អនិច្ចា! មនុស្ស៦នាក់ជួបគ្រោះលើដងផ្លូវ ក្នុងគ្រោះថ្នាក់២ករណីផ្សេងគ្នានៅថ្ងៃតែមួយ
- ព្រៃវែង
ក្នុងរយៈពេលតែមួយថ្ងៃសោះ ខេត្តព្រៃវែង កើតមានហេតុការណ៍គ្រោះថ្នាក់ចរាចរណ៍រហូតដល់ទៅ២ករណី ដែលបានបណ្តាលអោយ
ខេត្តព្រៃវែង ៖ ក្នុងរយៈពេលតែមួយថ្ងៃសោះ ខេត្តព្រៃវែង កើតមានហេតុការណ៍គ្រោះថ្នាក់ចរាចរណ៍រហូតដល់ទៅ២ករណី ដែលបានបណ្តាលអោយមនុស្សម្នាក់ស្លា.ប់ និងមនុស្សក្មេងចាស់ប្រុសស្រីចំនួន៥នាក់ទៀត រងរបួស ហើយត្រូវសមត្ថកិច្ចហៅរថយន្តសាមុយដឹកយកទៅសង្គ្រាះភ្លាមៗផងដែរ ក្រោយពេលកើតហេតុ។
ដោយករណីទី១ គឺកើតឡើងរវាងរថយន្តចំនួន៣គ្រឿង បានបុកបន្តកន្ទុយគ្នានៅលើកំណាត់ផ្លូវជាតិលេខ១ ត្រង់ចំណុចមុខយានដ្ឋានឆាលី ដែលស្ថិតក្នុងភូមិស្ទឹងស្លូត ឃុំអ្នកលឿង ស្រុកពាមរក៌ ខេត្តព្រៃវែង កាលពីវេលាម៉ោង៩និង៣០នាទីព្រឹក ថ្ងៃទី២៧ ខែឧសភា ឆ្នាំ២០២៣ បណ្តាលអោយមនុស្សក្មេងចាស់ប្រុសស្រីចំនួន៥នាក់ជិះក្នុងរថយន្តនោះ រងរបួសធ្ងន់ និងស្រាល។
បើតាមសមត្ថកិច្ច បានអោយដឹងថា មុនពេលកើតហេតុ គេឃើញរថយន្តសាំយ៉ុងដឹកអ្នកដំណើរចំនួន២គ្រឿងបានបើកបន្តកន្ទុយគ្នាមកពីទិសខាងកើតឆ្ពោះទៅលិច លុះពេលមកដល់ចំណុចកើតហេតុ ស្រាប់តែមានរថយន្តហ៊ីយ៉ាន់ដាយចំណុះ២តោនកន្លះមួយគ្រឿងទៀត បើកមកពីក្រោយក្នុងល្បឿនលឿន ក៏ជ្រុលបុកគូថរថយន្តសាំយ៉ុងពណ៌ខៀវមួយគ្រឿងដែលនៅខាងមុខពេញទំហឹង ធ្វើអោយរថយន្តនោះជ្រុលទៅបុកគូថរថយន្តសាំយ៉ុងពណ៌លឿង មួយគ្រឿងទៀត ដែលនៅខាងមុខរុញគ្នា បណ្ដាលឱ្យទាំង៣គ្រឿងអូសជាង៥ម៉ែត្រ ទើបកល់ទៅមុខលែងរួច។
សមត្ថកិច្ចបន្តថា ហេតុការណ៍នេះ បានបណ្តាលអោយអ្នកដំណើរក្មេងចាស់ប្រុសស្រីចំនួន៥នាក់ជិះនៅក្នុងរថយន្តសាំយ៉ុងពណ៌ខឿវ រងរបួសធ្ងន់ស្រាល ហើយត្រូវបានដឹកយកទៅកាន់មន្ទីរពេទ្យបង្អែកអ្នកលឿងភ្លាមៗ ដើម្បីសង្គ្រោះ។
សមត្ថកិច្ចបានបញ្ជាក់ថា ក្រោយកើតហេតុភ្លាម ភាគីរថយន្តទាំង៣គ្រឿងបានចរចាសម្រួលគ្នាបញ្ចប់រឿង ដោយរថយន្តបង្កទទួលខុសត្រូវសងការខូចខាតទាំងអស់ គឺសងរថយន្តសាំយ៉ុងពណ៌ខឿវចំនួន១ពាន់ដុល្លារ សងរថយន្តសាំយ៉ុងពណ៌លឿង៥០០ដុល្លារ និងអ្នករងរបួស៥នាក់ដោយម្នាក់ៗចំនួន៣០ម៉ឺនរៀលផងដែរ។
ដោយឡែកករណ៍ទី២ គឺកើតឡើងកាលពីវេលាម៉ោង៣និង៤០នាទីរសៀល ថ្ងៃទី២៧ ខែឧសភា ឆ្នាំ២០២៣ នៅតាមបណ្តោយផ្លូវជាតិលេខ8A ស្ថិតនៅក្នុងភូមិត្នោត ឃុំរកា ស្រុកពារាំង ខេត្តព្រៃវែង ដែលកើតឡើងដោយសារការបើកបរវ៉ាជែងដោយខ្វះការប្រុងប្រយ័ត្ន រហូតធ្វើអោយកើតមានគ្រោះថ្នាក់ បណ្តាលអោយបុរសម្នាក់ស្លា.ប់បាត់បង់ជីវិតភ្លាមៗនៅនឹង កន្លែងកើតហេតុ។
ប្រភពព័ត៌មានពីកន្លែងកើតហេតុ បានអោយដឹងថា មុនពេលកើតហេតុ គេឃើញរថយន្តកូរ៉េមួយគ្រឿង ពណ៌ស ពាក់ស្លាកលេខ ភ្នំពេញ 3F 5400 បើកវ៉ាជែងក្នុងល្បឿនយ៉ាងលឿន ក្នុងទិសដៅពីកើតទៅលិច ខណៈពេលមេឃកំពុងភ្លៀងខ្លាំង លុះពេលមកដល់ចំណុចកើតហេតុក៏ជ្រុលទៅបុករ៉ឺម៉កម៉ូតូទិញអេតចាយមួយគ្រឿង ដែលបើកមកក្នុងទិសដៅបញ្ច្រាស់គ្នាពេញទំហឹង បណ្តាលអោយម៉ូតូរ៉ឺម៉ក និងអ្នកបើកម៉ូតូប៉ើងខ្ទាតទៅចិញ្ចើញថ្នល់ ធ្វើឱ្យអ្នកបើកម៉ូតូក៏បានស្លា.ប់ភ្លាមៗនៅនឹងកន្លែងកើតហេតុតែម្តង។
ក្រោយពេលកើតហេតុបានមួយសន្ទុះ កម្លាំងជំនាញផ្នែកចរាចរណ៍ នៃអធិការនគរបាលស្រុកពារាំង ក៏បានមកដល់កន្លែងកើតហេតុ ជួយសម្រួលចរាចរណ៍ និងឃាត់ខ្លួនអ្នកបើកបរ ជាមួយនឹងរថយន្តបង្ក នាំមកកាន់អធិការដ្ឋាននគរបាលស្រុកពារាំង ដើម្បីចាត់ការបន្តទៅតាមនីតិវិធី។ ចំណែកសាកស.ពជនរងគ្រោះត្រូវបានប្រគល់ទៅអោយក្រុមគ្រួសារ នាំយកទៅផ្ទះធ្វើបុណ្យតាមប្រពៃណី៕
ចែករំលែកព័តមាននេះ