ស្មើប្រកួតចុងក្រោយ! Dortmund របូតជើងឯកលីគទៅឱ្យ Bayern យ៉ាងសោកស្តាយជាទីបំផុត
អាល្លឺម៉ង់ ៖ ក្រុម FC Bayern Munich យកបាន៣ពិន្ទុនៅប្រកួតចុងក្រោយ ដើម្បីឈ្នះជើងឯកក្រប
អាល្លឺម៉ង់ ៖ ក្រុម FC Bayern Munich យកបាន៣ពិន្ទុនៅប្រកួតចុងក្រោយ ដើម្បីឈ្នះជើងឯកក្របខណ្ឌបាល់ទាត់លីគកំពូលអាល្លឺម៉ង់ Bundesliga រដូវកាលនេះ និងជាលើកទី ១១រដូវកាលជាប់ៗគ្នា ដោយសារតែក្រុមគូប្រជែង Borussia Dortmund បានត្រឹមស្មើនៅការប្រកួតចុងក្រោយ។
តាមពិតទៅ Dortmund មានភាគរយខ្ពស់ក្លាយជាជើងឯកនៅរដូវកាលនេះ និងជាលើកដំបូងរបស់ពួកគេចាប់តាំងពីរដូវកាល ២០១១-១២ កាលពីយប់មិញ ប្រសិនបើពួកគេអាចយកឈ្នះការប្រកួតចុងក្រោយនៃលីគកំពូលអាល្លឺម៉ង់ទល់នឹងក្រុមភ្ញៀវ Mainz ប៉ុន្តែអ្វីៗត្រូវបានរលាយសូន្យសុង ដោយការប្រកួតបញ្ចប់ទៅក្នុងលទ្ធផលស្មើគ្នា ២-២ ដោយបានទម្លាក់ភារកិច្ចនេះដល់ក្រុម Bayern ដែលយកឈ្នះក្រុមម្ចាស់ផ្ទះ Koln នៅក្នុងលទ្ធផល ២-១ ដើម្បីក្លាយជាម្ចាស់ជើងឯករដូវកាលនេះ និងជាលើកទី៣៣ ក្នុងប្រវត្តិសាស្ត្រ Bundesliga។ ក្រុមទាំងពីរបញ្ចប់ទៅដោយមាន ៧១ពិន្ទុស្មើគ្នា ខុសត្រង់ថា Bayern មានគ្រាន់បាល់ចំណេញច្រើនជាង ដើម្បីអនុញ្ញាតឱ្យពួកគេក្លាយជាម្ចាស់ជើងឯករដូវកាលនេះ។
Bayern ធ្វើពិធីលើកពានរង្វាន់ Meisterschale នៃក្របខណ្ឌ Bundesliga យ៉ាងរីករាយជាទីបំផុត នៅឯកីឡដ្ឋាន RheinEnergieStadion របស់ក្រុម Koln ខណៈដែលទិដ្ឋភាពសោកស្តាយ និងការសម្រក់ទឹកភ្នែកបានកើតឡើងនៅឯកីឡដ្ឋាន Signal Iduna Park របស់ក្រុម Dortmund។
ទោះជារបូតឱកាសមាសឈ្នះជើងឯក Bundesliga រដូវកាលនេះក៏ពិតមែន ប៉ុន្តែអ្នកគាំទ្រក្រុម Dortmund រាប់ម៉ឺននាក់នៅក្នុងកីឡដ្ឋានបានបន្តនៅដល់វិនាទីចុងក្រោយ ដើម្បីស្រែកច្រៀងផ្តល់កម្លាំងចិត្តដល់កីឡាកររបស់ពួកគេ ដែលកំពុងសម្រក់ទឹកភ្នែកនៅលើទីលានប្រកួត៕
ចែករំលែកព័តមាននេះ