សំបុត្រទស្សនាការប្រកួតឥណ្ឌូណេស៊ី ប៉ះអាហ្សង់ទីន តម្លៃទាបបំផុត៤០ដុល្លារ
ឥណ្ឌូណេស៊ី ៖ លោក Erick Thohir ប្រធានសមាគមកីឡាបាល់ទាត់ឥណ្ឌូណេស៊ី (PSSI) កាលពីថ្ងៃទី២៩
ឥណ្ឌូណេស៊ី ៖ លោក Erick Thohir ប្រធានសមាគមកីឡាបាល់ទាត់ឥណ្ឌូណេស៊ី (PSSI) កាលពីថ្ងៃទី២៩
ឥណ្ឌូណេស៊ី ៖ លោក Erick Thohir ប្រធានសមាគមកីឡាបាល់ទាត់ឥណ្ឌូណេស៊ី (PSSI) កាលពីថ្ងៃទី២៩ ខែឧសភា ឆ្នាំ២០២៣ បានប្រកាសជាផ្លូវការអំពីតម្លៃសំបុត្រចូលទស្សនាការប្រកួតមិត្តភាពអន្តរជាតិដ៏ធំ (FIFA Day) រវាងក្រុមជម្រើសជាតិឥណ្ឌូណេស៊ី ទទួលស្វាគមន៍ក្រុមជម្រើសជាតិអាហ្សង់ទីន ដែលនឹងធ្វើឡើងនៅថ្ងៃទី១៩ ខែមិថុនា ខាងមុខនេះ។
លោក Erick Thohir អតីតម្ចាស់ក្លិបយក្សអ៊ីតាលី Inter Milan និងក្លិប D.C. United នៅលីគកំពូលសហរដ្ឋអាមេរិក ដែលបានចូលកាន់តំណែងជាប្រធានសមាគមកីឡាបាល់ទាត់ឥណ្ឌូណេស៊ី កាលពីខែកុម្ភៈ ឆ្នាំ២០២៣ កន្លងទៅ បាននិយាយថា សំបុត្រត្រូវបានបែងចែកចេញជា៤ប្រភេទ ដោយប្រភេទទី៣ មានតម្លៃ ៤០ដុល្លារអាមេរិក, ប្រភេទទី២ មានតម្លៃ ៨០ដុល្លារ និងប្រភេទទី១ មានតម្លៃ ១៦៧ដុល្លារ ចំណែកសំបុត្រលំដាប់វីអាយភី (VIP) មានតម្លៃ ២៨៤ដុល្លារ។
សំបុត្រអាចរកទិញបាននៅថ្ងៃទី០៥ ខែមិថុនា សម្រាប់អ្នកកាន់ប័ណ្ណពិសេស (BRI) ខណៈដែលការលក់មិនផ្តាច់មុខ នឹងចាប់ផ្តើមនៅថ្ងៃទី ០៦-០៧ ខែមិថុនា ខាងមុខនេះ។ សំបុត្រដែលត្រូវដាក់លក់មានចំនួនសរុប ៦ម៉ឺនសន្លឹក ហើយការទិញអាចធ្វើឡើងតាមរយៈគេហទំព័រសមាគមនបាល់ទាត់ឥណ្ឌូណេស៊ី PSSI និងគេហទំព័រ tiket.com ដើម្បីទទួលសំបុត្រចូលទស្សនាការប្រកួតរវាងម្ចាស់ផ្ទះឥណ្ឌូណេស៊ី នឹងអាហ្សង់ទីន ម្ចាស់ជើងឯក World Cup ឆ្នាំ ២០២២ នៅឯកីឡដ្ឋាន Gelora Bung Karno ដែលនឹងចាប់ផ្តើមនៅម៉ោង ០៧:៣០នាទីយប់ (ម៉ោងនៅឥណ្ឌូណេស៊ី)។
ការប្រកួតមិត្តភាពរវាងឥណ្ឌូណេស៊ី និងអាហ្សង់ទីន នឹងក្លាយជាជំនួបដ៏ទាក់ទាញនៅតំបន់អាស៊ី ជាពិសេសអ្នកគាំទ្រឥណ្ឌូណេស៊ី ដោយពួកគេនឹងបានឃើញវត្តមានកីឡាករលំដាប់ពិភពលោករបស់អាហ្សង់ទីន ជាពិសេសកំពូលខ្សែប្រយុទ្ធ Lionel Messi ដែលមានឈ្មោះក្នុងបញ្ជីរបស់លោកគ្រូបង្វឹក Lionel Scaloni សម្រាប់ការប្រកួត ដែលនឹងត្រូវធ្វើឡើងនៅកណ្តាលទីក្រុងហ្សាកាតា។
ខាងក្រោមនេះ គឺជាកាលវិភាគប្រកួតមិត្តភាពអន្តរជាតិ ឬ FIFA Day របស់ក្រុមជម្រើសជាតិអាហ្សង់ទីន នៅតំបន់អាស៊ី ៖
-ថ្ងៃទី១៥ ខែមិថុនា ឆ្នាំ២០២៣ អាហ្សង់ទីន នឹងត្រូវប៉ះអូស្ត្រាលី នៅកីឡដ្ឋាន Workers’ Stadium នៅក្នុងទីក្រុងប៉េកាំង ប្រទេសចិន
-ថ្ងៃទី១៩ ខែមិថុនា ឆ្នាំ២០២៣ អាហ្សង់ទីន នឹងត្រូវប៉ះឥណ្ឌូណេស៊ី នៅកីឡដ្ឋាន Gelora Bung Karno ទីក្រុងហ្សាកាតា ប្រទេសឥណ្ឌូណេស៊ី៕
ចែករំលែកព័តមាននេះ