ញ៉ាក់សាច់! ម្ចាស់ពាន World Cup 2022 ណាត់ម្ចាស់មេដាយមាសស៊ីហ្គេមលើកទី៣២ ប៉ះគ្នាខែក្រោយ
អាហ្សង់ទីន ៖ កំពូលខ្សែប្រយុទ្ធ Lionel Messi នឹងរួមដំណើរជាមួយក្រុមបាល់ទាត់ជម្រើសជាតិអាហ្ស
អាហ្សង់ទីន ៖ កំពូលខ្សែប្រយុទ្ធ Lionel Messi នឹងរួមដំណើរជាមួយក្រុមបាល់ទាត់ជម្រើសជាតិអាហ្សង់ទីន ដែលជាម្ចាស់ជើងឯកពានរង្វាន់ World Cup ឆ្នាំ២០២២ ធ្វើដំណើរមកកាន់ទ្វីបអាស៊ី នាខែក្រោយ ដើម្បីធ្វើការប្រកួតទេសចរណ៍មិត្តភាពអន្តរជាតិជាមួយនឹងអូស្ត្រាលី និងឥណ្ឌូណេស៊ី។
អាហ្សង់ទីន នឹងត្រូវប៉ះអូស្ត្រាលី នៅថ្ងៃទី១៥ ខែមិថុនា ខាងមុខនេះ នៅឯកីឡដ្ឋាន Workers’ Stadium នៅក្នុងទីក្រុងប៉េកាំង ប្រទេសចិន។ ជាមួយគ្នានោះ សហព័ន្ធកីឡាបាល់ទាត់អាហ្សង់ទីន ក៏បានប្រកាសថា ពួកគេក៏នឹងធ្វើការប្រកួតជាមួយនឹងឥណ្ឌូណេស៊ី នៅឯទីក្រុងហ្សាកាតា នាថ្ងៃទី១៩ ខែមិថុនា ផងដែរ។
ជាមួយនឹងការប្រកាសនេះ បានក្លាយជាដំណឹងដ៏រីករាយ និងភ្ញាក់ផ្អើលមួយសម្រាប់អ្នកគាំទ្រនៅអាស៊ី ជាពិសេសអ្នកគាំទ្រឥណ្ឌូណេស៊ី ដែលអន្ទះសាររង់ចាំការប្រកួតដ៏អស្ចារ្យមួយនេះ ដ្បិតអាហ្សង់ទីន ម្ចាស់ជើងឯកពានរង្វាន់ World Cup 2022 ត្រូវប៉ះឥណ្ឌូណេស៊ី ដែលមានកីឡាករចេញពីឈុតអាយុក្រោម២២ឆ្នាំ ដែលឈ្នះមេដាយមាសពីកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា ដែលទើបតែបញ្ចប់ កាលពីពេលថ្មីៗនេះ។
គួររំលឹកជូនថា អាហ្សង់ទីន ឈ្នះម្ចាស់ជើងឯកពានរង្វាន់ World Cup 2022 ដែលធ្វើឡើងនៅប្រទេសកាតា បន្ទាប់ពីបានយកឈ្នះបារាំង ដោយការទាត់បាល់ប៉េណាល់ទីកាត់សេចក្តីលទ្ធផល ៤-២ ក្រោយបញ្ចប់១២០នាទី ស្មើគ្នាលទ្ធផល ៣-៣។ ចំណែក ក្រុមជម្រើសជាតិអាយុក្រោម២២ឆ្នាំ ឥណ្ឌូណេស៊ី ឈ្នះមេដាយមាសកីឡាស៊ីហ្គេមលើកទី៣២ បន្ទាប់ពីបានយកឈ្នះលើថៃ នៅក្នុងម៉ោងបន្ថែម១៥នាទី ២ដង ដោយលទ្ធផល ៥-២ នៅក្នុងការប្រកួតដ៏ចម្រូងចម្រាស ដែលប្រព្រឹត្តទៅនៅពហុកីឡដ្ឋានជាតិអូឡាំពិក រាជធានីភ្នំពេញ៕ (ដកស្រង់ចេញពី AP និង Goal.com)
ចែករំលែកព័តមាននេះ