ខេត្តបាត់ដំបង ៖ តាមរយៈសារជាសម្លេងដែលគេស្គាល់ថា ជាសម្លេងរបស់មន្ត្រីយោធភូមិភាគ៥ម្នាក់ ដែលជាប់ឈ្មោះអាស្រូវខ្លាំងបំផុតក្នុងរឿង «ទន្ទ្រានយកដីតំបន់៣» នៅក្នុងស្រុកមោងប្ញស្សី បានព្រមានត្រង់ៗថា «ខ្ញុំនឹងទម្លាយទាំងអស់នូវឈ្មោះមន្ត្រីនានា ដែលជាប់ពាក់ព័ន្ធនឹងរឿង…
ខេត្តបាត់ដំបង ៖ តាមរយៈសារជាសម្លេងដែលគេស្គាល់ថា ជាសម្លេងរបស់មន្ត្រីយោធភូមិភាគ៥ម្នាក់ ដែលជាប់ឈ្មោះអាស្រូវខ្លាំងបំផុតក្នុងរឿង «ទន្ទ្រានយកដីតំបន់៣» នៅក្នុងស្រុកមោងប្ញស្សី បានព្រមានត្រង់ៗថា «ខ្ញុំនឹងទម្លាយទាំងអស់នូវឈ្មោះមន្ត្រីនានា ដែលជាប់ពាក់ព័ន្ធនឹងរឿង ដីតំបន់៣ ប្រាប់តុលាការ ប្រសិនបើតុលាការហៅខ្ញុំទៅសួរនាំអំពីរឿងដីនោះ» ។ សារជាសម្លេងដែលមានរយៈពេល«២និង៣១នាទី»នេះ ត្រូវគេអះអាងថា ជាសម្លេងរបស់លោក អ៊ី សេងហុង មន្ត្រីយោធភូមិភាគ៥ ដែលលោកបាននិយាយព្រមានទៅកាន់ប្រធានសហគមន៏ម្នាក់នៅក្នុងមូលដ្ឋាន តាមទូរស័ព្ទកាលពីប៉ុន្មានថ្ងៃមុននេះ ហើយត្រូវបានគេផ្ញើចែករំលែកបន្តគ្នាជាបន្តបន្ទាប់តាមប្រព័ន្ធតេឡេក្រាម និងតាមបណ្ដាញសង្គម ។
លោក អ៊ី សេងហុង ត្រូវគេស្គាល់ថា លោកជាមន្ត្រីយោធភូមិភាគទី៥ តែការងាររបស់លោក ហាក់មមារញឹកខ្លាំងបំផុត គឺដើរប្រព្រឹត្តបទល្មើសនៅតំបន់ទន្លេសាប ។ ជាពិសេសរឿង «រំលោភបំពាន ឈូសឆាយរំលោភយកដីព្រៃលិចទឹកក្នុងតំបន់៣» ដែលជាតំបន់ហាមឃាត់ដោយច្បាប់ យកធ្វើជាកម្មសិទ្ធិផ្ទាល់ខ្លួន ។ ទីតាំងដែលមន្ត្រីរូបនេះ រំលោភបំពានយក ត្រូវគេរាយការណ៏ថា ភាគច្រើននៅក្នងភូមិសាស្ត្រ ឃុំជ្រៃ ស្រុកមោងប្ញស្សី ដែលពេលនេះកំពុងប្រឈមនឹងផ្លូវច្បាប់ផងដែរ ។ តាមរយៈសារជាសម្លេងដែលបានបែកធ្លាយ លោក អ៊ី សេងហុង ហាក់បានចង្អុលមុខចំៗ ចំពោះមន្ត្រីមួយចំនួន ដែលបានរំលោភបំពានយកដីតំបន់៣ ជាមួយខ្លួននាពេលកន្លងមក ។
ជាពិសេស លោក សេងហុង បានចង្អុលចំមុខលោកអភិបាលស្រុកមោងប្ញស្សីតែម្ដង ដែលលោកចោទថា «បានដីពីលោកហើយ ថែមទាំងយកលុយពីលោកយ៉ាងច្រើនទៀត»។
