រាជធានីភ្នំពេញ ៖ យោងតាមសេចក្តីប្រកាសព័ត៌មានថ្ងៃទី៤ ឧសភា របស់ស្ថានទូតបារាំងបានឱ្យដឹងថា នាវាល្បាតនៃកងទ័ពជើងទឹកបារាំងឈ្មោះ «Vendémiaire» ដែលទើបមកពីប្រទេសវៀតណាម បានចូលមកសម្តែងការគួរសមនៅកំពង់ផែក្រុងព្រះសីហនុ ពីថ្ងៃទី៤ ដល់ថ្ងៃទី៨ ឧសភា មុននឹងបន្តដំណើរឆ្ពោះទៅប្រទេសថៃ
រាជធានីភ្នំពេញ ៖ យោងតាមសេចក្តីប្រកាសព័ត៌មានថ្ងៃទី៤ ឧសភា របស់ស្ថានទូតបារាំងបានឱ្យដឹងថា នាវាល្បាតនៃកងទ័ពជើងទឹកបារាំងឈ្មោះ «Vendémiaire» ដែលទើបមកពីប្រទេសវៀតណាម បានចូលមកសម្តែងការគួរសមនៅកំពង់ផែក្រុងព្រះសីហនុ ពីថ្ងៃទី៤ ដល់ថ្ងៃទី៨ ឧសភា មុននឹងបន្តដំណើរឆ្ពោះទៅប្រទេសថៃ។
ការចូលសំចតដែលបានគ្រោងទុកជាយូរមកហើយ គឺជាឱកាសមួយដើម្បីរឹតចំណងមិត្តភាពរវាងកងទ័ពជើងទឹកប្រទេសបារាំង និងកម្ពុជា តាមរយៈកម្មវិធីជួបពិភាក្សាមួយចំនួននៅមូលដ្ឋានរាម ការទស្សនាលើនាវា និងការប្រកួតកីឡាផ្សេងៗ។ បន្ទាប់ពីត្រូវបានដាក់ឱ្យប្រើប្រាស់ជាផ្លូវការនៅឆ្នាំ១៩៩៣ នាវា «Vendémiaire» ត្រូវបានដាក់ពង្រាយភ្លាមនៅក្នុងមហាសមុទ្រប៉ាស៊ីហ្វិក។
ក្នុងពេលមានសន្តិភាព នាវាល្បាតប្រភេទនេះអាចបំពេញបេសកកម្មជាច្រើនទៀតដូចជា ប្រចាំការនៅសមុទ្រដោយមានសមត្ថភាពក្នុងការល្បាត យកការណ៍ និងប្រឆាំងបទល្មើសផ្សេងៗ។ នាវានេះក៏អាចប្រើជាមធ្យោបាយដឹកជញ្ជូនទ័ព និងគ្រឿងសម្ភារសម្រាប់ការធ្វើអន្តរាគមន៍ផ្សេងៗផងដែរ ហើយវាអាចបំពេញកិច្ចការរដ្ឋលើផ្ទៃសមុទ្រមានជាអាទិ៍ ការបំពេញការងារជានគរបាលផ្នែកនាវាចរណ៍ និងឃ្លាំមើលការនេសាទ ការប្រយុទ្ធប្រឆាំងនឹងការបំពុលបរិស្ថាន និងការធ្វើសកម្មភាពមនុស្សធម៌។ ជាងនេះទៅទៀតនាវាខាងលើមានភារកិច្ចជម្លៀសពលរដ្ឋបារាំងក្នុងករណីមានគ្រោះអាសន្ន។
យោងតាមប្រភពពីលោកម៉ៃ ម៉ារិទ្ធ នាយកនាវាចរ និងកណ្ណធារនៃកំពង់ផែស្វយ័តក្រុងព្រះសីហនុបានឱ្យដឹងថា នាវាយោធា (នាវាល្បាត) របស់ប្រទេសបារាំងដែលចូលចតនៅកំពង់ផែនាពេលនេះ មានបណ្តោយប្រវែង៩៣,៣ម៉ែត្រ ទទឹង១៤ម៉ែត្រ មាននាយទាហាន និងពលទាហាន៩៣នាក់។ នាវានេះបានចូលចតកាលពីវេលាម៉ោង៩ព្រឹក ថ្ងៃទី៤ ឧសភា ហើយចាកចេញទៅវិញនៅថ្ងៃទី៨ ឧសភា ឆ្នាំ២០១១។ នាវានេះបានធ្វើដំណើរចេញពីប្រទេសវៀតណាមមកកម្ពុជា និងបន្តឆ្ពោះទៅប្រទេសថៃ។ ចំពោះគោលបំណងនៃការចូលចតនេះ គឺដើម្បីរឹតចំណងមិត្តភាពរវាងកងទ័ពជើងទឹកប្រទេសបារាំង និងកងទ័ពជើងទឹកប្រទេសកម្ពុជា តាមរយៈកម្មវិធីជួបពិភាក្សាមួយចំនួននៅមូលដ្ឋានរាម និងការទស្សនាលើនាវា និងការប្រកួតកីឡាផ្សេងៗ៕
ចែករំលែកព័តមាននេះ