ព្រលឹមអុលឡើងជុំគ្នានៅហាងកាហ្វេមួយ ភាគច្រើនជាមន្ត្រីបម្រើការងារនៅសាលាដំបូងរាជធានីភ្នំពេញ ជាអ្នកលេងតុងទីនចង់បានការប្រាក់ តែក៏បានធ្លាក់ខ្លួនត្រូវមេវេចលុយរត់ជាងកន្លះឆ្នាំមកហើយ ហើយអង្គុយរអ៊ូរទាំរាល់ព្រឹក រឿងដីកា
រាជធានីភ្នំពេញ ៖ ព្រលឹមអុលឡើងជុំគ្នានៅហាងកាហ្វេមួយ ភាគច្រើនជាមន្ត្រីបម្រើការងារនៅសាលាដំបូងរាជធានីភ្នំពេញ ជាអ្នកលេងតុងទីនចង់បានការប្រាក់ តែក៏បានធ្លាក់ខ្លួនត្រូវមេវេចលុយរត់ជាងកន្លះឆ្នាំមកហើយ ហើយអង្គុយរអ៊ូរទាំរាល់ព្រឹក រឿងដីកា២ច្បាប់ចេញដោយចៅក្រមស៊ើបសួរ បង្គាប់ទៅសមត្ថកិច្ចឲ្យតាមចាប់ខ្លួនមេតុងទីនរូបនោះ ហាក់បីដូចជាមានសង្ឃឹមដែរ តែសង្ឃឹមតិចៗ។
បើតាមកូនតុងទីនខ្លះបាននិយាយថា «វាគ្មានទៅណាទេ គឺសម្ងំនៅក្នុងផ្ទះបងប្អូន ការពារ ដោយសាច់ញាតិជាអ្នកធំនៅក្នុងរាជធានីភ្នំពេញហ្នឹង ដែលមិនអាចធ្វើឲ្យសមត្ថកិច្ចហ៊ានចូលទៅចាប់»។ អ្នកខ្លះទៀតនិយាយថា «មេតុងទីននោះ វេចលុយជិតកន្លះលានដុល្លារ រត់ទៅរស់នៅតាមខេត្តដាច់ស្រយ៉ាល ដោយមានការលាក់បំពូនមិនអាចមានអ្នកណាដឹង ម្ល៉ោះហើយបានជាធ្វើឲ្យជួបផលលំបាកដល់មន្ត្រីនគរបាលអនុវត្តច្បាប់។ ប៉ុន្តែបើគេចង់ចាប់មិនពិបាកទេ អំណាចដីកាបង្គាប់ឲ្យចាប់ខ្លួន មានវិសាលភាពទូលំទូលាយដល់សមត្ថកិច្ច តែខ្លាចដឹងហើយធ្វើមិនដឹង ជាហេតុធ្វើឲ្យកូនតុងទីនទាំងអស់នៅតែទន្ទឹងរង់ចាំការចាប់ខ្លួនមេតុងទីនបោ.កប្រាក់ពួកគេជិតកន្លះលាននោះ កំពុងរស់នៅសោយសុខតទៅទៀត»។
សូមជម្រាបថា ចៅក្រមស៊ើបសួរសាលាដំបូងរាជធានីភ្នំពេញ កាលពីកន្លងទៅ បានចេញដីកាចំនួន២ច្បាប់ បង្គប់ឲ្យសមត្ថកិច្ចតាមរកចាប់ខ្លួនមេតុងទីនម្នាក់ដែលវេចលុយសមាជិក «កូនតុងទីន» ប្រមាណជាង៦០នាក់ ស្មើនឹងទឹកប្រាក់ជិតកន្លះលានដុល្លារអាមេរិក ហើយព្យាយាមគេចខ្លួនរាប់ខែមកហើយនោះ។
តាមដីកាបង្គាប់ឲ្យចាប់ខ្លួន២ច្បាប់របស់លោក ស សំណាង ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់ថា ឈ្មោះ ហួយ វត្តនី ភេទស្រី អាយុ៣៥ឆ្នាំ មានទីលំនៅភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ត្រូវបានតំណាងអយ្យការធ្វើការចោទប្រកាន់ពីបទ.ឆបោ.ក ដែលប្រព្រឹត្តនៅរាជធានីភ្នំពេញ កាលពីថ្ងៃទី១ ទី១៤ ខែមីនា និងថ្ងៃទី១៥ ទី១៧ ខែកញ្ញា ឆ្នាំ២០២២ តាមបញ្ញត្តិមាត្រា៣៧៨ នៃក្រមព្រហ្មទណ្ឌ។
កាលពីកន្លងផុតទៅ នៅលើបណ្តាញសង្គមហ្វេសប៊ុក គេបានសង្កេតឃើញមានការបង្ហោះព័ត៌មានចែកចាយបន្តគ្នាអំពីករណីមេតុងទីនម្នាក់បានវេចលុយជិតកន្លះលានដុល្លារអាមេរិករត់គេចខ្លួន ធ្វើឲ្យកូនតុងទីនប្រមាណជាង៦០នាក់កំពុងតែរងទឹកភ្នែកជូតក្បាលជង្គង់ ដែលអ្នកខ្លះអស់ទាំងប្រាក់ខែ អ្នកខ្លះអស់ទាំងលុយខំរកស៊ីលក់ដូរបន្តិចបន្តួច យកមកលេងតុងទីនជាមួយមេ ដើម្បីសន្សំទុក និងចង់បានការប្រាក់។
