ខេត្តកណ្តាល ៖ សម្តេចតេជោ ហ៊ុន សែន នាយករដ្ឋមន្ត្រីបានធ្វើការវិភាគមួយថា បើសិនសង្គ្រាមរុស្ស៊ីជាមួយអ៊ុយក្រែននៅតែបន្តអូសបន្លាយទៀតនោះ បញ្ហាវិបត្តិសេដ្ឋកិច្ចនៅតែកើតមាន ពិសេសនោះអឺរ៉ុបតែម្តង ។
ថ្លែងក្នុងពិធីសំណេះសំណាលជាមួយកម្មករកម្មការរិនីនៅរាជធានីភ្នំពេញ និងខេត្តកណ្តាលជិត២ម៉ឺននាក់ សម្តេចតេជោ ហ៊ុន សែននាយករដ្ឋមន្ត្រីបានគូសបញ្ជាក់យ៉ាងដូច្នេះថា ៖«បញ្ហានៅលើពិភពលោកខ្ញុំយកការទស្សទាយវិភាគមួយថា ដរាបណាសង្គ្រាមរុស្ស៊ី និង អ៊ុយក្រែន មិនទាន់បានបញ្ចប់ សេដ្ឋកិច្ចពិភពលោកនៅតែជួបវិបត្តិ ព្រោះថា សូម្បីតែនៅកម្ពុជារងប៉ះពាល់ដែរ ហើយអ្វីដែលរងផលប៉ះពាល់នោះ គឺប្រជាជនខ្លួនឯងតែម្តង» ។
សម្តេចតេជោ បានបន្តថា បើប្រជាជននៅអឺរ៉ុបប៉ះពាល់ដោយសារសង្គ្រាមរុស្ស៊ី និងអ៊ុយក្រែននោះ កម្ពុជាក៏ប៉ះពាល់ដែរព្រោះថា កម្ពុជាបាននាំចេញផលិតផលទៅកាន់ប្រទេសនៅអឺរ៉ុប ។ តែកម្ពុជាក៏បាននាំចេញផលិតផលនៅកាន់ទីផ្សារទៅបណ្តាប្រទេសផ្សេងផងដែរ ។
សម្តេចបន្ថែមថា រាជរដ្ឋាភិបាលបានខិតខំណាស់ ក្នុងការស្វែងរកទីផ្សារក្រៅពីទៅអឺរ៉ុប និងអាមេរិកនោះទេ គឺបានស្វះស្វែងរកទីផ្សាផ្សេងដូចជា នៅទីផ្សាប្រទេសចិន កូរ៉េខាងត្បូង ជប៉ុន នៅអារ៉ាប់អារ៉ាជាដើម ។
សម្តេចតេជោ បានលើកឡើងទៀតថា ការនាំចេញផលិតផលពីកម្ពុជាទៅកាន់ទីផ្សារនានានេះបង្ហាញថា កម្ពុជាមានលទ្ធភាពក្នុងផលិត ។ ការនាំចេញផលិតផលផ្នែកវាយនភណ្ឌ នៅក្នុងឆ្នាំ២០២២កន្លងមកនេះទំហំនៃការនាំចេញផលិតផលមានជាង២៩ពាន់លានដុល្លារអាមេរិក ។
ដោយឡែកវិស័យកាត់ដេរ និងស្បែកជើងមានប្រមាណជាង១៣ពាន់លានដុល្លារអាមេរិក ។ សម្តេចតេជោ បានបន្ថែមថា អ្វីដែលកើតមកដល់បច្ចុប្បន្ននេះ ដោយសារខិតខំរបស់រាជរដ្ឋាភិបាលដែលម្ខាងធ្វើការបង្កើតការផលិតផលក្នុងស្រុក និងម្ចាស់ទៀតខិតខំស្វែងរកទីផ្សារ ដើម្បីឲ្យប្រជាពលរដ្ឋរកចំណូលបាន ។
ជាមួយគ្នានោះដែរ សម្តេចតេជោ ក៏បានឲ្យកម្មករកម្មការិនីធ្វើការគិតថា បើគ្មានរោងចក្រនៅកម្ពុជាទេនោះ កម្មករ និងមិនមានការងាធ្វើនោះទេ គឺច្បាស់ជាធ្វើកសិកម្មនៅស្រុកជាមិនខាន ។
សូមជម្រាបថា ក្រោយពីប្រទេសរុស្ស៉ី បានបើកការវា.យទ្រង់ទ្រាយធំលើប្រទេសអ៊ុយក្រែន កាលពីថ្ងៃទី២៤ ខែកុម្ភៈ ឆ្នាំ២០២២នោះ ជម្លោះរវាងប្រទេសទាំង២ នៅតែអូសបន្លាយមកដល់សព្វថ្ងៃនេះបានធ្វើឲ្យប៉ះពាល់ដល់សេដ្ឋកិច្ចប្រទេសមួយចំនួនក្នុងសកលលោកផងដែរ ៕
ចែករំលែកព័តមាននេះ