- ភ្នំពេញ
រាជធានីភ្នំពេញ ៖ កូវីដ១៩ មិនទៅណាពីយើងទេ ។ វាអាចនៅវិលជុំវិញយើង ។ ដូច្នេះសូមប្រុងប្រយ័ត្ន គ្រាន់តែពេលនេះ មេរោគមួយនេះអាចមិនទាន់យាយីជីវិតយើងទាំងអស់គ្នាជាថ្មីមែន…
រាជធានីភ្នំពេញ ៖ កូវីដ១៩ មិនទៅណាពីយើងទេ ។ វាអាចនៅវិលជុំវិញយើង ។ ដូច្នេះសូមប្រុងប្រយ័ត្ន គ្រាន់តែពេលនេះ មេរោគមួយនេះអាចមិនទាន់យាយីជីវិតយើងទាំងអស់គ្នាជាថ្មីមែន ប៉ុន្តែយ៉ាងហោចណាស់ វារំខាន និងធ្វើឲ្យសុខភាពយើងចុះខ្សោយដែរ ។
តួរលេខផ្លូវការដែលប្រកាសដោយក្រសួងសុខាភិបាលឃើញថា វានៅតិចតួចនៅឡើយទេ ប៉ុន្តែទោះបីជាយ៉ាងណាយើងបានឃើញស្ថានភាពនៃការកម្រើកឡើងវិញនៃមេរោគនេះ ។ តាមសេចក្តីប្រកាសរបស់ក្រសួងសុខាភិបាលប្រចាំថ្ងៃដែលយើងបានតាមដានឃើញថា ករណីឆ្លងបានកម្រើកឡើងវិញ ក្រោយពេលដែលអាកាសធាតុនៅកម្ពុជាបានចាប់ផ្តើមប្រែប្រួលពីក្តៅមកភ្លៀង និង ខ្យល់ ពោល គឺក្រោយពេលរដូវវស្សាបានចូលមកដល់ដោយករណីឆ្លងដែលបានកត់ត្រា និងប្រកាសជាសាធារណៈឃើញថា បានឡើងដល់១០នាក់ហើយនៅក្នុងមួយថ្ងៃ ។
ក្រោយការអាក់ខាន ក្រសួងសុខាភិបាលបានប្រកាសរកឃើញករណីឆ្លងបីនាក់នៅថ្ងៃទី១៩ ខែឧសភា ហើយក៏បានបន្តរកឃើញអ្នកឆ្លងប្រចាំថ្ងៃជាបន្តបន្ទាប់ ។ រីឯចំនួនឆ្លងដែលរកឃើញ គឺមានឡើងមានចុះ ហើយចំនួនករណីឆ្លងនៅមិនទាន់ឡើងលើសពី១០នាក់នៅឡើយទេ ។ នៅថ្ងៃទី៣១ ខែឧសភា ករណីឆ្លងបានរកឃើញ១០ ករណីបន្ថែមទៀត ដោយនាំឲ្យករណីឆ្លងមេរោគកូវីដ១៩ សរុបនៅកម្ពុជាឡើងដល់១៣៨.៧៩១ នាក់ តែករណីស្លា.ប់ គឺនៅត្រឹមតែ៣.០៥៦ នាក់ដែលទេ ។
កូវីដ១៩ នៅពេលនេះត្រូវបានអង្គការសុខភាពពិភពលោកបានប្រកាសជាសាធារណៈថា លែងជាមេរោគ និងជាជំងឺដែលត្រូវប្រកាសអាសន្នកម្រិតអន្តរជាតិទៀតហើយ ចាប់ពីតាំងពីថ្ងៃទី០៥ ខែឧសភាមក ប៉ុន្តែក៏ត្រូវតែបន្តតាមដានដែរ ពីព្រោះវានៅតែជាជំងឺដែលនៅតែឆ្លង ទោះបីជាមានវ៉ាក់សាំងក៏ដោយចុះ ។
