ខេត្តបន្ទាយមានជ័យ ៖ រថយន្តធុនធំ២គ្រឿង ក្នុងនោះមានដឹកប្រហិតប្រភេទចម្រុះ, ស៊ុតមាន់, សាច់មាន់, សាច់ជ្រូកបង្កកជាច្រើនដុំ ត្រូវកម្លាំងបង្ក្រាបបានក្រោយពីដឹងថា លួចនាំចូលមកពីប្រទេសថៃ-វៀតណាម ដោយគ្មានលិខិតអនុញ្ញាត…
ខេត្តបន្ទាយមានជ័យ ៖ រថយន្តធុនធំ២គ្រឿង ក្នុងនោះមានដឹកប្រហិតប្រភេទចម្រុះ, ស៊ុតមាន់, សាច់មាន់, សាច់ជ្រូកបង្កកជាច្រើនដុំ ត្រូវកម្លាំងបង្ក្រាបបានក្រោយពីដឹងថា លួចនាំចូលមកពីប្រទេសថៃ-វៀតណាម ដោយគ្មានលិខិតអនុញ្ញាត និងសង្ស័យខូចគុណភាព ។
ជាក់ស្តែង កាលពីវេលម៉ោង០២ និង១០នាទីទៀបភ្លឺថ្ងៃទី២៨ ឧសភា ឆ្នាំ២០២៣ ដោយមានការសម្របសម្រួលនីតិវិធីពីព្រះរាជអាជ្ញារងនៃអយ្យការអមសាលាដំបូងខេត្តបន្ទាយមានជ័យ ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយការិយាល័យផលិតកម្ម និងបសុព្យាបាលខេត្តបន្ទាយមានជ័យបានឃាត់ថយន្តចំនួន២គ្រឿង ។
ប្រភពបន្តថា ចំពោះរថយន្តទី១-ម៉ាក SSANGYONG ISTANA ពាក់ស្លាកលេខកំពង់ចាម២A-០១៨០ មានដឹកប្រហិតចម្រុះ និងសាច់សត្វមាន់ចំនួន៦៩២៦គីឡូក្រាម មកពីប្រទេសថៃ ដោយគ្មានលិខិតអនុញ្ញាតនាំចូល ឃាត់បាននៅចំណុចភូមិថ្នល់បត់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
ចំណែករថយន្តទី២-ម៉ាកHYUNDAI ពាក់ស្លាកលេខភ្នំពេញ៣A-៩៨៨៩ ជាប្រភេទរថយន្តដឹកអ្នក ដំណើរ៤២កៅអី បានដឹកស៊ុតមាន់ចំនួន៣៦០០០គ្រាប់ និងសាច់សត្វជ្រូកបង្កកចំនួន៥៣០គីឡូ ក្រាម មកពីប្រទេសវៀតណាម ដោយគ្មានលិខិតអនុញ្ញាតអ្វីទាំងអស់ ឃាត់នៅភូមិបត់ត្រង់ ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ ។
ចំពោះបទល្មើសខាងលើនេះ ក្រុមការងារបាននាំយកវត្ថុតាងទាំង២ករណីទៅមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ដើម្បីអនុវត្តតាមនីតិវិធីច្បាប់ និងយកទៅកម្ទេចចោល។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