រាជធានីភ្នំពេញ ៖ អ្នកអត់លុយមួយរៀល ដើម្បីធ្វើការឃោសនាកម្មវិធីនយោបាយរបស់អ្នកមែនទេ? ទោះបីជាយ៉ាងនេះក្តីក៏អ្នកអាចឃោសនាដល់អ្នកបោះឆ្នោតបានដែរតាមរយៈយុទ្ធសាស្ត្រដ៏មានប្រសិទ្ធភាពនៃការប្រើប្រាស់បណ្តាញសង្គមដូចជា ហ្វេសប៊ុក ដើម្បីទាក់ទាញចិត្តអ្នកបោះឆ្នោត ។ បណ្តាញសង្គមក្លាយជាឧបករណ៍ឃោសនាចំណាយតិចតែមានវិសាលភាពធំ ខណៈពេលពលរដ្ឋជាច្រើនបានប្រើប្រាស់បណ្តាញសង្គម…
រាជធានីភ្នំពេញ ៖ អ្នកអត់លុយមួយរៀល ដើម្បីធ្វើការឃោសនាកម្មវិធីនយោបាយរបស់អ្នកមែនទេ? ទោះបីជាយ៉ាងនេះក្តីក៏អ្នកអាចឃោសនាដល់អ្នកបោះឆ្នោតបានដែរតាមរយៈយុទ្ធសាស្ត្រដ៏មានប្រសិទ្ធភាពនៃការប្រើប្រាស់បណ្តាញសង្គមដូចជា ហ្វេសប៊ុក ដើម្បីទាក់ទាញចិត្តអ្នកបោះឆ្នោត ។
បណ្តាញសង្គមក្លាយជាឧបករណ៍ឃោសនាចំណាយតិចតែមានវិសាលភាពធំ ខណៈពេលពលរដ្ឋជាច្រើនបានប្រើប្រាស់បណ្តាញសង្គម ដើម្បីធ្វើជំនួញក្រៅពីជាមធ្យោបាយទំនាក់ទំនង និងការកម្សាន្តសប្បាយ ។ មិនថា Facebook និងបណ្តាញសង្គមដទៃទៀតបានក្លាយជាឧបករណ៍ឃោសនារបស់មហាជនដ៏មានប្រជាប្រិយភាពនាពេលបច្ចុប្បន្ន ។ ដូច្នេះនៅក្នុងការបោះឆ្នោតនាពេលខាងមុខនេះគ្រប់គណបក្សនយោបាយមិនអាចមើលរំលងពីឧបករណ៍ឃោសនាដ៏មានសក្តានុពលនេះឡើយ ។
ការខកខានប្រើប្រាស់បណ្តាញសង្គម ដើម្បីឃោសនាអំពីកម្មវិធីនយោបាយរបស់គណបក្សនឹងមានន័យថា នឹងធ្វើអោយគណបក្សតូចៗពិបាកនៅក្នុងការស្វែងរកការគាំទ្រពីអ្នកបោះឆ្នោត ។ តាមពិត អ្នកគ្រប់អាយុបោះឆ្នោតស្ទើរទាំងអស់ដែលមានចំនួនជាង៩លាននាក់ប្រើប្រាស់បណ្តាញសង្គម ។
ផ្សព្វផ្សាយគោលនយោបាយតាមបណ្តាញសង្គមអាចមិនចំណាយថវិកាច្រើនដូចជា ជួលម៉ោងទូរទស្សន៍ វិទ្យុ និងកាសែតផ្សាយនោះឡើយ ។ ឆ្ពោះទៅការបោះឆ្នោតជ្រើសតាំងតំណាងរាស្ត្រនីតិកាលទី៧ ថ្ងៃទី២៣ ខែកក្កដា ឆ្នាំ២០២៣ ហើយមិនខុសពីការបោះឆ្នោតមុនៗ គណៈកម្មាធិជាតិរៀបចំការបោះឆ្នោតបានបង្កើតកម្មវិធីសមធម៌លើកញ្ចក់ទូរទស្សន៍ និងវិទ្យុ ដើម្បីឱ្យគណបក្សនយោបាយធ្វើការឃោសនារកសំឡេងឆ្នោតក្នុងការផ្សព្វផ្សាយកម្មវិធីនយោបាយរបស់ខ្លួន ទៅអ្នកបោះឆ្នោតស្មើរៗភាពគ្នា ។ ប៉ុន្តែកម្មវិធីដែលផ្តល់ដោយគជបនោះ មិនគ្រប់គ្រាន់ទេពោលគណបក្សនីមួយៗតែងតែបង្កើតកម្មវិធី និងមធ្យោបាយឃោសនា រកសំឡេងឆ្នោតទៅតាមលទ្ធភាពរបស់ខ្លួនផ្សេងទៀត ។
