ខេត្តសៀមរាប ៖ មន្ត្រីជាន់ខ្ពស់អាជ្ញាធរអប្សរាបានថ្លែងថា សួនបន្លែសរីរាង្គដ៏ធំមួយជាលើកដំបូងនឹងត្រូវបង្កើតឡើងលើផ្ទៃដីរហូតដល់១០០ហិកតាក្នុងតំបន់អភិវឌ្ឍន៍ភូមិធម្មជាតិរុនតាឯក ក្នុងស្រុកបន្ទាយស្រី ដើម្បីលើកកម្ពស់កម្រិតជីវភាពប្រជាពលរដ្ឋនៅក្នុងតំបន់ និងក្រៅតំបន់អភិវឌ្ឍន៍មួយនោះ តាមរយៈការនាំចេញផលិតផលកសិកម្មដែលមានគុណភាពស្តង់ដាទៅកាន់ទីផ្សារទេសចរណ៍សៀមរាប។
សួនបន្លែសរីរាង្គដ៏មានសារសំខាន់នេះ ត្រូវបានបើកការដ្ឋានជាផ្លូវការកាលពីព្រឹកថ្ងៃទី៤ ខែឧសភា ឆ្នាំ២០១១ ក្រោមអធិបតីភាពលោកស៊ូ ភិរិន្ទ អភិបាលខេត្ត និងជាអនុប្រធានក្រុមប្រឹក្សាអាជ្ញាធរជាតិអប្សរា និងមានការចូលរួមពីលោកប៊ុន ណារិទ្ធិ អគ្គនាយកអាជ្ញាធរអប្សរា លោកច័ន្ទ សុផល ប្រធានក្រុមប្រឹក្សាខេត្ត ព្រមទាំងមន្ត្រីកងកម្លាំងប្រដាប់អាវុធ បុគ្គលិកអាជ្ញាធរអប្សរា ប្រជាពលរដ្ឋ និងសិស្សានុសិស្សជាច្រើននាក់ផងដែរ។
ថ្លែងនៅក្នុងពិធីបើកការដ្ឋានសួនបន្លែសរីរាង្គនេះ លោកស៊ូ ភិរិន្ទ មានប្រសាសន៍ថា សួនបន្លែសរីរាង្គដែលកំពុងតែចាប់ផ្តើមនៅពេលនេះត្រូវបានផ្តួចផ្តើមដោយលោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ក្នុងកិច្ចប្រឹងប្រែងលើកកម្ពស់ជីវភាពរបស់ប្រជាពលរដ្ឋនៅក្នុងតំបន់ ជាពិសេសប្រជាពលរដ្ឋធ្លាប់រស់នៅតំបន់ការពារ១ និង២ នៃឧទ្យានអង្គរបេតិកភណ្ឌពិភពលោក ហើយមានបំណងបំបែកគ្រួសារថ្មីស្ម័គ្រចិត្តមករស់នៅក្នុងភូមិអភិវឌ្ឍន៍ធម្មជាតិរុនតាឯកដែលជាភូមិអភិវឌ្ឍន៍គំរូទីមួយនៅក្នុងប្រទេសកម្ពុជា។
លោកស៊ូ ភិរិន្ទ បានថ្លែងទៀតថា តាមរយៈការបង្កើតឱ្យមានសួនបន្លែសរីរាង្គនៅក្នុងភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី នាពេលនេះជាការបញ្ជាក់ឱ្យឃើញកាន់តែច្បាស់នូវជោគជ័យរបស់អាជ្ញាធរអប្សរាក្នុងការសម្រេចទិសដៅរបស់ខ្លួនក្នុងការលើកទឹកចិត្តឱ្យប្រជាពលរដ្ឋរស់នៅក្នុងតំបន់១ និង២ នៃឧទ្យានអង្គរដែលត្រូវការពារក្នុងកម្រិតខ្ពស់ ស្ម័គ្រចិត្តមកតាំងទីលំនៅនៅភូមិធម្មជាតិរុនតាឯកដើម្បីរួមចំណែកទប់ស្កាត់ការរីករាលដាលនៃសំណង់មិនរៀបរយនៅក្នុងឧទ្យានអង្គរបេតិកភណ្ឌពិភពលោក។ ទន្ទឹមនឹងនោះគេក៏មានការរំពឹងទុកដែរថា សួនបន្លែសរីរាង្គដែលកំពុងចាប់ដំណើរការនាពេលនេះ នឹងអាចរួមចំណែកយ៉ាងសំខាន់មួយក្នុងការកាត់បន្ថយការធ្លុះធ្លាយចំណូលដ៏ក្រាស់ក្រែលពីវិស័យទេសចរណ៍របស់ប្រទេសកម្ពុជាតាមរយៈការផលិតបន្លែធម្មជាតិគ្មានជាតិគីមី សម្រាប់ផ្គត់ផ្គង់ទីផ្សារក្នុងតំបន់ជំនួសការនាំចូលនូវបន្លែផ្លែឈើពីប្រទេសក្បែរខាង។
រដ្ឋមន្ត្រីក្រសួងទេសចរណ៍នៃប្រទេសកម្ពុជា លោកថោង ខុន ធ្លាប់មានប្រសាសន៍ថា កាលពីអំឡុងឆ្នាំ២០១០ កន្លងទៅ ប្រទេសកម្ពុជាបានទទួលភ្ញៀវទេសចរសរុបប្រមាណជាង២លាននាក់ និងនាំមកនូវចំណូលប្រមាណជាង១.៧០០លានដុល្លារអាមេរិកផងដែរ ប៉ុន្តែចំណូលប្រមាណ២៥ភាគរយត្រូវធ្លុះធ្លាយទៅវិញតាមរយៈការនាំចូលនូវផលិតផលមួយចំនួនដូចជាពងមាន់ ពងទា បន្លែ ត្រី សាច់ និងវត្ថុអនុស្សាវរីយ៍ពីប្រទេសក្បែរខាងរួមមានវៀតណាម និងថៃជាដើម។
ថ្លែងនៅក្នុងពិធីបើកការដ្ឋានសួនបន្លែសរីរាង្គនេះ លោកប៊ុន ណារិទ្ធិ អគ្គនាយកអាជ្ញាធរអប្សរាមានប្រសាសន៍ថា សួនបន្លែធម្មជាតិដំបូងមួយនេះបង្កើតឡើងក្រោមកិច្ចសហប្រតិបត្តិការរវាងអាជ្ញាធរអប្សរាក្នុងនាមសេនាធិការរបស់រដ្ឋាភិបាលកម្ពុជា ជាមួយភាគីក្រុមហ៊ុន «SAIGON INVESTMENT CONSTRUCTION & COMMERCE CO.LTD (SICC)»នៃសាធារណរដ្ឋសង្គមនិយមវៀតណាម ដែលគ្រោងចំណាយទឹកប្រាក់រហូតដល់ទៅ៦៦១.០០០ដុល្លារអាមេរិក ក្នុងនោះ SICC វិនិយោគនូវទឹកប្រាក់ចំនួន២២៥.០០០ដុល្លារ ដោយចាប់ផ្តើមពីជំហានដំបូងលើផ្ទៃដី៥ហិកតា និងបន្តពង្រីកជាបណ្តើរៗឱ្យបាន១០០ហិកតា។
លោកអគ្គនាយកបានបន្ថែមថា តាមរយៈកិច្ចខិតខំប្រឹងប្រែងនេះ វានឹងនាំមកឱ្យប្រជាពលរដ្ឋដែលរស់នៅក្នុងតំបន់ក៏ដូចជាក្រៅតំបន់អភិវឌ្ឍន៍ភូមិធម្មជាតិរុនតាឯក អាចទទួលបានបច្ចេកទេសថ្មី និងបទពិសោធន៍ថ្មីសម្រាប់យកទៅពង្រីកការដាំដុះក្នុងគ្រួសារ ដែលជាឱកាសបង្កើនប្រភពចំណូលគ្រួសារបានតាមរយៈការលក់កសិផលដែលមានគុណភាពទៅកាន់ទីផ្សារទេសចរណ៍សៀមរាបទាំងមូល ៕
ចែករំលែកព័តមាននេះ