ADផ្ទាំងផ្សព្វផ្សាយពាណិជ្ជកម្ម

Picture

កា​មេ​រូ​ន​ដកខ្លួន​ពី​ការ​ប្រកួត​មិត្តភាព​ទល់​នឹង​រុ​ស្ស៊ី តាម​បញ្ជា​រដ្ឋាភិបាល​របស់​ខ្លួន

9 ខែ មុន

កា​មេ​រូ​ន ៖ រដ្ឋាភិបាល​នៃ​ប្រទេស​កា​មេ​រូ​ន ត្រូវ​បាន​រាយការណ៍​ថា បាន​រារាំង​ផែនការ​សម្រាប់​ក្រុម

កា​មេ​រូ​ន ៖ រដ្ឋាភិបាល​នៃ​ប្រទេស​កា​មេ​រូ​ន ត្រូវ​បាន​រាយការណ៍​ថា បាន​រារាំង​ផែនការ​សម្រាប់​ក្រុមបាល់ទាត់​ជម្រើសជាតិ​របស់​ខ្លួន ដើម្បី​ប្រកួត​លក្ខណៈ​មិត្តភាព​អន្តរជាតិ​ជាមួយនឹង​ប្រទេស​រុ​ស្ស៊ី នៅ​ក្នុង​ទីក្រុង​មូ​ស្គូ នា​ខែ​ក្រោយ​។

ជំនួប​នេះ គឺជា​ការ​ប្រកួត​លើក​ដំបូង​របស់​កា​មេ​រូ​ន​នៅ​លើ​ទឹកដី​រុ​ស្ស៊ី ដែល​គ្រោង​នឹង​ធ្វើ​ឡើង​នៅ​កីឡដ្ឋាន Luzhniki នៅ​ទីក្រុង​មូ​ស្គូ នា​ថ្ងៃ​ទី​១៥ ខែមិថុនា ឆ្នាំ​២០២៣ ខាង​មុខ​នេះ ប៉ុន្តែ​ការ​ប្រកួត​ត្រូវ​បាន​លុប​ចោល បន្ទាប់​ពី​ការ​អន្តរាគមន៍​ផ្ទាល់​ពី​រដ្ឋាភិបាល​កា​មេ​រូ​ន​។ នេះ​បើ​យោង​តាម​កាសែត​រុ​ស្ស៊ី Sport Express បាន​ចេញផ្សាយ ខណៈ​ដែល​ប្រភព​ប្រព័ន្ធ​ផ្សព្វផ្សាយ ដែល​តំណាង​ឱ្យ​អាជ្ញាធរ​បាល់ទាត់​ប្រទេស​កា​មេ​រូ​ន មិន​បាន​ផ្តល់​ការ​បំភ្លឺ​បន្ថែម​លើ​របាយការណ៍​នេះ​ទេ​។

កាលពី​ខែ​មុន សហព័ន្ធ​បាល់ទាត់​ប្រទេស​រុ​ស្ស៊ី (RFU) ក្រោម​ការ​ដឹកនាំ​របស់​លោក Alexander Dyukov បាន​ចូលរួម​ក្នុង​ការ​ពិភាក្សា​ជាមួយ​អ្នកតំណាង​នៃ​ក្រុមបាល់ទាត់​អាហ្វ្រិក​សំខាន់​ៗ​ជា​ច្រើន​ក្នុង​គោលបំណង​រៀបចំ​ការ​ប្រកួត​មិត្តភាព​នៅ​ឆ្នាំ​នេះ ហើយ​កាលពី​ខែមេសា​កន្លង​ទៅ លោក Maksim Mitrofanov អគ្គលេខាធិការ​សហព័ន្ធ​បាល់ទាត់​រុ​ស្ស៊ី​បាន​អះអាង​ថា កិច្ចព្រមព្រៀង​បឋម​ត្រូវ​បាន​ធ្វើ​ឡើងជា​មួយ​បណ្តា​ប្រទេស​មួយ​ចំនួន​។