ការឃោសនាតាមបណ្តាញសង្គម ត្រូវគេមើលឃើញថា ចំណាយថវិកាតិចមានប្រសិទ្ធិភាព ជាងការផ្សព្វផ្សាយតាមប្រព័ន្ធព័ត៌មាន ទម្រង់ចាស់ មានវិទ្យុ កាសែត និងទូរទស្សន៍នោះ ។ លើសពីនេះសារនយោបាយផ្សាយតាមបណ្តាញសង្គម មានលក្ខណៈទូលំទូលាយ គណបក្សនយោបាយអាចផលិតសារបានដោយសេរីច្រើនទម្រង់តាមតែខ្លួនចង់បាន ។
ជាទម្លាប់នៅក្នុងការស្វែងរកសំឡេងឆ្នោតគណបក្សនយោបាយបានធ្វើយុទ្ធនាការច្រើនទម្រង់ដូចជា ចុះតាមផ្ទះពលរដ្ឋ ផលិតខិតបណ្ណបិទ និងចែកចាយតាមទីសាធារណៈផ្សព្វផ្សាយតាមវិទ្យុតាមទូរទស្សន៍ ចូលរួមកម្មវិធីនានា ដែលរៀបចំដោយសង្គមស៊ីវិល និងប្រព័ន្ធផ្សព្វផ្សាយ ហើយយុទ្ធនាការឃោសនារកសំឡេងឆ្នោតធំ គឺដង្ហែជាក្បូនតាម ការអនុញ្ញាតរបស់គជប ។ បន្ថែមលើនេះ គេក៏មិនត្រូវភ្លេចការឃោសនាតាម បណ្តាញសង្គមផងដែរ ។
យុទ្ធនាការឃោសនាធ្វើឡើងតាមលទ្ធភាព និងធនធានថវិការបស់គណបក្សនីមួយៗ ។ គណបក្សមានថវិកាច្រើនមានអ្នកគាំទ្រច្រើនគេរៀបចំសកម្មភាពក្នុងទ្រង់ទ្រាយគគ្រឹកគគ្រេង ដើម្បីបង្ហាញពីប្រជាប្រិយភាពរបស់គេ ។ គណបក្សចូលរួមបោះឆ្នោតមិនមានធនធានថវិកា ដូចគ្នានោះទេ ដូច្នេះយុទ្ធនាការឃោសនាធ្វើតាមលទ្ធភាពរៀងៗខ្លួន។
គណបក្សខ្លះមានថវិកាបូរិណ៌ សម្រាប់ជួលម៉ោងវិទ្យុជួលម៉ោងទូរទស្សន៍ផ្សាយ ខណៈគណបក្សខ្លះទៀតពឹងតែលើកម្មវិធីគជប ។ បណ្តាញសង្គមទំនងផ្តល់ភាពយុត្តិធម៌ និងស្មើភាពដល់គ្រប់គណបក្សឱ្យតែពួកគេចេះទាញអត្ថប្រយោជន៍ពីវាហើយមានធនធានមនុស្សគ្រប់គ្រាន់ ដើម្បីប្រើប្រាស់វា ។ ការផ្សព្វផ្សាយតាមបណ្តាញសង្គមគ្មានការកំណត់ពេលវេលាថា យប់ឬថ្ងៃ និងនៅកន្លែងណានោះទេ ហើយសូម្បីតែអ្នកអត់លុយមួយរៀលក៏អ្នកអាចធ្វើបានដែរ ។ ដូច្នេះអោយតែអ្នកមានកម្មវិធីនយោបាយល្អ អ្នកអាចបញ្ជ្រាបកម្មវិធីនយោបាយរបស់អ្នកទៅកាន់អ្នកបោះឆ្នោតជាង៩លាននាក់តាមរយៈការប្រើប្រាស់ហ្វេសប៊ុក និងបណ្តាញសង្គមផ្សេងទៀត ៕ ដោយ សារ៉ាន់
ចែករំលែកព័តមាននេះ