ពេលធ្វើការ ត្រូវធ្វើអោយល្អតាមការទទួលខុសត្រូវ ដើម្បីអោយក្លាយខ្លួនជាមនុស្សសំខាន់សម្រាប់ក្រុមហ៊ុន ឬស្ថាប័ន។ បុគ្គលិកល្អ មិនត្រឹមតែធ្វើខ្លួនអោយមានអនាគតល្អទេ វាថែមទាំងជួយក្រុមហ៊ុនអោយមានការរីកចម្រើនផងដែរ។ នេះគឺជាលក្ខណៈ
ពេលធ្វើការ ត្រូវធ្វើអោយល្អតាមការទទួលខុសត្រូវ ដើម្បីអោយក្លាយខ្លួនជាមនុស្សសំខាន់សម្រាប់ក្រុមហ៊ុន ឬស្ថាប័ន។ បុគ្គលិកល្អ មិនត្រឹមតែធ្វើខ្លួនអោយមានអនាគតល្អទេ វាថែមទាំងជួយក្រុមហ៊ុនអោយមានការរីកចម្រើនផងដែរ។ នេះគឺជាលក្ខណៈវិនិច្ឆ័យមួយចំនួនដែលជាទូទៅចាត់ទុកថា មានសារៈសំខាន់សម្រាប់ការក្លាយជាបុគ្គលិកល្អ ៖
១- ចេះទទួលខុសត្រូវ និងទុកចិត្តបាន
បុគ្គលិកល្អ គួរតែអាចទុកចិត្តបាន និងអាចបំពេញតាមកាលកំណត់បានជាប់លាប់ ពោលគឺធ្វើការងារអោយបានល្អតាមការទទួលខុសត្រូវ ដោយមិនបាច់ត្រូវមេប្រាប់គ្រប់ពេលនោះទេ។
២- ជំនាញទំនាក់ទំនង
ការប្រាស្រ័យទាក់ទងច្បាស់លាស់ និងមានប្រសិទ្ធភាព គឺមានសារៈសំខាន់សម្រាប់ការងារជាក្រុម និងការសហការ។ ដូច្នេះបើអ្នកយល់ថា អ្នកមានការខ្វះខាតជំនាញទំនាក់ទំនង អ្នកត្រូវតែអានសៀវភៅស្តីពីទំនាក់ទំនង ឬសុំយោបល់ពីអ្នកជំនាញ។
៣- ចេះសម្របខ្លួនតាមស្ថានភាព
បុគ្គលិកល្អ គួរតែអាចសម្របខ្លួនទៅនឹងការផ្លាស់ប្តូរនៅក្នុងបរិយាកាសការងាររបស់ពួកគេ និងទទួលយកការទទួលខុសត្រូវថ្មីតាមតម្រូវការ។ អ្នកមិនត្រូវរឹងត្អឹងពេកទេ។ អ្នកត្រូវចេះទទួលយកការងារថ្មីដែលចាំបាច់សម្រាប់ក្រុមហ៊ុនរបស់អ្នក។
៤- ចេះមានគំនិតផ្តួចផ្តើម
និយោជិតដែលផ្តួចផ្តើមគំនិតក្នុងការដោះស្រាយបញ្ហា ផ្តល់យោបល់ ឬទទួលយកការងារបន្ថែម គឺមានតម្លៃខ្ពស់។ ដូច្នេះ អ្នកត្រូវបង្ហាញថា អ្នកជាបុគ្គលិកដែលឆ្លាត និងចេះរកដំណោះស្រាយក្នុងស្ថានភាពលំបាកណាមួយ។
៥- ចេះធ្វើការជាក្រុម
ការធ្វើការឱ្យបានល្អជាមួយអ្នកដទៃ គឺចាំបាច់សម្រាប់ភាពជោគជ័យក្នុងការងារជាច្រើន ហើយការក្លាយជាសមាជិកក្រុមល្អអាចជួយជំរុញបរិយាកាសការងារវិជ្ជមាន។ ដូច្នេះអ្នកត្រូវចេះធ្វើការជាក្រុម ហើយចេះទទួលយកភាពខុសគ្នារបស់មនុស្ស។ អ្នកត្រូវផ្តោតលើការសហការជាជាងចំណុចមិនល្អរបស់មនុស្សក្នុងក្រុម។
៦- អាកប្បកិរិយាវិជ្ជមាន