នៅក្នុងសារសម្លេងនោះ មន្ត្រីយោធាដែលល្បីល្បាញជាងគេ រឿង«ទន្ទ្រានយកដីតំបន់៣» ខាងលើនេះ បាននិយាយក្នុងន័យសម្លេងដើមថា « រឿងដីនេះមុននឹងធ្វើ គឺតាមរយៈអាជ្ញាធរដែនដីទាំងអស់ ចឹងលោកហន (ចៅហ្វាយស្រុក) ក៏ទទូលផល… លុយផង ដីផង ទាំងលោកវ៉ាន់ លោកអី… ក៏ទទួលគ្រប់គ្នា ។ បើនិយាយទៅក្នុងស្រុក ទទូលគ្រប់គ្នាទាំងអស់។ ចឹងការងារ ដែលខ្ញុំចូលតុលាការ បើសិនគេសួរ… ខ្ញុំត្រូវតែនិយាយ ត្រូវតែឆ្លើយទាំងអស់។ ព្រោះលោកហន (ចៅហ្វាយស្រុក) យកលុយក៏ច្រើន និងយកដី០៥ហិចតា។ លោកវ៉ាន់ ០៥ហិចតា ហើយខ្ញុំធ្វើឲ្យម៉ាស្អាតទាំងអស់… ទើបបានខ្ញុំសុខ។ បើលោកអស់ហ្នឹងមិនបានទទូលផលទេ គឺខ្ញុំធ្វើអត់បានទេ។ ចឹងការងារអស់នេះខ្ញុំត្រូវតែនិយាយ…»។ ខ្លឹមសារមួយផ្នែក នៃសារសម្លេងនោះ មន្ត្រីយោធារូបនេះ ត្រូវគេសន្និដ្ឋានថា បាននិយាយសំដៅទៅកាន់មនុស្សម្នាក់ ដែលលោកធ្លាប់គោរពយ៉ាងស្និតស្នាលកន្លងមក ក្នុងការធ្វើការងាររួមគ្នាកន្លងមក។
លោក សេងហុង បានលើកឡើងទៅកាន់មនុស្សនោះថា « ដូចបង… បងដឹងហើយ បងឯងរាប់អានជាមួយខ្ញុំ តែចុងកន្ទុយឈ្មោះ… បងឯង ទៅបំភ្លឺនៅស្រុក អី.. អី.. ណាណី..។ ខ្ញុំខំស្រលាញ់បងឯង ដូចបងបង្កើត មិនគួរណាបងឯងទៅធ្វើចឹង ? បងទៅថតដីខ្ញុំ ថតអី..! ចំនួនប៉ុន្មាន.. អីប៉ុន្មាន ? ក្រៅពីហ្នឹងបងឯងអត់ទៅថតទេ ? ចឹងចាប់ពីថ្ងៃនេះទៅ ដីនៅកន្លែងណា អាណាធើអីៗ ទាំងអស់.. ខ្ញុំនឹងទៅយកព័ត៏មានទាំងអស់..! ព្រោះខ្ញុំនៅភូមិភាគ៥ ក្នុងគណៈបញ្ជាការកងឯកភាពខេត្ត ភូមិភាគ៥ ជាអនុប្រធាន… ខ្ញុំមិនដែលនិយាយអីទេ ធើម៉េចឲ្យបានតែសុខ តែបើខ្ញុំអត់សុខហើយណា… បងប្អូនទាំងអស់ក៏អត់បានសុខដែរ ខ្ញុំចង់និយាយប្រាប់បង
ចឹង..»។
