រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានស្នើឲ្យមានការប្រុងប្រយ័ត្នចំពោះការទទួលវប្បធម៌ពីបណ្តាប្រទេសនានាដោយស្ម័គ្រចិត្តដោយមិនខ្លាចចំពោះការឈ្លានពានវប្បធម៌នោះទេ ។ ថ្លែងក្នុងពិធីសម្ពោធសាកលវិទ្យាល័យភូមិន្ទវិចិត្រសិល្បៈ នៅទីតាំងថ្មី ព្រមទាំងចែកសញ្ញាបត្រដល់និស្សិតដែលបានបញ្ចប់ការសិក្សា…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានស្នើឲ្យមានការប្រុងប្រយ័ត្នចំពោះការទទួលវប្បធម៌ពីបណ្តាប្រទេសនានាដោយស្ម័គ្រចិត្តដោយមិនខ្លាចចំពោះការឈ្លានពានវប្បធម៌នោះទេ ។
ថ្លែងក្នុងពិធីសម្ពោធសាកលវិទ្យាល័យភូមិន្ទវិចិត្រសិល្បៈ នៅទីតាំងថ្មី ព្រមទាំងចែកសញ្ញាបត្រដល់និស្សិតដែលបានបញ្ចប់ការសិក្សា នាព្រឹកថ្ងៃទី២៤ ខែឧសភា ឆ្នាំ២០២៣ សម្ដេចតេជោ ថ្លែងយ៉ាងដូច្នេះថា ៖ «ការឈ្លានពានខាងវប្បធម៌ខ្ញុំអត់ជឿទេ ខ្ញុំនៅតែអះអាងថា មិនមានការ ឈ្លានពានវប្បធម៌នោះទេ តែអ្វីដែលភ័យខ្លាចបំផុត គឺការទទួលយកដោយការស្ម័គ្រចិត្តនេះទើបជារឿងដែលត្រូវប្រុងប្រយ័ត្ន» ។
សម្ដេចតេជោ ហ៊ុន សែន ក៏បានផ្ដល់អនុសាសន៍ជំរុញឱ្យក្រសួងវប្បធម៌ និងវិចិត្រសិល្បៈក្រសួងធម្មការ និងសាសនា និងគ្រប់ផ្នែកពាក់ព័ន្ធត្រូវរួមគ្នារក្សាឱ្យបាននូវទម្រង់ដើមនៃវប្បធម៌ខ្មែររាល់ពេលកសាង ឬរៀបចំសិល្បៈណាមួយត្រូវធ្វើឱ្យបានត្រឹមត្រូវតាមក្បួនខ្នាតបញ្ជាក់ឱ្យបានច្បាស់លាស់នៃសម័យកាលសិល្បៈនីមួយៗ ដើម្បីជៀសវាងការនាំឱ្យមានការយល់ច្រឡំដល់អ្នកជំនាន់ក្រោយ ។
សម្ដេចតេជោ បានដាស់តឿនឱ្យមានការប្រុងប្រយ័ត្នចំពោះវប្បធម៌ខ្មែរ ដូចជាការកសាងបដិមា ព្រះវិហារ សំណង់ ឬការច្នៃម៉ូដសម្លៀកបំពាក់បុរាណ ឬការបង្កើតសិល្បៈ ឬក៏ការធ្វើអ្វីផ្សេងដែលពាក់ព័ន្ធនឹងវប្បធម៌ខ្មែរ គឺត្រូវធ្វើឱ្យបានត្រឹមត្រូវតាមទម្រង់ដើម ឬតាមក្បួនខ្នាតដែលបន្សល់ទុកពីដូនតាជំនាន់មុន ។
