ្លាកលេខ ពោធិ៍សាត់ 1J-6219 បើកបរដោយឈ្មោះ ហុង ធា ភេទប្រុស អាយុ២៩ឆ្នាំ មុខរបរកម្មកររោងចក្រ (បានស្លា.ប់) និងអ្នករួមដំណើរម្នាក់ឈ្មោះ ហុង ណែម ភេទប្រុស អាយុ២៣ឆ្នាំ មុខរបរកម្មកររោងចក្រ បានរងរបួសធ្ងន់ ក្រោយមកបានស្លា.ប់តាមផ្លូវ ពេលបញ្ជូនទៅសង្គ្រោះនៅមន្ទីរពេទ្យ ។ ជនរងគ្រោះទាំង២នាក់ មានទីលំនៅក្នុងភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ខេត្តកំពត ។
ចំណែកភាគីខាងរថយន្ត១គ្រឿងម៉ាក FORD TRANSIT ពណ៌ទឹកប្រាក់ ពាក់ផ្លាកលេខ ភ្នំពេញ 3F-0410 អ្នកបើកបរមិនស្គាល់អត្តសញ្ញាណ (រត់គេចខ្លួន) និងអ្នករួមដំណើរចំនួន៤នាក់៖ ១-ឈ្មោះ ALANA HAGEREAVES (ជនជាតិអូរស្ត្រាលី) ភេទស្រី អាយុ២៣ឆ្នាំ (រងរបួសស្រាល) ២-ឈ្មោះ IZABELA MUNDZIY (ជនជាតិបូឡូញ) ភេទស្រី អាយុ២៩ឆ្នាំ ៣-ឈ្មោះ MELVIN DE BOER (ជនជាតិហូរឡង់) ភេទប្រុស អាយុ២៣ឆ្នាំ និង៤-ឈ្មោះ BENJAMIN PERRY (ជនជាតិអង់គ្លេស) ភេទប្រុស អាយុ២៦ឆ្នាំ (រងរបួសស្រាល) ។
តាមប្រភពពីសមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះកើតឡើង រវាងម៉ូតូមួយគ្រឿង ម៉ាកហុងដាឌ្រីម មានទិសដៅពីរាជធានីភ្នំពេញឆ្ពោះទៅខេត្តព្រះសីហនុ បើកបរដោយបុរសម្នាក់ និងបុរសម្នាក់ទៀតជាអ្នករួមដំណើរ ។ លុះមកដល់ចំណុចខាងលើ បានវ៉ាជែង ខណៈពេលនោះមានរថយន្តមួយគ្រឿងដែលមានទិសដៅផ្ទុយគ្នា បានបុ.កចំពីមុខតែម្តង បណ្ដាលឲ្យស្លា.ប់ចំនួន២នាក់ នឹងរងរបួសស្រាលចំនួន២នាក់ ។
ក្រោយពេលកើតហេតុ ស.ពជនរងគ្រោះទាំង២នាក់ត្រូវបានក្រុមគ្រួសារយកទៅធ្វើបុណ្យតាមប្រពៃណី ចំណែកជនរងគ្រោះដែលរងរបួសស្រាលកំពុងសម្រាកព្យាបាលនៅមន្ទីរសម្រាកព្យាបាលមិត្តភាព ៨៨៨ ខេត្តព្រះសីហនុ រីឯរថយន្ដ និងម៉ូតូ ត្រូវបានសមត្ថកិច្ចយកមករក្សាទុកបណ្ដោះអាសន្ននៅអធិការដ្ឋាននគរបាលស្រុកព្រៃនប់ ។ ដោយឡែកអ្នកបើកបររថយន្ដបានរត់គេចខ្លួនបាត់ក្រោយពេលកើតហេតុ ៕
ចែករំលែកព័តមាននេះ