កសិករដាំធុរេននៅប្រទេសថៃត្រូវបានជំរុញឱ្យរក្សាគុណភាពផ្លែឈើរបស់ពួកគេ ដោយសារតែពួកគេកំពុងប្រឈមនឹងការគំរាមកំហែងកាន់តែខ្លាំងឡើង ពីប្រទេសវៀតណាម និងហ្វីលីពីន នៅក្នុងទីផ្សារប្រទេសចិន។ ការ​ព្រមាន​នេះ​ធ្វើ​ឡើង​ដោយ​អគ្គនាយក​នៃ​អគ្គនាយកដ្ឋាន​ជំរុញ​ពាណិជ្ជកម្ម​អន្តរជាតិលោកPhusit Ratanakul Sereroengrit។ នេះបើយោងតាមការចុះផ្សាយរបស់សារព័ត៌មាន The nation Thailand នៅថ្ងៃទី២៨ ខែឧសភា ឆ្នាំ២០២៣។

លោក Phusit បាននិយាយថា របាយការណ៍ពីការិយាល័យផ្សព្វផ្សាយពាណិជ្ជកម្មនៅទីក្រុងណាននីង ប្រទេសចិន បានបង្ហាញថា តម្លៃលក់ដុំនៃទុរេននៅក្នុងប្រទេសចិន បានធ្លាក់ចុះនៅដើមខែនេះ។ តម្លៃ​ទុរេន​ក្នុង​ប្រទេស​ចិន​បាន​ធ្លាក់​ចុះ​ខ្លាំងនៅ​ដើម​ខែ​ឧសភា ​ដោយ​សារ​ការ​កើន​ឡើង​នៃ​ការ​ផ្គត់ផ្គង់​ បន្ទាប់​ពី​អ្នក​លក់​ដុំ​របស់​ចិន​បាន​បង្កើន​ការ​នាំ​ចូល​ពី​ប្រទេស​វៀតណាម និង​ហ្វីលីពីន។

នៅ​ដើម​ខែ​ឧសភា តម្លៃ​ទុរេន​ម៉ុនថង ​mon thong របស់​ថៃ ​បាន​ធ្លាក់​ចុះ​មក​នៅ​ចន្លោះ​ពី ៣៦ ទៅ ៤៨ យ័ន (១៧៧ ទៅ ២៦៦ បាត) ក្នុង​មួយ​គីឡូ។ ចំណែកតម្លៃ​ទុរេន​ពី​ប្រទេស​វៀតណាម​មាន​តម្លៃ​ចន្លោះ​ពី ៣២ ទៅ ៤១ យ័ន ​ក្នុង​មួយ​គីឡូ ខណៈ​តម្លៃ​ទុរេន​ពី​ប្រទេស​ហ្វីលីពីន​ មាន​ចន្លោះ​ពី ៣៧ ទៅ ៤៥ យ័ន ​ក្នុង​មួយ​គីឡូក្រាម។ កាលពីមិនទាន់មានគូប្រជែងច្រើន តម្លៃទុរេនថៃ ធ្លាប់ហក់ឡើងដល់ ៥២-៥៨ យ័ន ក្នុងមួយគីឡូក្រាមនៅពាក់កណ្តាលខែឧសភា ដោយសារវាជាចុងបញ្ចប់នៃរដូវប្រមូលផលនៅក្នុងខេត្តភាគខាងកើត ដោយបន្ថែមថា ការធ្លាក់ចុះនៃការនាំចេញទុរេនថៃបានជំរុញឱ្យតម្លៃកើនឡើងសម្រាប់ពួកគេ។

កាលពីឆ្នាំមុន ប្រទេសចិនបាននាំចូលទុរេនចំនួន ៨២៥,០០០ តោន ដែលមានតម្លៃ ៤.០៣ ពាន់លានដុល្លារអាមេរិក ដែលក្នុងនោះ ៩៤.៥៥% (៧៨០,០០០ តោន) បានមកពីប្រទេសថៃ។ យោងតាមរបាយការណ៍ពីទីក្រុងណាននីង ការនាំចូលទុរេនតាមច្រកព្រំដែនក្បែរទីក្រុងរបស់ខ្លួនបានកើនឡើងនៅឆ្នាំនេះ។ ចាប់ពីខែមករា ដល់ខែមីនា ទុរេនសរុបចំនួន ៦១,០០០តោន ត្រូវបាននាំចូលតាមច្រកព្រំដែន ហើយក្នុងខែមេសា មានចំនួន ៦០,០០០ តោន ត្រូវបាននាំចូលតាមច្រកព្រំដែន៕