ខេត្តកណ្តាល ៖ ក្រុមគ្រួសារយំទួញសោកអាឡោះអាល័យស្តាយស្រណោះកូនប្រុសជាទីស្រលាញ់ដែលទៅធ្វើការនៅកំពង់ផែដែកមេគង្គ ក៏ត្រូវបានដែកធ្លាក់សង្កត់លើបណ្ដាលឲ្យដាច់ខ្យល់ស្លាប់ភ្លាមៗនៅនឹងកន្លែង ដែលកើតហេតុ កើតឡើងកាលពីវេលាម៉ោង២ និង៣០នាទីរសៀលថ្ងៃទី០៧ មិថុនា ឆ្នាំ២០២៣ ស្ថិតនៅក្នុងផែដែកមេគង្គ(អតីតរោងចក្រក្តារបន្ទះ)…
ខេត្តកណ្តាល ៖ ក្រុមគ្រួសារយំទួញសោកអាឡោះអាល័យស្តាយស្រណោះកូនប្រុសជាទីស្រលាញ់ដែលទៅធ្វើការនៅកំពង់ផែដែកមេគង្គ ក៏ត្រូវបានដែកធ្លាក់សង្កត់លើបណ្ដាលឲ្យដាច់ខ្យល់ស្លាប់ភ្លាមៗនៅនឹងកន្លែង ដែលកើតហេតុ កើតឡើងកាលពីវេលាម៉ោង២ និង៣០នាទីរសៀលថ្ងៃទី០៧ មិថុនា ឆ្នាំ២០២៣ ស្ថិតនៅក្នុងផែដែកមេគង្គ(អតីតរោងចក្រក្តារបន្ទះ) ក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល ។
ជនរងគ្រោះមានឈ្មោះ សង បូរ៉ាមី ភេទប្រុស អាយុ២៩ឆ្នាំ ជនជាតិខ្មែរ ជាកម្មករនៅកំពង់ផែដែកមេគង្គខាងលើ «នៅលីវ» មានទីលំនៅភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល ។ ប្រភពនិយាយថា មុនពេលកើតហេតុ ជនរងគ្រោះនិងកម្មករ២នាក់ទៀត កំពុងជីកដីនៅខាងក្រៅរបងក្រុមហ៊ុន ។ លុះដល់ពេលមេឃភ្លៀង ជនរងគ្រោះបានរត់ចូលមកក្នុងឃ្លាំងស្តុកដែក ជ្រកភ្លៀង រីឯកម្មករ២នាក់ទៀតដែលជីកដីជាមួយគ្នាក៏ចូលមកជ្រកភ្លៀងក្នុងឃ្លាំងនោះដែរ ប៉ុន្តែអង្គុយនៅកៀនជញ្ជាំងម្ខាង ។
ខណ:នោះ គេឃើញជនរងគ្រោះងើបដើរទៅទាញក្តារនៅជិតកាប៊ីនភ្លើងបំណងយកមកទ្រាប់គូទអង្គុយ តែមិនទាន់បានអង្គុយផង ក៏ត្រូវដែកមួយដុំធំទម្ងន់ប្រហែលរាប់តោនធ្លាក់ពីលើសង្កត់ជនរងគ្រោះចំស្មាខាងឆ្វេងសង្កត់ផ្ទប់ជាប់ទៅនឹងស៊ីម៉ង់ត៍តែម្តង។ ឃើញដូច្នេះ កម្មករ២នាក់បានរត់ទៅហៅមេការយកគ្រឿងចក្រមកស្ទូចយកដែកចេញ ដើម្បីបំណងជួយសង្គ្រោះយកទៅមន្ទីរពេទ្យ តែជាអកុសលជរងគ្រោះបានដាច់ខ្យល់ស្លាប់បាត់បង់ជីវិតនៅនឹងកន្លែងកើតហេតុបាត់ទៅហើយ ក៏រាយការណ៍ជូនទៅសមត្ថកិច្ចនគរបាលអោយមកធ្វើការពិនិត្យ ។