តាមសំណេរអ្នកលេងបណ្តាញសង្គម ដែលបង្ហោះភ្ជាប់ជាមួយរូបថតមេតុងទីនថា (នេះជាមេតុងទីនមួយរូបឈ្មោះ ហួយ វត្តនី ភេទស្រី អាយុ៣៦ឆ្នាំ ធ្វើមេតុងទីននៅក្នុងស្ថាប័នមួយ ហើយបានឆបោ.កលុយកូនតុងទីនពេញមួយស្ថាប័ននោះ អស់ប្រាក់រាប់សិបម៉ឺនដុល្លារ ដោយបានវេចលុយកូនតុងទីនទាំងអស់នោះរត់គេចបាត់តាំងពីថ្ងៃទី១០ ខែធ្នូ ឆ្នាំ២០២២ មកម្ល៉េះ ដែលធ្វើឲ្យកូនតុងទីនម្នាក់ៗដេកឈឺចាប់ និងទឹកភ្នែកជូតក្បាលជង្គង់។ ចំណែកមេបានវេចលុយកូនយកទៅសង្ងំសុខតែម្នាក់ឯង នេះជាស្រីដែលចង្រៃបំផុត ដែលមិនយល់ពីការឈឺចាប់របស់គេឡើយ)។ (ឈ្មោះ អឿន ម៉ូនីការ ជាមេតុងទីនម្នាក់ដែលគេចាប់បាន ចុះហេតុអីឈ្មោះ ហួយ វត្តនី គេចាប់មិនបាន ឬមួយមានគេនៅពីក្រោយខ្នង? តើម្នាក់នោះជាអ្នកណា? បញ្ជាក់ខ្ញុំមិនសំដៅទៅលើអ្នកណាទេ ចឹងបើអ្នកមិនពាក់ព័ន្ធកុំចេញមុខមកអី)។
តាមប្រភពព័ត៌មានពីកូនតុងទីនម្នាក់ ក្នុងចំណោមអ្នកលេងតុងទីនជាង៦០នាក់ បានសម្តែងនូវការឈឺចាប់បំផុត ចំពោះល្បិចកលឆ.បោ.ករបស់មេតុងទីនឈ្មោះ ហួយ វត្តនី ដែលវេចលុយរត់ ហើយមិនត្រូវបានចាប់ខ្លួននាំមកឲ្យទទួលខុសត្រូវចំពោះមុខច្បាប់លើទង្វើដែលគេប្រព្រឹត្ត ។
ប្រភពព័ត៌មានដដែលបានឲ្យដឹងថា មេតុងទីនឈ្មោះ ហួយ វត្តនី ជាមន្ត្រីបម្រើការងារនៅស្ថាប័នអយ្យការ នៃសាលាដំបូងរាជធានីភ្នំពេញ មានអាសយដ្ឋានផ្ទះលេខF៤E០ ផ្លូវបេតុង ស្ថិតក្នុងភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។ ហើយកាលពីថ្ងៃទី១៤ ខែមីនា ឆ្នាំ២០២២ បុគ្គលឈ្មោះ ហួយ វត្តនី បានប្រមូលមន្ត្រីបម្រើការងារនៅអង្គភាពជាមួយគ្នាលេងតុងទីនចំនួន៥ខ្សែ ដោយក្នុង១ខ្សែមានទឹកប្រាក់ចំនួន២០០ដុល្លារអាមេរិក ហើយមួយខែដេញម្តង ក្រោយពេលបើកប្រាក់ខែរៀងៗខ្លួន។
ប្រភពព័ត៌មានបន្តថា ដំបូងការលេងតុងទីននោះ គឹមានការជឿទុកចិត្តគ្នាណាស់ នៅពេលដល់ខែដេញតុងទីនម្តងៗ កូនបង់ឲ្យមេ ហើយមេក៏បានប្រគល់ប្រាក់ឲ្យទៅកូនណាដែលដេញបានគ្រប់ចំនួនដែរ។ ប៉ុន្តែមួយរយៈចុងក្រោយនេះ មេមានកាន់ឈ្មោះខ្មោច រួចដេញបានប្រាក់ប្រមាណជិតកន្លះលានដុល្លារអាមេរិក ក៏រត់គេចខ្លួនបាត់ទៅ។ ក្រោយពេលដឹងថា មេតុងទីនវេចលុយជិតកន្លះលានដុល្លាររត់គេចខ្លួនហើយ កូនតុងទីនបានដាក់ពាក្យបណ្តឹងចូលស្ថាប័នអយ្យការអមសាលាដំបូងរាជធានីភ្នំពេញ ពីបទ.ឆបោ.ក និងរំលោ.ភលើទំនុកចិត្ត ដើម្បីចាត់ការលើបុគ្គលរូបនោះតាមនីតិវិធី ។
ម្តងនេះចាំមើលថា តើមេតុងទីនបម្រើការងារនៅសាលាដំបូង វេចលុយបុគ្គលិកមន្ត្រីអ្នករាជការ ធ្វើការនៅសាលាដំបូងដូចគ្នា គេចខ្លួនតទៅទៀតបានទេ? ក្នុងដំណាក់កាលចៅក្រមស៊ើបសួរបានចេញដីកាឲ្យចាប់ខ្លួនដល់ទៅ២ដីកានោះ ឬមានស្លាបហើរដល់ពេលណាទៀត ៕
ចែករំលែកព័តមាននេះ