ម្ចាស់ផ្ទះថៃប្រកាសថា គ្មានទេកីឡា «គុនខ្មែរ» នៅស៊ីហ្គេមលើកទី៣៣ ឆ្នាំ២០២៥
ថៃ ៖ ប្រទេសថៃបានប្រកាសយ៉ាងច្បាស់ថា ព្រឹត្តិការណ៍កីឡាស៊ីហ្គេមលើកទី៣៣ ឆ្នាំ២០២៥ ដែលខ្លួន
ថៃ ៖ ប្រទេសថៃបានប្រកាសយ៉ាងច្បាស់ថា ព្រឹត្តិការណ៍កីឡាស៊ីហ្គេមលើកទី៣៣ ឆ្នាំ២០២៥ ដែលខ្លួន
ថៃ ៖ ប្រទេសថៃបានប្រកាសយ៉ាងច្បាស់ថា ព្រឹត្តិការណ៍កីឡាស៊ីហ្គេមលើកទី៣៣ ឆ្នាំ២០២៥ ដែលខ្លួនទទួលសិទ្ធិធ្វើជាម្ចាស់ផ្ទះនោះ គឺមិនមានប្រភេទកីឡាប្រដាល់ «គុនខ្មែរ» ដូចកាលពីស៊ីហ្គេមលើកទី៣២ ឆ្នាំ២០២៣ នៅកម្ពុជានោះទេ។ នេះបើយោងតាមសារព័ត៌មាន Thailand Posts ចេញផ្សាយកាលពីថ្ងៃទី២៤ ខែឧសភា កន្លងទៅ។
ការលើកឡើងនេះ កើតឡើងបន្ទាប់ពីក្រុមប្រឹក្សាសហព័ន្ធកីឡាស៊ីហ្គេម (SEA Games) ឬ Montri SEA Games បានបោះឆ្នោតធ្វើវិសោធនកម្មលក្ខន្តិកៈ ដែលជាបទប្បញ្ញត្តិដ៏ធំបំផុតនៅក្នុងរយៈពេល៦២ឆ្នាំរបស់ខ្លួន អំពីការរៀបចំលើប្រភេទកីឡា ដែលនឹងប្រើប្រាស់នៅក្នុងកីឡាស៊ីហ្គេម។
ដោយសង្កត់ធ្ងន់ និងផ្តោតលើកីឡាអន្តរជាតិ រួមទាំងព្រឹត្តិការណ៍ដែលមានក្នុងការប្រកួតនៃស្តង់ដាកីឡាអូឡាំពិក និងកីឡាអាស៊ី ដែលជាប្រភេទកីឡាដ៏សំខាន់ ខណៈដែលកីឡាក្នុងស្រុកអាចមានមិនលើសពី៤ប្រភេទកីឡានោះទេ ដោយត្រូវប្រកួតប្រជែងដណ្តើមបានមេដាយមាសបានត្រឹមតែ ៨គ្រឿងប៉ុណ្ណោះក្នុងមួយប្រភេទកីឡា ឬមិនឱ្យមានការប្រកួតដណ្តើមមេដាយមាសលើសពី២០ទៅ៣០គ្រឿង សម្រាប់ប្រភេទកីឡាក្នុងស្រុកឡើយ ដែលវិសោធនកម្មលក្ខន្តិកៈនេះ នឹងចាប់ផ្តើមនៅក្នុងការប្រកួតកីឡាស៊ីហ្គេមលើកទី៣៣ នៅប្រទេសថៃតែម្តង។
ជាក់ស្តែង កាលពីពេលថ្មីៗនេះ លោក Chaiyapak Siriwat ឬលោក Big Nat អនុប្រធានគណៈកម្មាធិការអូឡាំពិកថៃ ក្នុងនាមជានាយកប្រតិបត្តិនៃសហព័ន្ធកីឡា SEA Games បានបង្ហើបថា «ប្រភេទកីឡាដែលនឹងត្រូវដាក់បញ្ចូលក្នុងកីឡាស៊ីហ្គេមលើកទី៣៣ ចាប់ពីពេលនេះតទៅ គឺត្រូវបានឯកភាពគ្នារវាង ថៃ ម៉ាឡេស៊ី សិង្ហបុរី លើប្រភេទកីឡាប្រភេទណាខ្លះ។ ដូច្នេះការប្រកួតនេះ គឺស្របតាមស្តង់ដារអន្តរជាតិ ដែលផ្តោតលើកីឡាអន្តរជាតិ និងព្រឹត្តិការណ៍ដែលប្រកួតតែក្នុងកីឡាអូឡាំពិក និងកីឡាអាស៊ីតែប៉ុណ្ណោះ។ សរុបទៅនឹងមានកីឡាប្រហែល ៤១ប្រភេទ ចំណែកកីឡាក្នុងស្រុកនឹងត្រូវមានការពិភាក្សាជាថ្មីម្តងទៀតអំពីអ្វីដែលថៃនឹងដាក់បញ្ចូល»។
ពាក់ព័ន្ធរឿងព្រឹត្តិការណ៍កីឡាស៊ីហ្គេមលើកទី៣២ ដែលម្ចាស់ផ្ទះកម្ពុជាបានសម្រេចកាត់ចោលកីឡាប្រដាល់ «មួយថៃ» ហើយជំនួសដោយ «គុនខ្មែរ» ជុំវិញរឿងនេះ លោក Chaiyapak បានបញ្ជាក់ថា «ស៊ីហ្គេមលើកទី៣៣ ដែលថៃធ្វើជាម្ចាស់ផ្ទះ ប្រាកដជាមិនមានប្រភេទកីឡា «គុនខ្មែរ» ហើយនឹងនាំមកនូវកីឡា «មួយថៃ» ត្រឡប់មកកាន់ការប្រកួតដណ្ដើមបានមេដាយដូចដើមវិញ»។
ក្រៅពីនោះ អនុប្រធានគណៈកម្មាធិការជាតិអូឡាំពិកថៃរូបនេះ បានឱ្យដឹងថា ម្ចាស់ផ្ទះថៃនឹងមានការកាត់បន្ថយចំនួនអត្តពលិកចូលសញ្ជាតិ នៅកីឡាស៊ីហ្គេមលើកទី៣៣ បើទោះបីជាប្រទេសនីមួយៗ នឹងមានគោលនយោបាយផ្សេងៗគ្នា សម្រាប់អត្តពលិកចូលសញ្ជាតិយ៉ាងណាក៏ដោយ ហើយម្ចាស់ផ្ទះថៃត្រូវតែគោរព ព្រោះការចូលសញ្ជាតិកីឡាករក៏មិនមែនជារឿងថ្មីនោះដែរ។
គួរបញ្ជាក់ជូនថា ព្រឹត្តិការណ៍កីឡាស៊ីហ្គេមលើកទី៣៣ ឆ្នាំ២០២៥ នឹងចាប់ផ្តើមពីថ្ងៃ០៩ រហូតដល់ថ្ងៃទី២០ ខែធ្នូ ឆ្នាំ២០២៥ ដែលត្រូវធ្វើឡើងទីក្រុងបាងកក ខេត្តឈុនបុរី និងខេត្តសុងក្លា ព្រះរាជាណាចក្រថៃ៕ (ប្រភពពី Thailand Posts)
ចែករំលែកព័តមាននេះ