បន្ទាប់ពីមានការឆ្លើយឆ្លងគ្នារវាងមន្ត្រីជាន់ខ្ពស់គណបក្សភឿថៃ និងគណបក្សឆ្ពោះទៅមុខប៉ុន្មានថ្ងៃជាប់គ្នា, ស្រាប់តែនៅថ្ងៃនេះ លោកភីថា លីមចារ៉ើនរ៉ាត់ ដែលជាប្រធានគណបក្សឆ្ពោះទៅមុខ និងជាបេក្ខជននាយករដ្ឋមន្ត្រីផងដែរនោះ បានចេញមកនិយាយខ្លួនឯងវិញម្ដង ដើម្បីកុំឱ្យជម្លោះនេះរីករាលដាលកាន់តែខ្លាំង។ លោកយល់ថាបញ្ហានេះមិនចាំបាច់យកទៅនិយាយហែកកកាយជាសាធារណៈទេ។…
បន្ទាប់ពីមានការឆ្លើយឆ្លងគ្នារវាងមន្ត្រីជាន់ខ្ពស់គណបក្សភឿថៃ និងគណបក្សឆ្ពោះទៅមុខប៉ុន្មានថ្ងៃជាប់គ្នា, ស្រាប់តែនៅថ្ងៃនេះ លោកភីថា លីមចារ៉ើនរ៉ាត់ ដែលជាប្រធានគណបក្សឆ្ពោះទៅមុខ និងជាបេក្ខជននាយករដ្ឋមន្ត្រីផងដែរនោះ បានចេញមកនិយាយខ្លួនឯងវិញម្ដង ដើម្បីកុំឱ្យជម្លោះនេះរីករាលដាលកាន់តែខ្លាំង។ លោកយល់ថាបញ្ហានេះមិនចាំបាច់យកទៅនិយាយហែកកកាយជាសាធារណៈទេ។ អ្វីដែលជាបញ្ហាខ្វែងគំនិតគ្នាអាចនិយាយគ្នាស្ងាត់ៗនៅក្នុងសម្ព័ន្ធភាព។
លោកថ្លែងថាសង្គ្រាមវោហារសាស្ត្រផ្ដើមចេញពីទស្សនៈខុសគ្នារវាងគណបក្សទាំង២។ លោកថាបញ្ហាតំណែងប្រធានរដ្ឋសភាមិនសំខាន់ស្មើនឹងកិច្ចការដែលប្រជារាស្ត្រចង់ឃើញពួកយើងធ្វើការនៅក្នុងសម្ព័ន្ធភាពនេះទេ។ លោកសូមជំរុញឱ្យគ្រប់គណបក្សខិតខំរួបរួមសាមគ្គីគ្នាដើម្បីធ្វើយ៉ាងណាកាត់ផ្ដាច់ឫសគល់នៃការដឹកនាំបែបផ្ដាច់ការនិយម និងយោធានិយម។ បន្ទាប់មក យើងអាចនាំប្រទេសជាតិឆ្ពោះទៅរកលទ្ធិប្រជាធិបតេ្យដ៏ពិតប្រាកដ។
ពាក់ព័ន្ធនឹងបញ្ហាតំណែងរដ្ឋសភានោះ, មតិខ្លះលើកឡើងថាគួរតែប្រគល់ឱ្យប្រធានគណបក្សប្រឆាឆាត (Prachachat) ដែលស្ថិតនៅក្នុងសម្ព័ន្ធភាពជាមួយគ្នាកាន់តំណែងជាប្រធានរដ្ឋសភាតែម្ដងទៅ ដើម្បីឆាប់ចប់រឿង។ គេយល់ថាធ្វើអីចឹងទៅ ភឿថៃ និងឆ្ពោះទៅមុខ លះបង់តំណែងហ្នឹងទាំងអស់គ្នា។ គំនិតនេះត្រូវអនុប្រធានគណបក្សភឿថៃ លោកភុមថាម វិឆាយ៉ាឆៃ (Phumtham Wechayachai) ច្រានចោល។
លោកភុមថាមថ្លែងថា «ចាប់តាំងពីការចរចាគ្នាលើកដំបូង, យើងបានឯកភាពគ្នាថាតំណែងប្រធានរដ្ឋសភាអាចនឹងធ្លាក់ទៅក្នុងដៃរបស់គណបក្សភឿថៃ ឬគណបក្សឆ្ពោះទៅមុខ»។ គណបក្សធំៗទាំង២បានបង្កើតក្រុមចរចាដើម្បីជជែកគ្នាពីកម្មវិធីនយោបាយរបស់ខ្លួន។ នៅក្នុងចំណោមនោះក៏មានការជជែកគ្នាពីតំណែងប្រធានរដ្ឋសភាផងដែរ។ ដោយសារគណបក្សឆ្ពោះទៅមុខបានតំណែងនាយករដ្ឋមន្ត្រី១ហើយ, ដូច្នេះភឿថៃជឿជាក់ថាខ្លួនសមនឹងទទួលបានតំណែងប្រធានរដ្ឋសភា។
កាលពីពេលកន្លងមក, គណបក្សភឿថៃពុំដែលឮចេញពីមាត់របស់ក្រុមអ្នកចរចានិយាយពីបញ្ហានេះទេ។ ឮតែអ្នកដែលស្ថិតនៅក្រៅសង្វៀន (ចង់សំដៅលើអ្នកមិនមែនតំណាងឱ្យបក្ស) និយាយចេចចាចៗតាមបណ្ដាញសង្គម។ ដូច្នេះដើម្បីឱ្យច្បាស់ទាំងអស់គ្នា និងជៀសវាងបញ្ហារសេមរសាម, លោកភុមថាមយល់ថាគេគួរតែនិយាយគ្នាឱ្យបានដាច់ស្រេច និងជ្រះស្រឡះ។
លោកភុមផាមយល់ថាបើទៅថ្ងៃមុខ យើងសម្រេចថាតំណែងប្រធានរដ្ឋសភាត្រូវបានទៅខាងបក្សណា, យើងក៏គួរផ្ដល់ការពន្យល់បកស្រាយឱ្យបានសមរម្យផងដែរ។ លោកចង់បានការនិយាយចេញពីមាត់ផ្ទាល់របស់ក្រុមអ្នកចរចាដែលជាអ្នកតំណាងផ្លូវការរបស់បក្សទាំង២។ បន្ទាប់ពីនិយាយគ្នារួចហើយ, លោកយល់ថាបក្សទាំង២អាចចេញសេចក្ដីថ្លែងការណ៍រួមជាផ្លូវការដើម្បីឱ្យច្បាស់ទាំងអស់គ្នា៕
ប្រភព៖ ទូរទស្សន៍ Thai PBF របស់ថៃ
https://www.thaipbsworld.com/move-forward-leader-suggests-house-speakership-should-be-settled-internally/
ចែករំលែកព័តមាននេះ