ក្រៅពីអង្គការសុខភាពពិភពលោកសម្រាប់កម្ពុជាយើងវិញ រាជរដ្ឋាភិបាលក៏បានប្រកាសដកកាតព្វកិច្ចជាច្រើនដោយរួមទាំងការពាក់ម៉ាស់ និងការតម្រូវឲ្យធ្វើតេស្តរហ័សនៅពេលមានពិធីជួបជុំធំៗតាំងពីយូរមកហើយ ។ ការពាក់ម៉ាស់ឬមិនពាក់ គឺជាសិទ្ធិរបស់បុគ្គល ហើយការធ្វើតេស្តរហ័សក៏ជាសិទ្ធិ និងការសម្រេចចិត្តរបស់បុគ្គលផងដែរ ប៉ុន្តែទោះបីជាយ៉ាងណាក៏ដោយនៅក្នុងអំឡុងពេលនេះអ្នកដែលមានអាការៈស្រដៀងនឹងអាការៈឆ្លងកូវីដ១៩ គឺមានច្រើនណាស់ ដូចជា រោគសញ្ញាគ្រុនក្តៅ ឈឺក ក្អក ហៀសំបោរ ឈឺខ្លួនប្រាណ ឈឺសាច់ដុំ អស់កម្លាំងល្ហិតល្ហៃ … ។ មួយរយៈនេះករណីបែបនេះ គឺសង្កេតឃើញថា ឆ្លងតគ្នាពីម្នាក់ទៅម្នាក់ ហើយនៅក្នុងគ្រួសារនីមួយៗ ឃើញថា មានករណីនេះច្រើនគួរសមដែរ ។ នៅក្នុងស្ថានភាពបែបនេះ សូមប្រុងប្រយ័ត្នល្អ ជាពិសេស គឺការពាក់ម៉ាស់ និង អនាម័យខ្លួនប្រាណដោយរួមទាំងការឧស្សាហ៍លាងសំអាតដៃ និងសម្លា.ប់មេរោគនឹងទឹកសាប៊ូ ឬអាកុល ។
នៅក្នុងចំណោមអ្នកដែលមានអាការៈទាំងនេះមានអ្នកខ្លះក៏បានធ្វើតេស្តរហ័ស ហើយឃើញថា ឆ្លងមេរោគកូវីដ១៩ រួចផ្សព្វផ្សាយនៅលើបណ្តាញផ្សព្វផ្សាយសង្គម ហើយខ្លះក៏បានរាយការនៅកន្លែងបម្រើការងារ ដើម្បីបានច្បាប់ឈប់សម្រាក ហើយភាគច្រើនមិនបានរាយការណ៍ទៅក្រសួងសុខាភិបាលឡើយ ។
សរុបមកវិញ ទោះបីជាមេរោគនេះ វាអាចមិនទាន់មានសមត្ថភាពសម្លា.ប់ជីវិតយើងទាំងអស់គ្នាបានឡើងវិញក៏ពិតមែន ដោយសារតែយើងទាំងអស់គ្នាសឹងតែមានវ៉ាក់សាំងគ្រប់ដូសទាំងអស់គ្នាក៏ដោយ ។ ប៉ុន្តែយើងក៏មិនអាចមើលស្រាលវាពេកដែរពីព្រោះមេរោគវាវិវត្តន៍ទៅមុខជានិច្ច ហើយថ្មីៗនេះក្រសួងសុខាភិបាលក៏ទើបតែបានចេញសេចក្តីប្រកាសព័ត៌មានរំលឹកឲ្យប្រុងប្រយ័ត្នករណីមេរោគកូវីដ១៩ថ្មី គឺពពួកមេរោគអូមីក្រុង XBB1.5 ។
ក្រសួងសុខាភិបាល បានរំលឹកពីករណីឆ្លងរហូតដល់មន្ទីរពេទ្យមួយនៅថៃដែលជាប្រទេសជិតខាងប្រកាសថា ខ្លួនបានទទួលអ្នកជំងឺកូវីដ១៩ រហូតពេញ ហើយរំលឹកប្រជាពលរដ្ឋថា មេរោគ និងជំងឺនេះមិនទៅណាទេវានៅវិលវល់ហើយប្រកាសឲ្យពលរដ្ឋបន្តរស់នៅក្នុងការប្រុងប្រយ័ត្នផ្ទាល់ខ្លួន ៕ ដោយៈ ហេង ចេស្តារ
ចែករំលែកព័តមាននេះ