ជុំវិញករណីនេះ លោកវរសេនីយ៍ វែង កុសល អធិការរងនគរបាលទទួលផែនព្រហ្មទណ្ឌស្រុកកៀនស្វាយ បានប្រាប់ភ្នាក់ងារកោះសន្តិភាពអោយដឹងតាមទូរស័ព្ទ កាលពីព្រឹកថ្ងៃទី០៨ ខែមិថុនា ឆ្នាំ២០២៣ នេះថា ជនរងគ្រោះនិងកម្មករ២នាក់ទៀត ជីកកាប់ដីនៅខាងក្រៅ ដល់ពេលមេឃភ្លៀង គាត់រត់ចូលមករុញទ្វារឃ្លាំងស្តុកដែករបស់ផែដែលគេបិទចោលចូលមកជ្រកភ្លៀង ចៃដន្យក៏ត្រូវដែកធ្លាក់សង្កត់លើស្លាប់តែម្តងទៅ ។
ក្រោយពិនិត្យរួច សមត្ថកិច្ចបានធ្វើកំណត់ហេតុប្រគល់សពជូនក្រុមគ្រួសារដឹកយកទៅធ្វើបុណ្យតាមប្រពៃណីក្រោមការជួយឧបត្ថម្ភពីក្រុមហ៊ុនកំពង់ផែមេគង្គ។ ចំពោះឈ្មោះថៅកែសមត្ថកិច្ច
ថា មិនស្គាល់ទេ តែបើតាមប្រភពព័ត៌មាននិយាយថា ដីកំពង់ផែមេគង្គនេះ ជារបស់យាយភូ ។ ចំណែកខាងរដ្ឋបាលកំពង់ផែមេគង្គវិញបានប្រាប់អោយដឹងដែរថា ជនរងគ្រោះនិងកម្មករ២នាក់ ដែលកាប់ដីនៅខាងក្រៅនោះ ពិតជាកម្មកររបស់កំពង់ផែមេគង្គពិតប្រាកដមែន ប៉ុន្តែនៅថ្ងៃនោះ ពួកគាត់៣នាក់ធ្វើការជីកដីនៅខាងក្រៅទេ តែដល់ពេលមេឃភ្លៀងគាត់ក៏រត់ទៅរុញទ្វារឃ្លាំងស្តុកដែក ដែលបិទទុកចោលមិនមានបុគ្គលិកធ្វើការនោះទេ តែចៃដន្យក៏ត្រូវដែកធ្លាក់សង្កត់ស្លាប់
ទៅ ។
ទោះជាយ៉ាងណា ខាងក្រុមហ៊ុនមិនព្រងើយកន្តើយនោះទេ ជំហ៊ានទី១ក្រុមហ៊ុននឹងជួយចូលរួមរំលែកទុក្ខនូវថវិកាចំនួន២០០០$(ពីរពាន់ដុល្លារ)អោយទៅក្រិមគ្រួសារសព និងរាល់ការចំណាយធ្វើបុណ្យសពគឺខាងក្រុមហ៊ុនចេញអោយទាំងអស់ ។ ហើយខាងក្រុមហ៊ុនធានារ៉ាប់រងបានវាយតម្លៃទៅតម្រូវអោយខាងក្រុមហ៊ុនបង់លុយជូនទៅគ្រួសារជនរងគ្រោះប៉ុន្មាន គឺខាងក្រុមហ៊ុននឹងប្រគល់ជូនទៅតាមហ្នឹង ព្រោះជនរងគ្រោះគាត់មាន ។ អ្នកគ្រប់គ្រងរដ្ឋបាលបានបញ្ជាក់អះអាងថា កំពង់ផែនេះមិនមែនជារបស់យាយលឹមនោះទេ សូមកុំយកឈ្មោះគេមកប៉ះពាល់ ។
សូមបញ្ជាក់ថា នៅតាមបណ្តោយផ្លូវជាតិលេខ១ ក្នុងស្រុកកៀនស្វាយនេះ មានកំពង់ផែឯកជននាំទំនិញតាមផ្លូវទឹកពីប្រទេសវៀតណាម យកមកស្តុកទុកជាច្រើនកន្លែង ប៉ុន្តែមើលទៅសង្ស័យហាក់បីដូចជាគ្មានមន្ត្រីគយ ឬមន្ត្រីជំនាញស្ថាប័នផ្សេងទៀតនៅប្រចាំការ ដើម្បីធ្វើការត្រូតពិនិត្យរាល់ទំនិញចូលពីប្រទេសជិតខាងនោះឡើយ ដែលជាហេតុអោយបាត់បង់ចំណូលថវិកាជាតិធ្ងន់ធ្ងរ តែវាមានប្រយោជន៍ឯកជន ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