ខេត្តកំពង់ស្ពឺ៖ ហេតុការណ៍​គ្រោះថ្នាក់សារាចរណ៍ បុកបន្តគ្នា រវាងរថយន្ត ៩ គ្រឿង នៅ​ផ្លូវជាតិលេខ៤ នៅចំណោតយាយម៉ៅ ពេជ្រនិល នៅរសៀល​ថ្ងៃទី៦ ខែមិថុនានេះ បាន​បណ្ដាលឱ្យស្លា.ប់ស្ត្រីម្នាក់ និងបុរស ២នាក់ រងរបួស​។

​​ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បាន​កើតឡើង នារសៀល ថ្ងៃទី០៦ ខែមិថុនា ឆ្នាំ២០២៣ នៅលើផ្លូវជាតិលេខ៤ ចន្លោះគីឡូម៉ែត្រ១០៣-១០៤ ត្រង់ចំណុចភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ​។

​សមត្ថកិច្ចនគរបាលស្រុកភ្នំស្រួច បានឲ្យដឹងថា ​ករណីគ្រោះថ្នាក់ចរាចរណ៍ពុំធ្លាប់មាននេះ បានកើតឡើង ដោយរថយន្តបុកបន្តគ្នា ០៩គ្រឿង ក្នុងដំណើរស្របទិសគ្នា បណ្តាលឲ្យគ្រោះថ្នាក់ស្លា.ប់ស្ត្រីម្នាក់ នៅកន្លែងកើតហេតុ និងបុរស​ ២នាក់ របួសធ្ងន់។ ក្នុងហេតុការណ៍​គ្រោះថ្នាក់ចរាចរណ៍នេះ បណ្ដាលឲ្យខូចខាតរថយន្ត ៩គ្រឿង។

កម្លាំង​នគរបាលចរាចរណ៍​ នៃអធិការ​ដ្ឋា​ននគរបាលស្រុកភ្នំស្រួច​ និងកម្លាំងសង្រ្គោះ​ បានទៅកន្លែងកើតហេតុ និងសម្របស​ម្រួលករណីនេះ ព្រមទាំង​ជួយសង្រ្គោះមនុស្ស។ អ្នករបួស ត្រូវបានបញ្ជូនទៅកាន់មន្ទីរពេទ្យ។ រីឯជនរងគ្រោះ ដែលបាត់បង់ជីវិត ត្រូវបាន​សមត្ថកិច្ច ធ្វើរបាយការណ៍ និងកំណត់ហេតុ ប្រគល់ឲ្យសាច់ញាតិ យកទៅធ្វើបុណ្យតាមប្រពៃណី៕ វង្ស សន