អាកប្បកិរិយាវិជ្ជមាន និងសុទិដ្ឋិនិយម អាចជួយបុគ្គលិករក្សាការលើកទឹកចិត្ត និងផលិតភាព ទោះបីជាស្ថិតក្នុងកាលៈទេសៈលំបាកក៏ដោយ។ កាលណាអ្នកគិតវិជ្ជមាន អ្នកនឹងជោគជ័យនៅថ្ងៃណាមួយ។ មនុស្សមិនអាចជោគជ័យគ្រប់រឿងទេ។ ប៉ុន្តែអ្នកត្រូវទទួលស្គាល់ថា បរាជ័យគឺជាផ្នែកមួយនៃជីវិត ហើយយកវាជាពិសោធន៍សម្រាប់អនាគត។
៧- យកចិត្តទុកដាក់ចំពោះព័ត៌មានលម្អិត
បុគ្គលិកល្អម្នាក់ យកចិត្តទុកដាក់ចំពោះព័ត៌មានលម្អិត និងយកចិត្តទុកដាក់ ដើម្បីជៀសវាងកំហុស។ ជំនួសអោយការឆ្លើយបាទ ឬចាស រហូតចំពោះការងារដែលមេដាក់អោយ អ្នកត្រូវចេះសួររកព័ត៌មានលម្អិត បើសិនជាអ្នកមិនទាន់យល់ពីការងារនោះ។ កាលណា អ្នកកាន់តែមានការយល់ដឹងអំពីការងារ អ្នកនឹងកាន់តែធ្វើវាបានល្អ។
៨- ចេះធ្វើការតាមពេលវេលា
បុគ្គលិកអាចកំណត់អាទិភាពការងារ គ្រប់គ្រងពេលវេលា និងការងារប្រកបដោយប្រសិទ្ធភាព។ ការចេះគ្រប់គ្រងពេលវេលា គឺជាជំនាញដ៏មានតម្លៃក្នុងការងារជាច្រើន។ អ្នកមិនត្រូវមកធ្វើការយឺត ឬក៏ពន្យាពេលនៃគម្រោងឡើយ។ ចូរអ្នករៀនធ្វើការងារតាមពេលវេលាកំណត់ ហើយក្លាយជាមនុស្សគោរពពេលវេលា។
៩- ការបើកចិត្តឱ្យទូលាយ
ការបើកចំហចំពោះគំនិតថ្មីៗ មតិកែលម្អ និងការរិះគន់ក្នុងន័យស្ថាបនា អាចជួយឱ្យបុគ្គលិករីកចម្រើន និងអភិវឌ្ឍវិជ្ជាជីវៈ។ កាលណា អ្នកបើកចិត្តទទួលយកមតិកែលម្អ អ្នកនឹងកាន់តែធ្វើការមានប្រសិទ្ធភាព។ អ្នកគួរតែអរគុណដល់មិត្តរួមការងារ ឬក៏មេរបស់អ្នក បើសិនជាពួកគេយកចិត្តទុកដាក់ផ្តល់មតិកែលម្អដើម្បីជួយអ្នកអោយកែខ្លួនកាន់តែល្អពីមួយពេលទៅមួយពេល។
១០- ចង់ចេះចង់ដឹងចង់រៀនបន្ថែម
ការប្តេជ្ញាចិត្តចំពោះការសិក្សាជាបន្តបន្ទាប់ និងការរីកចម្រើនផ្ទាល់ខ្លួន អាចជួយបុគ្គលិកឱ្យក្លាយជាទ័ពស្រួច និងសម្របខ្លួនទៅនឹងការផ្លាស់ប្តូរនៅក្នុងឧស្សាហកម្ម ឬទីផ្សាររបស់ពួកគេ។ អ្នកត្រូវចងចាំថា ចំណេះដឹងចាំបាច់ត្រូវដើរអោយទាន់ពេលវេលា។ ការចេះចង់ដឹងចង់រៀននឹងធ្វើអោយអ្នកកាន់តែមានចំណេះដឹងថ្មីៗ ដ៏មានសារសំខាន់សម្រាប់អនាគតរបស់អ្នក និងក្រុមហ៊ុន។
សូមជូនពរអ្នកទាំងអស់គ្នាអោយក្លាយជាបុគ្គលិកល្អ ដែលនឹងទទួលបានការដំឡើងប្រាក់ខែ និងដំឡើងតំណែងនៅក្នុងក្រុមហ៊ុន ឬស្ថាប័នរបស់អ្នក៕ ដោយ ៖ ប្រេវីន
ចែករំលែកព័តមាននេះ