បុរស២នាក់ព្រោះរឿងស៊ីផ្លេមិនឈប់ បង្កឱ្យក្លាយហិ.ង្សាវា.យតប់គ្នា និងបើករថយន្តបុកគូថរថយន្តគ្នាបង្កឱ្យក្លាយជាគ្រោះថ្នាក់ចរាចរណ៍ ហើយត្រូវសមត្ថកិច្ចចុះអន្តរាគមន៍នាំមកប៉ុស្តិ៍ ដើម្បីសាកសួរនាំ បង្កឱ្យមានការភ្ញាក់ផ្អើល
រាជធានីភ្នំពេញ ៖ បុរស២នាក់ព្រោះរឿងស៊ីផ្លេមិនឈប់ បង្កឱ្យក្លាយហិ.ង្សាវា.យតប់គ្នា និងបើករថយន្តបុកគូថរថយន្តគ្នាបង្កឱ្យក្លាយជាគ្រោះថ្នាក់ចរាចរណ៍ ហើយត្រូវសមត្ថកិច្ចចុះអន្តរាគមន៍នាំមកប៉ុស្តិ៍ ដើម្បីសាកសួរនាំ បង្កឱ្យមានការភ្ញាក់ផ្អើលកាលវេលាម៉ោង១២និង៣០នាទីយប់កណ្ដាលអធ្រាត្រឈានចូលថ្ងៃទី០៤ ខែមិថុនា ឆ្នាំ២០២៣ នៅចំណុចផ្លូវ២៩ ស្ថិតក្នុងភូមិ៥ សង្កាត់ទន្លេបាសាក់ ខណ្ឌចំការមន។
ប្រភពព័ត៌មានពីអាជ្ញាធរបានអោយដឹងថា មុនពេលកើតហេតុ ភាគីខាងបុរសម្នាក់បើករថយន្តម៉ាកឡិចស៊ីស RX៣០០ ពណ៌ទឹកប៊ិច ពាក់ស្លាកលេខ ភ្នំពេញ២AT៥៨២៩ រួមដំណើរបុរស២នាក់បើកតាមផ្លូវ២៩ ក្នុងទិសពីត្បូងទៅជើង ពេលនោះក៏មានរថយន្ត១គ្រឿងនៅពីមុខ ធ្វើបុរសបើកឡិចស៊ីសមិនអាចបើកលឿនបាន។ ក្នុងគ្រានោះដែរ ក៏មានបុរសម្នាក់ទៀតបើករថយន្តម៉ាក Ford range ពណ៌លឿងទុំ ពាក់ស្លាកលេខ ភ្នំពេញ២BL-៧៧៣៧ ឆ្នាំផលិត២០២០ បើកមកពីក្រោយរថយន្តឡិចស៊ីស ហើយគិតតែពីស៊ីផ្លេមិនឈប់នោះទេ។
អាជ្ញាធរបន្តថា បន្ទាប់មកបុរសបើករថយន្តឡិចស៊ីសក៏បានជាន់ហ្វ្រាំងរថយន្ត រួចបើកទ្វារដើរសំដៅទៅរថយន្តម៉ាក Ford range ដើម្បីសួរនាំ ហើយក៏បានចង្អុយដោយប្រើកាយវិកាយឱ្យបុរសបើករថយន្តម៉ាក Ford range ចុចកញ្ចក់រថយន្ត។ ពេលនោះបុរសបើករថយន្តម៉ាក Ford range ក៏បានចុចកញ្ចក់ចុះ ហើយក៏សួរនាំ រហូតដល់ប្រកែកគ្នា បន្ទាប់មកបុរសបើករថយន្តឡិចស៊ីសខឹងក៏បានវ៉ៃ១ដៃលើផ្ទៃមុខ។
