នាយករដ្ឋមន្ត្រីជប៉ុន ដកតំណែងលេខាធិការពីកូនប្រុស ព្រោះតែរូបថត១សន្លឹក
ជប៉ុន ៖ នាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) បានប្រកាសថា លោកនឹងដក
ជប៉ុន ៖ នាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) បានប្រកាសថា លោកនឹងដកកូនប្រុសរបស់លោកចេញពីតំណែងលេខាធិការប្រតិបត្តិផ្ទាល់របស់លោក ចំពេលមានការផ្ទុះកំហឹងជាសាធារណៈ ជុំវិញពិធីជប់លៀងឯកជនមួយ ដែលធ្វើឡើងនៅឯនិវាសដ្ឋានផ្លូវការរបស់លោក កាលពីឆ្នាំមុន។ នេះបើយោងតាមប្រភពពីសារព័ត៌មាន Aljazeera ចេញផ្សាយកាលពីថ្ងៃទី៣០ ខែឧសភា កន្លងទៅ។
លោក ហ្វូមីអូ គីស៊ីដា បានថ្លែងប្រាប់អ្នកសារព័ត៌មានថា កូនប្រុសរបស់លោក គឺលោក សូតារ៉ូ គីស៊ីដា (Shotaro Kishida) នឹងត្រូវចុះចេញពីតំណែងជាលេខាធិការប្រតិបត្តិផ្ទាល់របស់លោក សម្រាប់កិច្ចការនយោបាយ ដោយសារតែអាកប្បកិរិយាមិនសមរម្យ។
ការផ្លាស់ប្តូរនេះ បានកើតឡើងបន្ទាប់ពីទស្សនាវដ្តី Shukan Bunshun បានបោះពុម្ពផ្សាយរូបថត ដែលបង្ហាញពីកូនប្រុសនាយករដ្ឋមន្ត្រីជប៉ុន និងសាច់ញាតិស្ថិតនៅនិវាសដ្ឋានផ្លូវការរបស់នាយករដ្ឋមន្ត្រី ដើម្បីចូលរួមពិធីជប់លៀងចុងឆ្នាំ កាលពីថ្ងៃទី៣០ ខែធ្នូ កន្លងទៅ។ រូបថតទាំងនេះបង្ហាញអំពីពួកគេឈរលើជណ្តើរកម្រាលព្រំក្រហម ដោយធ្វើត្រាប់រូបថតក្រុមគណៈរដ្ឋមន្ត្រី ដែលត្រូវបានតែងតាំងថ្មី ដោយមានលោក សូតារ៉ូ គីស៊ីដា ក្មេងជាងគេឈរនៅកណ្តាល តំណែងដែលត្រូវបានបម្រុងទុកសម្រាប់នាយករដ្ឋមន្ត្រី ខណៈដែលរូបថតផ្សេងទៀតបានបង្ហាញសកម្មភាពឈរនៅលើវេទិកាមួយដូចជាកំពុងធ្វើសន្និសីទសារព័ត៌មាន។ អាកប្បកិរិយានេះ គឺមិនសមរម្យទាល់តែសោះក្នុងនាមលោក សូតារ៉ូ គីស៊ីដា ជាអ្នកមានតួនាទីផ្លូវការជាជំនួយការផ្នែកនយោបាយ។
លោកនាយករដ្ឋមន្ត្រីជប៉ុន បានបញ្ជាក់ថា កូនប្រុសរបស់លោក នឹងត្រូវជំនួសដោយលេខាម្នាក់ទៀត គឺលោក Takayoshi Yamamoto នៅថ្ងៃទី០១ ខែមិថុនា ខាងមុខនេះ។ បន្ថែមលើសពីនេះទៀត លោកបានបន្ថែមថា លោកបានស្តីបន្ទោសកូនប្រុសយ៉ាងខ្លាំង ចំពោះអាកប្បកិរិយាមិនសមរម្យរបស់គេ។ ប៉ុន្តែទោះយ៉ាងណាក៏ដោយ ការអត្ថាធិប្បាយរបស់លោកនាយកមន្ត្រីជប៉ុន មិនអាចបំបាត់មតិរិះគន់ ដែលកំពុងបន្តពីបណ្តាសមាជិកសភាបក្សប្រឆាំង និងការខឹងសម្បារជាសាធារណៈ ដែលបានទម្លាក់ចំណាត់ថ្នាក់នៃការគាំទ្ររបស់គាត់៕
ចែករំលែកព័តមាននេះ