ខេត្តសៀមរាប ៖ កាលពីថ្ងៃទី១៥ ខែមិថុនា ឆ្នាំ២០២៣ កម្លាំងសមត្ថកិច្ចនគរបាលខេត្តសៀមរាមបានធ្វើការឃាត់ខ្លួនជនសង្ស័យជាជនជាតិវៀតណាមម្នាក់ ពាក់ព័ន្ធឆបោក ដោយបម្រុងលេងប៉ាហ៊ី យកលុយដុល្លារក្លែងក្លាយចំនួន៥ម៉ឺនដុល្លារ មកដូរលុយថៃជាងមួយលានបាត…
ខេត្តសៀមរាប ៖ កាលពីថ្ងៃទី១៥ ខែមិថុនា ឆ្នាំ២០២៣ កម្លាំងសមត្ថកិច្ចនគរបាលខេត្តសៀមរាមបានធ្វើការឃាត់ខ្លួនជនសង្ស័យជាជនជាតិវៀតណាមម្នាក់ ពាក់ព័ន្ធឆបោក ដោយបម្រុងលេងប៉ាហ៊ី យកលុយដុល្លារក្លែងក្លាយចំនួន៥ម៉ឺនដុល្លារ មកដូរលុយថៃជាងមួយលានបាត តែល្បិចកលទុច្ចរិតជាក់ស្តែងនោះទើបជាប់អន្ទាក់របស់សមត្ថកិច្ច ។
ជនសង្ស័យឈ្មោះ ឡេវ ទេវ ភេទប្រុស អាយុ៤១ឆ្នាំ ជនជាតិវៀតណាម មានទីលំនៅភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប ។
ការឃាត់ខ្លួនជនសង្ស័យខាងលើនេះត្រូវបានសមត្ថកិច្ចបង្ហើបឲ្យដឹងថា នៅថ្ងៃទី១៣ ខែមិថុនា ឆ្នាំ២០២៣ ជនសង្ស័យបាននិយាយប្រាប់ជនរងគ្រោះឈ្មោះ ស៊ិន សូភី ភេទប្រុស អាយុ៤៨ឆ្នាំ ដែលរស់នៅភូមិមណ្ឌល៣ សង្កាត់ស្លក្រាម ក្រុង.ខេត្តសៀមរាប ជាមួយគ្នាថារូបគេបានស្គាល់អ្នករកស៊ីនៅប្រទេសថៃម្នាក់មានប្រាក់ដុល្លារយ៉ាងច្រើន ហើយគេត្រូវការយកប្រាក់នោះមកប្តូរជាប្រាក់បាតវិញ ដោយអត្រាប្តូរប្រាក់របស់គេ គឺប្រាក់ដុល្លារចំនួន៥០០០០ ដុល្លារ (ប្រាំម៉ឺនដុល្លារអាមេរិក) គេយកមកប្តូរប្រាក់បាតតែចំនួន១២០៥០០០ (មួយលានពីរ សែនប្រាំពាន់បាត) ទេ ។
សមត្ថកិច្ចឲ្យដឹងទៀតថា ដោយមើលឃើញពីផលចំណេញខ្ពស់បែបនេះ នៅថ្ងៃទី១៤ ខែមិថុនា ឆ្នាំ២០២៣ ជនរងគ្រោះបានយកប្រាក់ផ្ទាល់ខ្លួនចំនួន៣៦០៥៤.២២ ដុល្លារ (បីម៉ឺនប្រាំមួយពាន់ហាសិបបួនដុល្លារចុចម្លៃពីរសេន) ទៅប្តូរប្រាក់នៅទីតាំងយី ហោ ហ៊ុយ គាំង ផ្សារលើ ដើម្បីប្តូរយកប្រាក់បាតចំនួន១,២០៥,០០០B (មួយលានពីរសែនប្រាំពាន់បាត) ហើយទៅអង្គុយរងចាំជនសង្ស័យមុនជាស្រេច ។
លុះដល់វេលាម៉ោង៣រសៀល ថ្ងៃទី១៥ ខែមិថុនា ឆ្នាំ២០២៣ ជនសង្ស័យ (ឡេវ ទេវ) បាននាំជនរងគ្រោះឈ្មោះ ស៊ិន សូភី និងម្នាក់ទៀតទៅជួបម្ចាស់ប្រាក់ដែលនៅចាំត្រង់ចំណតរថយន្តមុខប្រាសាទអង្គរតូច ពេលនោះភាគីទាំង២ក៏បានជួបគ្នាដែលមានមនុស្សតែចំនួន៣នាក់ (ជនជាតិខ្មែរ២នាក់ និងជនជាតិថៃម្នាក់) ដើម្បីចូលរាប់ប្រាក់នៅក្នុងរថយន្ត ដែលគេបានវេចខ្ចប់ដាក់ក្នុងសាមីក្រដាសA4 ពណ៌ លឿងនៅបាំងខាងក្រោយ ។
ពេលរាប់លុយភាគីរងគ្រោះបានពិនិត្យផ្ទៀងផ្ទាត់ច្បាស់លាស់អស់ហើយ ពិតជាប្រាក់សុទ្ធរបស់គេមែន មានចំនួន៥០ ០០០ ដុល្លារអាមេរិក និងគ្រប់ចំនួនដូចបានធានាអះអាងតាមរយៈទូរស័ព្ទ ។
ភ្លាមនោះឈ្មោះ មួន មាឌ និងមនុស្សម្នាក់ទៀតជាអ្នកកាន់កញ្ចប់ប្រាក់(ជាជនជាតិថៃ) បាននាំគ្នាដើរសំដៅទៅយកប្រាក់ពីជនរងគ្រោះឈ្មោះ ស៊ិន សូភី ដែលចតរថយន្តនៅចាំប្រហែល៥០ម៉ែត្រ លុះពេលចេញទៅបានប្រហែល១០ម៉ែត្រ ស្រាប់តែជនជាតិថៃបានត្រឡប់មកក្រោយវិញ រួចទៅឈរចាំក្បែររថយន្ត ពេលនោះឈ្មោះ មួន មាឌ បានយកកញ្ចប់ប្រាក់បាតប្រគល់ឲ្យទៅជនជាតិថៃ ហើយថៃក៏បានប្រគល់កញ្ចប់ប្រាក់ដុល្លារឲ្យមកឈ្មោះ មួន មាឌ ហើយជនសង្ស័យក៏បានបិតទ្វារថយន្តបើកគេចខ្លួនតែម្តងទៅ ។
ពេលជនសង្ស័យចេញទៅផុតនោះឈ្មោះ មួន មាឌ និងឈ្មោះ ស៊ិន សូភី មិនអស់ចិត្តបានបើកកញ្ចប់ប្រាក់នោះពិនិត្យមើលម្តងទៀតទើបដឹងថា ជាប្រាក់ក្លែងក្លាយទាំងអស់ (កញ្ចប់ប្រាក់ត្រូវបានគេលួចប្តូរ) តែយ៉ាងណាជនរងគ្រោះក៏បានធ្វើការឃាត់ជនសង្ស័យឈ្មោះ ឡេវ ទេវ ប្រគល់ឲ្យមកសមត្ថកិច្ច ដើម្បីចាត់ការតាមផ្លូវច្បាប់ដែរ ៕
ចែករំលែកព័តមាននេះ