ការគាំងបេះដូងភ្លាមៗមិនមែនកើតឡើងដោយចៃដន្យនោះទេ។ ភាគច្រើនវាជាលទ្ធផលនៃការប្រមូលផ្តុំកត្តាហានិភ័យ និងទម្លាប់រស់នៅប្រចាំថ្ងៃដែលយើងមិនបានយកចិត្តទុកដាក់។ ការយល់ដឹងអំពីអាកប្បកិរិយាទាំងនេះអាចជួយអ្នកការពារជីវិតរបស់អ្នកបានទាន់ពេល!
ក្រុមទី ១៖ របៀបរស់នៅ និងទម្លាប់អាហារូបត្ថម្ភ
១. លើសទម្ងន់/ធាត់
ការធាត់បង្កើនហានិភ័យនៃជំងឺរ៉ាំរ៉ៃជាច្រើនដូចជា លើសឈាម កូលេស្តេរ៉ូលខ្ពស់ និងទឹកនោមផ្អែម។ ជំងឺទាំងនេះនាំឲ្យមានបញ្ហាចរន្តឈាម ស្ទះសរសៃឈាម ដែលបង្កគ្រោះថ្នាក់ធ្ងន់ធ្ងរដល់បេះដូង។
២. ទទួលទានអាហារជាតិខ្លាញ់ខ្ពស់
អាហារដូចជានំខេក នំប៉័ង ឈីស សាច់ខ្លាញ់ និងអាហាររហ័ស បង្កើនជាតិខ្លាញ់ខ្ពស់ (កូលេស្តេរ៉ូល) ក្នុងឈាម។ កូលេស្តេរ៉ូលដែលប្រមូលផ្តុំច្រើនពេក នឹងស្ទះសរសៃឈាមបេះដូង ធ្វើឲ្យសាច់ដុំបេះដូងខ្វះឈាម ហើយអាចស្លាប់បាន។
៣. ការជក់បារី
បារីគឺជាមូលហេតុចម្បងមួយនៃការស្ទះសរសៃឈាមបេះដូង។ វាធ្វើឲ្យខ្លាញ់បង្កើតឡើងលើជញ្ជាំងសរសៃឈាម បណ្តាលឲ្យសរសៃឈាមបេះដូងរួមតូច និងខ្វះអុកស៊ីហ្សែន។ នេះនាំឲ្យមានអាការៈឈឺទ្រូង និងហានិភ័យនៃការគាំងបេះដូងភ្លាមៗ។
៤. ផឹកភេសជ្ជៈកាហ្វេអ៊ីនច្រើនពេក
ការទទួលជាតិកាហ្វេអ៊ីនលើសកម្រិតអាចបង្កឲ្យមានអតុល្យភាពអេឡិចត្រូលីត បង្កើនសម្ពាធឈាមភ្លាមៗ និងធ្វើឲ្យបេះដូងកន្ត្រាក់ខ្លាំងហួសហេតុ។ នេះអាចបណ្តាលឲ្យស្ទះផ្លូវដង្ហើម និងចរន្តឈាម ដែលអាចស្លាប់បាន។
ក្រុមទី ២៖ ទម្លាប់នៃចលនារាងកាយ
៥. កង្វះលំហាត់ប្រាណ
នៅពេលដែលអ្នកមិនហាត់ប្រាណ ប្រព័ន្ធឈាមរត់របស់អ្នកដំណើរការមិនរលូន ដែលធ្វើឲ្យស្រទាប់ខ្លាញ់ងាយប្រមូលផ្តុំលើជញ្ជាំងសរសៃឈាម។ ការស្ទះសរសៃឈាមនេះ រារាំងលំហូរឈាមទៅកាន់បេះដូង។
៦. ហាត់ប្រាណច្រើនហួសហេតុ
ការហាត់ប្រាណលើសកម្រិត ដាក់សម្ពាធខ្លាំងទៅលើបេះដូង និងសួត ជាពិសេសចំពោះអ្នកដែលមានជំងឺបេះដូង។ វាបង្ខំឲ្យបេះដូងធ្វើការខ្លាំងរហូតបាត់បង់សមត្ថភាពដំណើរការ និងអាចបណ្តាលឲ្យសាច់ដុំបេះដូងស្លាប់។ សំខាន់៖ កុំឈប់ហាត់ប្រាណភ្លាមៗនៅពេលហត់ ត្រូវសម្រាកឲ្យត្រជាក់សិន។
ក្រុមទី ៣៖ ស្ថានភាពផ្លូវចិត្ត និងសារធាតុគីមី
៧. ទុក្ខព្រួយធ្ងន់ធ្ងរ និងស្ត្រេសផ្លូវចិត្តខ្លាំង
អារម្មណ៍ឈឺចាប់ខ្លាំងដូចជាការបាត់បង់មនុស្សជាទីស្រឡាញ់ភ្លាមៗ អាចបង្កឲ្យមាន ជំងឺបេះដូងខូច។ រាងកាយបញ្ចេញអ័រម៉ូនស្ត្រេសខ្ពស់ ដែលធ្វើឲ្យសរសៃឈាមបេះដូងរួមតូច រារាំងឈាមមិនឲ្យហូរទៅកាន់បេះដូង ដែលនាំឲ្យខូចបេះដូង និងអាចស្លាប់បាន។
៨. ស្ត្រេសរ៉ាំរ៉ៃ
អ្នកដែលធ្វើការធ្ងន់ និងមានស្ត្រេសខ្ពស់រ៉ាំរ៉ៃ ប្រឈមនឹងជំងឺចង្វាក់បេះដូងមិនទៀងទាត់ និងជំងឺក្រិនសរសៃឈាម (ខ្លាញ់កកក្នុងសរសៃឈាម)។ ភាពតានតឹងជំរុញការរលាកតាមជញ្ជាំងសរសៃឈាម នាំឲ្យមានការស្ទះ។
៩. ការប្រើប្រាស់គ្រឿងញៀន និងប្រើប្រាស់ថ្នាំលើសកម្រិត
ការលេបថ្នាំដូចជា កូកាអ៊ីន, អំហ្វេតាមីន, អេហ្វដ្រីន, ឬការប្រើប្រាស់ថ្នាំលើសកម្រិត អាចបណ្តាលឲ្យស្ទះសរសៃឈាមធ្ងន់ធ្ងរ និងបង្កើនហានិភ័យនៃការគាំងបេះដូងភ្លាមៗ។
ការការពារ: ផ្លាស់ប្តូរទម្លាប់អាក្រក់ទាំងនេះចាប់ពីថ្ងៃនេះ។ បើអ្នកសង្ស័យថាមានរោគសញ្ញាណាមួយ សូមទៅពិគ្រោះជាមួយគ្រូពេទ្យជាបន្ទាន់ ដើម្បីការពារបេះដូងរបស់អ្នកមុនពេលហួសពេល! ៕
(ប្រភព៖ បរទេស)
ចែករំលែកព័តមាននេះ