ទីបំផុត! អ្នកបើករថយន្ត Mazda បង្កបាតុភាពតាមផ្លូវ ត្រូវនាំមកអប់រំហើយ ឪពុកចេញមុខធានា
រាជធានីភ្នំពេញ ៖ ទីបំផុត! មានការចែកចាយព្រោងព្រាតតាមបណ្តាញសង្គមហ្វេសប៊ុក ចំពោះ អ្នកបើករថយន្តម៉ាក Mazda2 ពណ៌ក្រហម ស្លាកលេខភ្នំពេញ 2BG-0265…
រាជធានីភ្នំពេញ ៖ ទីបំផុត! មានការចែកចាយព្រោងព្រាតតាមបណ្តាញសង្គមហ្វេសប៊ុក ចំពោះ អ្នកបើករថយន្តម៉ាក Mazda2 ពណ៌ក្រហម ស្លាកលេខភ្នំពេញ 2BG-0265 ដែលបានបង្កបាតុភាព ២ដងនៅតាមដងផ្លូវ ក្នុងថ្ងៃតែមួយនោះ ត្រូវស្នងការដ្ឋាននគរបាលរាជធានីភ្នំពេញ កោះហៅឲ្យធ្វើកិច្ចសន្យា និងធានាពីឪពុក ទើបអនុញ្ញាតឲ្យត្រឡប់ទៅផ្ទះវិញ ។
ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ នៅម៉ោង១០និង៤២យប់ថ្ងៃទី២៦ ឧសភានេះ បានចេញសេចក្តីបំភ្លឺព័ត៌មានអោយដឹងថា បន្ទាប់ពីបានឃើញការចុះផ្សាយព័ត៌មានតាមបណ្តាញសង្គមទាក់ទងទៅនឹងករណីរថយន្តម៉ាក MAZDA ពណ៌ក្រហម ពាក់ផ្លាកលេខភ្នំពេញ 2BG-0265 ដែលបានបើកបររថយន្តបង្កបាតុភាពតាមដងផ្លូវសាធារណ: ២កន្លែងផ្សេងគ្នា កាលពីវេលាម៉ោង ១៤:១០នាទីរសៀល និងម៉ោង ២១:០០នាទីយប់ កាលពីថ្ងៃទី២៤ ខែឧសភា ឆ្នាំ២០២៣កន្លងមកនេះ សមត្ថកិច្ចបានធ្វើការស្រាវជ្រាវរហូតដល់ថ្ងៃទី២៦ ខែឧសភា ឆ្នាំ២០២៣ សមត្ថកិច្ចបានធ្វើការកោះហៅអ្នកបើកបរល្មើស ឈ្មោះ ទួន បញ្ញាឧត្តម ភេទប្រុស អាយុ១៩ឆ្នាំ មុខរបរ លក់រថយន្ត ឲ្យចូលខ្លួនមកបកស្រាយបំភ្លឺករណីខាងលើ នៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ។
ក្រោយពីធ្វើការសាកសួររួច អ្នកបើកបរល្មើសខាងលើបានសារភាពទទួលកំហុស ថាដោយសារមានការខឹង ទើបខ្លួនបើកបរដូច្នេះ ។
ដោយមានការសារភាពកំហុស និងធានាពីឳពុក សមត្ថកិច្ចបានធ្វើការណែនាំអប់រំ ធ្វើកិច្ចសន្យាដោយឈប់ប្រព្រឹត្តអំពើខុសឆ្គងបែបនេះទៀត ព្រោះអាចបង្កគ្រោះថ្នាក់ដល់អ្នកដទៃ ដែលធ្វើដំណើរតាមដងផ្លូវ ។
កន្លងមក យុវជនឈ្មោះ ទួន បញ្ញាឧត្តម ធ្លាប់បង្កគ្រោះថ្នាក់ចរាចរណ៍រួចហើយ លើកនេះ បើករថយន្តម៉ាក MAZDA បង្កបាតុភាពតាមដងផ្លូវ ២កន្លែងផ្សេងគ្នា ក្នុងថ្ងៃតែមួយ ហើយប្រឌិតករណីនេះថា បានជួលរថយន្តឲ្យយុវជនម្នាក់ផ្សេងទៀត តែទីបំផុតទៅ ត្រូវនាំទាំងឳពុកខ្លួនមកធានារូបគេ ធ្វើកិច្ចសន្យាបញ្ឈប់ប្រព្រឹត្តអំពើខុសឆ្គងបែបនេះទៀត ។
យោងទៅតាម Facebook Nuon Duong Lakhena បានសរសេរផុសលើបណ្ដាញសង្គមហ្វេសប៊ុកថា «ល្ងាចមិញ វេលាម៉ោង៦និង១៥នាទីល្ងាច ថ្ងៃទី២៤ ខែឧសភា ឆ្នាំ២០២៣ ខ្ញុំបានចេញពីកន្លែងធ្វើការ បើកបររថយន្តលើដងផ្លូវ២៧១ ពីត្បូង ទៅជើង មកដល់ស្តុប ផ្លូវបំបែក ចុះទៅផ្លូវ ទេពផន និងពេទ្យលោកសង្ឃ មានឧបទ្ទវហេតុដូច វីឌីអូ នេះកើតឡើង ។ ដូច្នេះសូមសំណូមពរដល់សមត្ថកិច្ចចរាចរណ៍ មេត្តាហៅគាត់មកអប់រំផង ព្រោះជាផ្លូវសាធារណ ។ ផ្លាកលេខរថយន្ត 2BG-0265» ៕
វីដេអូ ២ឃ្លីប មានដូចខាងក្រោម ៖
ចែករំលែកព័តមាននេះ