ជាចុងក្រោយ លោក អ៊ី សេងហុង បានរំលឹកប្រាប់ ទៅកាន់មនុស្សដែលលោកធ្លាប់គោរពរាប់អាន ចាត់ទុជាបងនោះទៀតថា «ខ្ញុំ.. ស្អីក៏ដោយ ឲ្យតែបងខ្វះខាតស្អី… ខ្ញុំជួយបងរហូត..! ខ្ញុំមិនខ្លាចបងទេ តែខ្ញុំជួយការងារ ព្រោះខ្ញុំភូមិភាគ៥ ខ្ញុំអត់ត្រូវខ្លាចបងទេ តែនេះជាការងាររបស់ខ្ញុំ ដែលខ្ញុំជួយបង នឹកឃើញថា យើងរាប់អានគ្នា ជៀសវាងអីចេះ អីចុះ..! តែចុងក្រោយមក វានៅតែដដែលៗហ្នឹង ? ខ្ញុំជួយបងឥតប្រយោជន៏ហ្នឹង ?» ។
នៅក្នុងរឿងនេះ មន្ត្រីម្នាក់បានប្រាប់ថា សម្លេងបែកធ្លាយរបស់មន្ត្រីយោធាឈ្មោះ អ៊ី សេងហុង ដែលស្ដាប់ទៅ ទំនងស្ថិតក្នុងស្ថានភាពស្រវឹងផងនេះ បាននិយាយតាមទូរស័ព្ទ ស្ដីបន្ទោសទៅលើមេសហគមន៏ម្នាក់ កាលថ្ងៃទី ២៤ ឧសភា ព្រោះតែខឹងមេសហគមន៍នោះ នាំគ្នាទៅថតដីរបស់លោកនៅតំបន់៣ រួចរាយការណ៏ជូនថ្នាក់លើ ។
តាមរយៈសម្លេង លោក អ៊ី សេងហុង បានចោទ និងចង្អុលត្រង់ៗថា លោក ទេព ហន អភិបាលស្រុកមោងប្ញស្សី ក៏ជាអ្នកទទូលបានផលប្រយោជន៏ពីលោកច្រើក្រាស់ក្រែលដែរ ដោយទទូលបានលុយយ៉ាងច្រើនផង និង ទទូលបានទាំងដីចំនួន០៥ហិកតាពីលោកថែមទៀត ។ ដោយឡែកមន្ត្រីនៅស្រុកនេះដទៃៗទៀត ក៏ទទូលបានអំណោយរបៀបពុករលួយបែបនេះដូចគ្នាដែរ ។
ជុំវិញសំណុំរឿងនេះ កោះសន្តិភាព មិនអាចទំនាក់ទំនងសុំការបំភ្លឺពីលោក អ៊ី សេងហុង ដែលគេអះអាងថា ជាម្ចាស់សម្លេងដែលបានបែកធ្លាយនោះ បានភ្លាមៗទេ នៅព្រឹកថ្ងៃទី ២៦ ឧសភា រីឯលោក ទេព ហន អភិបាលស្រុកមោងឬស្សី ដែលរងការចោទប្រកាន់ត្រង់ៗ ពីលោក អ៊ី សេងហុង ដែលសំបូររឿងអាស្រូវរំលោភបំពានដីព្រៃលេចទឹកតំបន់៣ ក៏មិនអាចទំនាក់ទំសុំការបភ្លឺបានដែរក្នុងថ្ងៃដដែលនេះដែរ ។
ប៉ុន្តែនៅថ្ងៃដដែល មន្ត្រីរដ្ឋបាលស្រុកមោងឬស្សី មួយរូបដែលធ្លាប់ចុះស្រាវជ្រាវលើករណីនេះ បានប្រាប់កោះសន្តិភាព តែសុំមិនប្រាប់ឈ្មោះថា តាមពិតលោកអភិបាលស្រុក និង មន្ត្រីមួយចំនួនទៀត ដែលលោក សេងហុង បានចោទប្រកាន់នោះ ពិតជាធ្លាប់ជាប់ពាក់ព័ន្ធជាមួយលោកមែន តែក្រោយមក មន្ត្រីទាំងនោះរួមទាំងលោកចៅហ្វាយស្រុកផង បានបោះបង់ដីតំបន់៣ ទាំងអស់ប្រគល់ជូនរដ្ឋវិញអស់ហើយ។ ប្រភពដដែលបានប្រាប់ថា ការស្ម័គ្រចិត្តប្រគល់ដីតំបន់៣ ទាំងនោះជូលរដ្ឋវិញ ក្រោយពីរាជរដ្ឋាភិបាលប្រកាសដកហូតដីរដ្ឋទាំងនេះ ហើយថែមទាំងប្រមានចាត់ការតាមច្បាប់ចំពោះមន្ត្រី ឬ បុគ្គលទាំងឡាយណាដែលរឹងទទឹង មិនព្រមប្រគល់ដីជូនរដ្ឋ។