សម្ដេចតេជោ ថ្លែងលើកឡើងយ៉ាងដូច្នេះថា៖ «ប្រយ័ត្ន១០០ឆ្នាំក្រោយ ឬ៥០ឆ្នាំក្រោយ បែរជាអ្នកជំនាន់ក្រោយនោះដែលទទួលតំណពីយើងអត់ត្រូវតាមក្បួនខ្នាតដែលខ្ញុំសូមស្នើឱ្យមានការប្រុងប្រយ័ត្ន ពិសេសបញ្ហាបដិមា រូបចម្លាក់ផ្សេងៗ» ។
ជាមួយគ្នានោះដែរ សម្ដេចតេជោ ហ៊ុន សែន បានបន្តដាស់តឿនថា ចំពោះផ្នែកសម្លៀកបំពាក់បុរាណក៏ត្រូវប្រសិទ្ធនាមឱ្យច្បាស់ថា នៅសម័យណាៗ ព្រោះសិល្បៈមានទម្រង់ផ្សេងៗតាមសម័យកាល ដូចជាសម័យអាណាចក្រភ្នំ អាណាចក្រចេនឡា សម័យអង្គរ សម័យចតុមុខ សម័យលង្វែក សម័យឧដុង្គ សម័យអាណានិគមជាដើម ។
នៅចំពោះថ្នាក់ដឹកនាំក្រសួងស្ថាប័នពាក់ព័ន្ធ សម្ដេចតេជោ នាយករដ្ឋមន្ត្រីមិនជឿសោះឡើយ ចំពោះការផ្លាស់ប្ដូរវប្បធម៌របស់ជាតិសាសន៍ណាមួយដោយសារមានការបង្ខិតបង្ខំ ឬដោយការឈ្លានពានវប្បធម៌ពីសំណាក់ជាតិសាសន៍ដទៃតែអ្វីដែលគួរឱ្យព្រួយបារម្ភនោះ គឺខ្លាចតែការផ្លាស់ប្ដូរវប្បធម៌នោះធ្វើឡើងដោយការស្ម័គ្រចិត្ត ឬក៏មកពីការយល់ច្រឡំ ធ្វើមិនច្បាស់លាស់មិនត្រឹមត្រូវតាមក្បួនខ្នាត ឬទម្រង់មរតកដើម ។
សម្ដេចតេជោ បានរំឭកដល់រយៈកាលដែលបារាំងបានដាក់អាណានិគមមកលើកម្ពុជាជាង៩០ឆ្នាំក៏ពិតមែន ប៉ុន្តែបារាំងមិនអាចកែប្រែវប្បធម៌កម្ពុជាបាននោះទេ ព្រោះប្រជាជនកម្ពុជាមិនចង់ទទួលវប្បធម៌បារាំងនោះឡើយ ក្នុងនោះវត្តអារាមរបស់ខ្មែរក៏នៅរក្សាទុកអក្សរសាស្ត្របានគង់វង្ស និងមានអ្នកប្រាជ្ញមួយចំនួនក៏បានជួយជ្រោមជ្រែងការពារវប្បធម៌ខ្មែរពីបុរាណមកដែរ ។
សម្ដេចបានលើកឡើងនូវករណីវត្តខ្លះនៅពេលកសាងរូបព្រះពុទ្ធបដិមា គឺប្រើពុម្ពចាក់មិនត្រឹមត្រូវតាមក្បួនខ្នាត ដូច្នេះត្រូវប្រុងប្រយ័ត្នប្រកបដោយយកចិត្តទុកដាក់ចំពោះក្បួនខ្នាតនៃការកសាងអ្វីដែលមួយដែលពាក់ព័ន្ធនឹងវប្បធម៌ខ្មែរសុទ្ធសាធ ។
សម្ដេចតេជោ នាយករដ្ឋមន្ត្រីក៏បានហាមប្រាមចំពោះការវាយបំផ្លាញចោលនូវព្រះវិហារកុដិ ឬសំណង់បុរាណដែលមានតម្លៃផ្នែកវប្បធម៌ ព្រោះនឹងនាំទៅដល់ការបាត់បង់កេរដំណែលដូនតា និងមរតកជំនាន់ដើម និងនាំឱ្យបាត់ស្លាកស្នាមនៃក្បួនខ្នាតដើមផងដែរ ៕
ចែករំលែកព័តមាននេះ