កន្លង​មក ក្រុម​ជម្រើសជាតិ​រុ​ស្សី​គ្រោង​នឹង​ធ្វើការ​ប្រកួត​មិត្តភាព​អន្តរជាតិ​ជាមួយនឹង​ប្រទេស​បូ​ស្នី និង​ហឺ​ហ្សី​ហ្គូ​វី​ណា (Bosnia and Herzegovina) ប៉ុន្តែ​បន្ទាប់​ពី​មានការ​រិះគន់​យ៉ាង​ចាស់ដៃ កីឡាករ​បូ​ស្នី​បាន​សម្រេច​ដកខ្លួន​ចេញពី​ការ​ប្រកួត​។

គួរ​បញ្ជាក់​ថា ក្រុមបាល់ទាត់​ជម្រើសជាតិ និង​ក្លិប​អាជីព​របស់​រុ​ស្ស៊ី នៅ​តែ​ត្រូវ​បាន​ផ្អាក​ពី​ការ​ប្រកួត​ធំ​ៗ​ភាគច្រើន បន្ទាប់​ពីរ​លក​នៃ​ការ​ដាក់​ទណ្ឌកម្ម​លើ​ប្រទេស​រុ​ស្ស៊ី ដោយ​សហគមន៍​កីឡា​អន្តរជាតិ ដែល​ផ្តើម​ចេញពី​ការ​ឈ្លានពាន​របស់​ទីក្រុង​មូ​ស្គូ​លើ​អ៊ុយ​ក្រែ​ន កាលពី​ឆ្នាំ​មុន​។

កាលពី​ខែមីនា​កន្លង​ទៅ រុ​ស្ស៊ី​បាន​រៀបចំ​ការ​ប្រកួត​មិត្តភាព​ជាមួយ​អ៊ី​រ៉ា​ក់​នៅ​កីឡដ្ឋាន Gazprom នៅ​ក្នុង​ទីក្រុង Saint Petersburg បញ្ចប់​ទៅ​ដោយ​ម្ចាស់ផ្ទះ​រុ​ស្ស៊ី​យកឈ្នះ​ក្នុង​លទ្ធផល ២-០​។ ការ​អត្ថាធិប្បាយ​លើ​ការ​ត្រឡប់​នៃ​បាល់ទាត់​អន្តរជាតិ​របស់​រុ​ស្ស៊ី​ទល់​នឹង​អ៊ី​រ៉ា​ក់ កាលពី​ខែមីនា លោក Mitrofanov បាន​និយាយ​ថា នេះ​បង្ហាញ​ថា​អាច​ទៅ​រួច​សម្រាប់​ការ​ប្រកួត​មិត្តភាព​អន្តរជាតិ​បន្តបន្ទាប់​ទៀត​របស់​រុ​ស្ស៊ី​។

គួរ​រំលឹក​ថា កាលពី​ឆ្នាំ​មុន សហព័ន្ធ​បាល់ទាត់​ប្រទេស​រុ​ស្ស៊ី បាន​បង្កើត​ក្រុមការងារ​មួយ ដើម្បី​ពិភាក្សា​អំពី​លទ្ធភាព​ក្នុង​ការ​ផ្ទេរ​ភាព​ជា​សមាជិក​របស់​សហព័ន្ធ​បាល់ទាត់​ទ្វីបអឺរ៉ុប (UEFA) ទៅ​ចូលរួម​ជាមួយ​សហព័ន្ធ​បាល់ទាត់​ទ្វីបអាស៊ី (AFC) ជំនួស​វិញ ប៉ុន្តែ​ដំណើរការ​នៃ​ការ​ពិភាក្សា​នេះ ហាក់ដូចជា​ត្រូវ​បាន​ទុក​ចោល​វិញ​។ ទោះ​យ៉ាងណា​ភាគី​រុ​ស្ស៊ី នៅ​តែ​អះអាង​ថា បញ្ហា​នៃ​ការ​ផ្លាស់​ទៅ​សហព័ន្ធ​ទ្វីបអាស៊ី នៅ​តែ​មិន​ទាន់​រលត់​នៅឡើយ​ទេ​៕ (​ដកស្រង់​ចេញពី Inside The Games និង Irish Sun)

អត្ថបទសរសេរ ដោយ

កែសម្រួលដោយ