មន្ត្រីរដ្ឋបាលស្រុករូបនេះ បានបញ្ជាក់ថា ក្រោយរាជរដ្ឋាភិបាលប្រកាសបែបនេះ ទាំងលោកអភិបាលស្រុក ទាំងមន្ត្រីដទៃទៀត ដែលជាប់ពាក់ព័ន្ធបាននាំគ្នាប្រគល់ដីតំបន់៣ ដែលមានទាំងអស់ជូនរដ្ឋវិញ ហើយម្នាក់ៗថែមទាំងបានធ្វើកិច្ចសន្យាបញ្ឍប់សកម្មភាពរំលោភបំពានដីរដ្ឋទៀតផង។ លើកលេងតែមន្ត្រីយោធា ឈ្មោះ អ៊ី សេងហុង ម្នាក់ទេ ដែលមានដីច្រើនជាងគេនៅតំបន់៣ នោះ ហើយរឹងរុះមិនព្រមប្រគល់ដីជូនរដ្ឋវិញ។
មិនតែប៉ុណ្ណោះ ជននេះកាន់តែផ្គើនលួចឈូសឆាយពង្រីកដីតំបន់៣ នេះបន្ថែមទៀតកាន់តែធំជាងមុនរហូតដល់សព្វថ្ងៃនេះ។ បើតាមសេចក្ដីរាយការណ៏បន្ថែមចុងក្រោយ ដែលកោះសន្តិភាព ទើបទទូលបានប៉ុន្មានថ្ងៃកន្លងទៅនេះ «ដីតំបន់៣» ដែលមន្ត្រីយោធភូមិភាគ៥ ឈ្មោះ អ៊ី សេងហុង កំពុងកាន់កាប់ និង កំពុងឈូសឆាយទន្ទ្រានយកថែមទៀតនៅពេលនេះ មានទីតាំងស្ថិតក្នុងភូមិសាស្ត្រ ភូមិអង្គ្រង ឃុំជ្រៃ ស្រុកមោងឬស្សី។
សេចក្ដីរាយការណ៏បឋមបានឲ្យដឹងថា ផ្ទៃដីតំបន់៣ ដែលលោក ហុង កំពុងគ្រប់គ្រងសព្វថ្ងៃនេះ មានប្រហែលជាង៥០ហិចតា នៅចំណុចភូមិសាស្ត្រខាងលើនេះ។ ប៉ុន្តែមានប្រភពខ្លះបានប្រាប់ថា លោក ហុង មានដីត្រឹមតែចំនួន១៦ហិចតាទេ ដែលលោកនឹងកូនចៅរបស់លោកកំពុងអាស្រ័យផលសព្វថ្ងៃ។ ហើយចំនួនដី១៦ហិចតានេះហើយ ដែលមន្ត្រីជំនាញសរសេរចូលក្នុងកំណត់ហេតុ ប្ដឹងចូលទៅកាន់តុលាការ ស្នើឲ្យចាត់ការតាមច្បាប់ កាលពេលថ្មីៗកន្លងទៅនេះ។
មន្ត្រីស្រុកមោងឬស្សីម្នាក់ទៀត ដែលបានដឹងរឿងនេះ បានប្រាប់កោះសន្តិភាពនៅរសៀលថ្ងៃទី ២៦ ឧសភា ថា លោក អ៊ី សេងហុង ហាក់ព្រមថមថយទេ ចំពោះការរំលោភបំពានច្បាប់រឿង«ទន្ទ្រានដីតំបន់៣» ខាងលើនេះ។ ហើយពេលនេះលោកហុង ពិតជាកំពុងប្រឈមនឹងផ្លូវតុលាការមែន។
