កម្តៅខ្លាំងគ្របដណ្តប់ភាគខាងត្បូងប្រទេសចិន កំពុងជះឥទ្ធិពលលើថាមពលអគ្គិសនី
ប្រទេសចិន ៖ រលកកម្តៅមិនឈប់ឈរពេញមួយខែឧសភា បានសាយភាយនៅភាគខាងត្បូង និង
ប្រទេសចិន ៖ រលកកម្តៅមិនឈប់ឈរពេញមួយខែឧសភា បានសាយភាយនៅភាគខាងត្បូង និងភាគខាងកើតប្រទេសចិនជាច្រើនសប្តាហ៍ ដោយបានជះឥទ្ធិពលយ៉ាងខ្លាំងលើបណ្តាញថាមពលអគ្គិសនី ខណៈដែលតម្រូវការម៉ាស៊ីនត្រជាក់បានកើនឡើង នៅក្នុងទីក្រុងធំៗដូចជាទីក្រុងស៊ាងហៃជាដើម។ នេះបើយោងប្រភពពីសារព័ត៌មាន Reuters ចេញផ្សាយកាលពីថ្ងៃទី០២ ខែមិថុនា កន្លងទៅ។
ក្នុងរយៈពេលប៉ុន្មានថ្ងៃខាងមុខ ភាគច្រើននៃភាគខាងត្បូងប្រទេសចិន ត្រូវបានរំពឹងថា នឹងទទួលរងឥទ្ធិពលកម្តៅដោយសីតុណ្ហភាពលើសពី ៣៥អង្សាសេ ជាមួយនឹងសីតុណ្ហភាពនៅក្នុងតំបន់មួយចំនួនលើសពី ៤០អង្សាសេ។ នេះបើយោងទិន្នន័យពីអ្នកជំនាញព្យាករណ៍ជាតិ កាលពីថ្ងៃទី០២ ខែមិថុនា កន្លងទៅ។
ដូចផ្នែកជាច្រើននៃតំបន់អាស៊ីដែរ ប្រទេសចិនត្រូវបានឡោមព័ទ្ធដោយអាកាសធាតុក្តៅខ្លាំងក្នុងប៉ុន្មានសប្តាហ៍ថ្មីៗនេះ ជាក់ស្តែង កាលពីថ្ងៃទី២៩ ខែឧសភា កន្លងទៅ ទីក្រុងសៀងហៃបានស៊ូទ្រាំនឹងកម្តៅក្តៅបំផុតក្នុងខែឧសភា ដែលមិនធ្លាប់មានក្នុងរយៈពេលជាង ១០០ឆ្នាំ ខណៈដែលបណ្តាខេត្តនានានៅភាគខាងត្បូងមានកម្តៅខ្លាំង ដោយអ្នកជំនាញអគ្គិសនីបានធ្វើការតេស្តលើបណ្តាញថាមពលអគ្គិសនី ខណៈដែលតម្រូវការម៉ាស៊ីនត្រជាក់បានកើនឡើងក្នុងចំណោមអ្នកប្រើប្រាស់ក្នុងផ្ទះ ពាណិជ្ជកម្ម និងឧស្សាហកម្ម។
តម្រូវការអគ្គិសនីនៅក្នុងមជ្ឈមណ្ឌលផលិតកម្មភាគខាងត្បូង រួមទាំងខេត្តក្វាងទុង (Guangdong) បានកើនឡើងក្នុងរយៈពេលប៉ុន្មានថ្ងៃថ្មីៗនេះ ដោយក្រុមហ៊ុន China Southern Power Grid ដែលជាប្រតិបត្តិករបណ្តាញអគ្គិសនីមួយក្នុងចំណោមប្រតិបត្តិករបណ្តាញទាំងពីររបស់ប្រទេសចិន បានឃើញថា មានបន្ទុកថាមពលខ្ពស់បំផុតលើសពី ២០០លានគីឡូវ៉ាត់ ដែលនឹងជិតដល់កម្រិតខ្ពស់ជាប្រវត្តិសាស្ត្រ។
ក្នុងរយៈពេលប៉ុន្មានថ្ងៃថ្មីៗនេះ បន្ទុកថាមពលនៅខេត្តហៃណាន (Hainan) បានកើនឡើងលើសពី ៧លានគីឡូវ៉ាត់ជាលើកដំបូង ហើយក៏បានឡើងដល់កម្រិតខ្ពស់បំផុតនៅក្នុងខេត្តក្វាងស៊ី (Guangxi) ផងដែរ ជាមួយនឹងការកើនឡើងបន្ថែមទៀត ដែលរំពឹងទុកនៅក្នុងខេត្តភាគខាងត្បូងផ្សេងទៀតរួមមាន ខេត្តយូណាន (Yunnan) និងហ្គីចូវ (Guizhou) នាពេលខាងមុខនេះ។ នេះបើយោងតាមការរាយការណ៍របស់ប្រព័ន្ធផ្សព្វផ្សាយរដ្ឋចិនបានចេញផ្សាយ។
អាកាសធាតុដ៏មានឥទ្ធិពលក៏បានបង្កគ្រោះមហន្តរាយនៅភាគកណ្តាលប្រទេសចិន ក្នុងរយៈពេលប៉ុន្មានសប្តាហ៍ថ្មីៗនេះ ដោយមានភ្លៀងធ្លាក់បន្តបន្ទាប់ និងថែមទាំងមានភ្លៀងធ្លាក់បំផ្លាញដល់ការប្រមូលផលស្រូវសាលី ដែលកំពុងបន្តរបស់ប្រទេសមួយនេះ។ នៅខេត្តហឺណាន (Henan) ដែលគេស្គាល់ថាជាឃ្លាំងដ៏សំខាន់នៃប្រទេសចិន ភ្លៀងធ្លាក់ពីមធ្យមទៅច្រើនត្រូវបានគេរំពឹងថា នឹងបន្តរហូតដល់យ៉ាងហោចណាស់ថ្ងៃទី០៤ ខែមិថុនា៕
ចែករំលែកព័តមាននេះ