ខេត្តតាកែវ ៖ លោកវី សំណាង អភិបាលខេត្តតាកែវ បានប្រកាសនៅលើបណ្តាញសង្គមហ្វេសប៊ុករបស់លោកនាថ្ងៃទី១៤ ខែតុលានេះថា ៖ សូមបងប្អូនមានការប្រុងប្រយ័ត្នឱ្យបានខ្ពស់ ពេលនេះ…
ខេត្តតាកែវ ៖ លោកវី សំណាង អភិបាលខេត្តតាកែវ បានប្រកាសនៅលើបណ្តាញសង្គមហ្វេសប៊ុករបស់លោកនាថ្ងៃទី១៤ ខែតុលានេះថា ៖ សូមបងប្អូនមានការប្រុងប្រយ័ត្នឱ្យបានខ្ពស់ ពេលនេះ ផ្លូវលើខ្នងប្រឡាយ១២ ស្ថិតនៅក្នុងភូមិសាស្ត្រភូមិព្រែកតាផ ឃុំគោកធ្លក ស្រុកអង្គរបុរី ខេត្តតាកែវ ត្រូវបានទឹកភ្លៀងជនលិចជាអន្លើៗ ដែលអាចបង្កគ្រោះថ្នាក់ជាយថាហេតុ បណ្ដាលមកពីការហូរច្រោះនាំឲ្យដាច់ផ្លូវ ។
លោកអភិបាលខេត្តតាកែវ បានបញ្ជាក់ថា តាមរយៈនេះសូមមន្ទីរធនធានទឹកខិតខំតាមដានការប្រែប្រួលនៃទឹកផ្តល់ព័ត៌មានឲ្យដល់អាជ្ញាធរ ភូមិ ឃុំ ស្រុក ដើម្បីបានជម្លៀសប្រជាពលរដ្ឋទៅកាន់ទីទួលសុវត្ថិភាពឲ្យបានទាន់ពេលវេលា ។
មន្ទីរកសិកម្មរុក្ខាប្រមាញ់ និងនេសាទខេត្ត ត្រូវត្រៀមបង្ការពូជស្រូវ ប្រដេញទឹកសម្រាប់ជួយឧបត្ថម្ភដល់បងប្អូនប្រជាពលរដ្ឋ ពេលដែលទឹកស្រក ។
ពេទ្យសត្វ ត្រូវត្រៀមថ្នាំបង្ការជំងឺផ្សេងៗដែលអាចកើតឡើងដល់សត្វពាហនៈដែលបណ្ដាលមកពីជំនន់ទឹកភ្លៀងនេះ ។
មន្ទីរសុខាភិបាល ត្រូវត្រៀមបង្ការថ្នាំពស់ចឹក សត្វទិច ឬខាំ សម្រាប់ជួយដល់បងប្អូនប្រជាពលរដ្ឋឲ្យបានទាន់ពេលវេលា។
មន្ទីរសាធារណការ និងមន្ទីរអភិវឌ្ឍន៍ជនបទ ត្រូវត្រៀមមធ្យោបាយសម្រាប់ជួសជុលផ្លូវក្រោយពេលដែលទឹកស្រក ។
គ្រប់ក្រុង ស្រុក ត្រូវពិនិត្យឲ្យប្រាកដថា ទីទួលសុវត្ថិភាពបានគិតគូររួចហើយ ។ ក្នុងករណីកើតហេតុផ្សេងៗត្រូវប្រើប្រាស់យន្តការគណៈជាការឯកភាព របស់រដ្ឋបាលក្រុងស្រុកឲ្យមានប្រសិទ្ធភាពខ្ពស់បំផុត ៕
ចែករំលែកព័តមាននេះ