ដោយសារតែត្រូវមន្ត្រីជំនាញដាក់បណ្ដឹងចូលតុលាការរឿង«ទន្ទ្រានដីតំបន់៣» បែបនេះហើយ ទើបលោក អ៊ី សេងហុង ក្ដៅក្រហាយ បានទូរស័ព្ទទៅស្ដីបន្ទោសមេសហគមន៏យ៉ាងចាស់ដៃ រហូតបែកធ្លាយសម្លេងខឹងសម្បារ និង និយាយដើមអាស្រូវពីលោកចៅហ្វាយស្រុកមោងឬស្សី និង មន្ត្រីដទៃៗទៀតបែកផ្សែង ក្នុងរឿងឃុមឃិតគ្នា«ទន្ទ្រានយកដីតំបន់៣» ដែលច្បាប់ហាមឃាត់។
ប្រភពព័ត៏មានជាច្រើន ដែលកោះសន្តិភាព ទទូលបាននៅព្រឹកថ្ងៃទី ២៦ ឧសភា នេះជាបន្តបន្ទាប់ និង មានខ្លឹមសារប្រហាក់ប្រហែលគ្នាថា សព្វថ្ងៃគេឃើញមន្ត្រីយោធាឈ្មោះ អ៊ី សេងហុង និង កូនចៅមួយចំនួនទៀត តែងដេកប្រចាំការយាមដីតំបន់៣ នោះស្ទើរទាំងយប់ទាំងថ្ងៃ ហើយគ្មាននរណាហ៊ានដើរទៅក្បែរទេ។ ព្រោះកូនចៅលោកសេងហុង តែងឈ្លេចសួរនាំពីគោលដៅអ្នកដែលដើរឆ្លងតាក់តំបន់នោះ ក្រែងអ្នកដំណើរទាំងនោះជាសមាសភាពមន្ត្រីបន្លំខ្លួនចូលស៊ើបដីតំបន់៣។ ប្រភពបានរាយការណ៏ថា សព្វថ្ងៃលោកហុង និង កូនចៅ មិនបានសម្ងំស្ងៀមទេ រឿងឈូសឆាយពង្រីកយកដីតំបន់៣ ត្រង់ចំណុចខាងលើនេះ។
មន្ត្រីយោធារូបនេះ តែងប្រើប្រាស់គ្រឿងចក្រលួចឈូសឆាយពង្រីកយកដីតំបន់៣ នេះនៅពេលយប់ តែសម្រាកពេលថ្ងៃ។ ព្រោះខ្លាចគេឃើញសកម្មភាព បើទោះជាដឹងថា ខ្លួនត្រូវបានមន្ត្រីជំនាញដាក់ពាក្យបណ្ដឹងចូលតុលាការហើយក្ដី។ បើតាមមន្ត្រីសាលាស្រុកមោងឬស្សីនេះ បានបង្ហើបឲ្យដឹងថា ប៉ុន្មានថ្ងៃមុននេះ លោក សុខ លូ អភិបាលខេត្ត បានសួរនាំពីរឿងមន្ត្រីយោធា ឈ្មោះ អ៊ី សេងហុង នេះដែរពាក់ព័ន្ធនឹងសំណុំរឿងដីតំបន់៣ ដែលមន្ត្រីជំនាញប្ដឹងចូលទៅកាន់តុលាការ។
មិនតែប៉ុណ្ណោះ លោកអភិបាលខេត្ត បានជម្រុញឲ្យមន្ត្រីជំនាញ ដែលជាដើមបណ្ដឹងត្រូវតាមដានលើសំណុំរឿងនេះឲ្យបានដិតដល់ ហើយត្រូវរាយការណ៏ជូនលោកឲ្យបានដឹងទៀតផង ខណៈសេចក្ដីរាយការណ៏ បានអះអាងថា លោក អ៊ី សេងហុង និង កូនចៅ នៅតែប្រើគ្រឿងចក្រលួចឈូសឆាយពង្រីកយកដីតំបន់៣ យ៉ាងព្រហើយនដដែល៕
ចែករំលែកព័តមាននេះ