ប្រភពដដែលបន្តទៀតថា ក្រោយមកបុរសបើករថយន្តម៉ាក Ford range ក៏បើករថយន្តទៅបុករថយន្តឡិចស៊ីស RX៣០០ ពីក្រោយរងការខូចខាត បណ្ដាលរថយន្តឡិចស៊ីសបែកកាងក្រោយ ចំណែករថយន្តម៉ាក Ford rangeវិញ ក៏ខូចខាតកាងខាងមុខផងដែរ ។ បន្ទាប់មកទៀត បុរសបើករថយន្តម៉ាក Ford range ចុះពីលើរថយន្ត រួចវា.យបុរសបើកបររថយន្តឡិចស៊ីសវិញ បណ្ដាលរងរបួសស្រាលទាំងសងខាង ទើបផ្អើលដល់សមត្ថកិច្ចចុះអន្តរាគមន៍នៅកន្លែងកើតហេតុ រួចនាំមកប៉ុស្តិ៍ទាំង២នាក់ ដើម្បីសាកសួរនាំតែម្ដងទៅ។
បើតាមសមត្ថកិច្ចបានបញ្ជាក់ថា ករណីហិ.ង្សាខាងលើនេះ គឺកើតឡើងដោយការបើកបរមិនយោគយល់គ្នារឿងចុចស៊ីផ្លេរថយន្ត ហើយភាគីទាំងសងក៏បានស្នើសុំមិនប្ដឹងទៅលើបុគ្គលណាម្នាក់ទេ ប៉ុន្តែសុំដោះស្រាយរឿងគ្រោះថ្នាក់ចរាចរណ៍។
សមត្ថកិច្ចបន្តថា ដោយបុរសឈ្មោះ អ៊ុន គឹមឈុន អាយុ២៥ឆ្នាំ មុខរបរបុគ្គលិកក្រុមហ៊ុន ស្នាក់នៅផ្ទះលេខ២២៦A ផ្លូវ៣៧បេតេ ស្ថិតក្នុងភូមិសន្សំកុសល សង្កាត់បឹងទំពន់១ ខណ្ឌមានជ័យ រាជធានីភ្នំពេញ ដែលបើករថយន្តឡិចស៊ីសយករថយន្តម៉ាក Ford range បើកដោយបុរសឈ្មោះ តាន់ តិចលី ភេទប្រុស អាយុ២៨ឆ្នាំ មុខរបរអាជីវករ ស្នាក់នៅផ្ទះលេខ១៨៤ ផ្លូវជាតិលេខ៣ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ យកទៅក្រុមហ៊ុនជួសជុលឱ្យស្អាតឡើងវិញ ហើយក៏ត្រូវបានបញ្ចប់។
សមត្ថកិច្ចបន្តទៀតថា ប៉ុន្តែកំហុសម្ចាស់រថយន្តទាំង២នាក់ខាងលើ ត្រូវបានសមត្ថកិច្ចធ្វើការផាកពិន័យតាមច្បាប់ចរាចរណ៍ផ្លូវគោក ដោយបុរសបើករថយន្តឡិចស៊ីស RX៣០០ មានជាតិអាកុល០.៥៨មីលីក្រាមក្នុង១លីត្រខ្យល់ ចំណែកបុរសបើករថយន្តម៉ាក Ford range ផ្លុំទៅឃើញ០.៥០មីលីក្រាមក្នុង១លីត្រខ្យល់ ដោយការបើកបររថយន្តមានគ្រឿងស្រវឹង ដូច្នេះក្នុងមួយម្នាក់ៗ ត្រូវធ្វើការផាកពិន័យចំនួន២លានរៀលស្មើៗគ្នា។ ហើយចំពោះរថយន្តវិញ គឺរង់ចាំស្អែក ទើបប្រគល់អោយយកប្រើប្រាស់វិញ ដោយសារអ្នកបើកបរខាងលើមានគ្រឿងស្រវឹងក្នុងខ្លួនមិនអាចបើកបរបានឡើយ ដោយអោយក្រុមគ្រួសារមកទទួលយកត្រឡប់ទៅផ្ទះវិញ។
ចែករំលែកព័តមាននេះ