- ភ្នំពេញ
រាជធានីភ្នំពេញ ៖ កាលពីថ្ងៃទី២១ ខែឧសភា ឆ្នាំ២០២៣ មានការភ្ញាក់ផ្អើលជាខ្លាំងដោយសារតែព្រះតេជគុណ សាន សុជា បានចេញវីដេអូ ប្រកាសថា…
រាជធានីភ្នំពេញ ៖ កាលពីថ្ងៃទី២១ ខែឧសភា ឆ្នាំ២០២៣ មានការភ្ញាក់ផ្អើលជាខ្លាំងដោយសារតែព្រះតេជគុណ សាន សុជា បានចេញវីដេអូ ប្រកាសថា…
រាជធានីភ្នំពេញ ៖ កាលពីថ្ងៃទី២១ ខែឧសភា ឆ្នាំ២០២៣ មានការភ្ញាក់ផ្អើលជាខ្លាំងដោយសារតែព្រះតេជគុណ សាន សុជា បានចេញវីដេអូ ប្រកាសថា ព្រះអង្គសូមនមស្សកាលា និងចម្រើនពរលាពីភាពជាព្រះសង្ឃ ដោយព្រះអង្គលាចាកសិក្ខាបទ (សឹក) នៅម៉ោង៥ល្ងាច (ម៉ោងនៅអូស្ត្រាលី) ឬប្រហែលជាម៉ោង២រសៀលម៉ោងនៅស្រុកខ្មែរ ។
តាមរយៈវីដេអូឃ្លីបមានរយៈពេលប្រមាណ៣នាទី ព្រះតេជគុណ សាន សុជា មិនបានបញ្ជាក់ពីមូលហេតុនៃការលាចាកសិក្ខាបទរបស់ព្រះអង្គឡើយ ។ ព្រះអង្គបានចាកចេញពីប្រទេសកម្ពុជាទៅគង់នៅប្រទេសអូស្ត្រាលីយូរឆ្នាំមកហើយ ។ កន្លងមក ព្រះតេជគុណ សាន សុជា បានផ្តល់ការអប់រំល្អៗមានប្រយោជន៍ ពិសេសព្រះអង្គលើកហេតុផលឱ្យប្រជាពុទ្ធបរិស័ទយល់ត្រូវ និងយល់ដោយបញ្ញាក្នុងមាគ៌ាព្រះពុទ្ធសាសនា ។
ព្រះគ្រូ សាន សុជា កើតនៅខែធ្នូ ឆ្នាំ១៩៧៦ នៅភូមិទួលតាអុក ឃុំកំពង់យោល ស្រុកទ្រាំង ខេត្តតាកែវ ។ សម្រាប់ការចូលសាងផ្នូស ព្រះគ្រូ សាន សុជា បានឱ្យដឹងថា ព្រះអង្គមិនដែលនឹកស្រមៃចង់ចេញបួសទេគោលគំនិតចង់ធ្វើជាគ្រូបង្រៀនជាអ្នកចម្រៀង និងជាវិចិត្រករ ប៉ុន្តែខ្សែជីវិត បច្ចុប្បន្នមិនឃ្លាតឆ្ងាយពីស្រមោលអតីតៈដែលជាឧបនិស្ស័យធ្លាប់សន្សំមកឡើយ ។
ព្រះគ្រូ សាន សុជា បានលាចាកសិក្ខាបទ នៅថ្ងៃទី២១ ខែឧសភា ឆ្នាំ២០២៣ ពីទឹកដីប្រទេសអូស្ត្រាលី ក្រោយសាងផ្នួសអស់រយៈពេល ៣១ឆ្នាំ ។ មុនលាចាកសិក្ខាបទជាភិក្ខុ ព្រះតេជគុណ សាន សុជា មានសង្ឃដីកា ប្រាប់ដល់ពុទ្ធបរិស័ទថា «ញាតិញោមអាចចាកចេញពីអាត្មាបាន តែកុំចាកចេញពីព្រះធម៌» ។
ព្រះគ្រូ សាន សុជា លើកឡើងថា«ខ្ញុំព្រះកុរណាសម្រេចដាក់ (សឹក) នៅពេលនេះមិនមែនព្រោះអ្វីទាំងអស់ គឺព្រោះតែជាគោលការណ៍ដំណើរជីវិតផ្ទាល់ខ្លួនប៉ុណ្ណោះ មិនមានសម្ពាធអ្វី សូម្បីតែរស់នៅទីនេះ ប្រជាពុទ្ធបរិស័ទយកចិត្តទុកដាក់» ។ ព្រះគ្រូ សាន សុជា បានផ្តាំដល់ពុទ្ធបរិស័ទទាំងអស់ថា ក្រោយពេលលាចាកសិក្ខាបទ គ្រហស្ថ សាន សុជា មិនទាមទារអ្វីពីពុទ្ធបរិស័ទទៀតឡើយ ។ ពោលលោកនឹងបន្តរស់នៅដោយពឹងផ្អែកលើខ្លួនឯង។
ការសម្រេចចិត្តសឹករបស់លោកគ្រូ សាន សុជា បានធ្វើឱ្យពុទ្ធបរិស័ទជាច្រើន រួមទាំងព្រះសង្ឃ បានបង្ហាញការភ្ញាក់ផ្អើល និងសោកស្តាយ ។ លោកគ្រូ សាន សុជា ជាអតីតព្រះសង្ឃមួយអង្គក្នុងចំណោមព្រះសង្ឃជាច្រើនទៀត នាសម័យកាលនេះដែលត្រូវបានមហាជន និងពុទ្ធបរិស័ទ តែងតែគោរព និងប្រតិបត្តិនូវការទូន្មានព្រះធម៌របស់ព្រះអង្គ ។ ក្នុងអំឡុងពេលសម្រេចចិត្តលាចាកផ្នួស ពេលនេះលោកគ្រូ សាន សុជា បានផ្តាំដល់ពុទ្ធបរិស័ទថា «កុំចង់បានរបស់ដែលអត់ កុំជាប់នឹងរបស់ធ្លាប់មាន អ្វីៗមានហេតុទើបកើតឡើង»។
កន្លងមក ក៏មានព្រះសង្ឃមិនតិចអង្គទេ ដែលបាននិមន្តទៅគង់នៅអាមេរិក បារាំង កាណាដា និងអូស្ត្រាលីជាដើម ហើយក៏បានសម្រេចចិត្តសឹកលាចាកផ្នួស ។ អតីតព្រះសង្ឃដែលទទួលការគាំទ្រពីប្រជាពុទ្ធបរិស័ទទាំងនោះក៏បានបន្តរស់នៅជាប្រជាពលរដ្ឋធម្មតា នៅតាម សហគមន៍ខ្មែរយើងនៅបារាំង អាមេរិក កាណាដា និងនៅអូស្ត្រាលី ហើយយកប្រពន្ធ និងមានកូន ប្រកបរបរចិញ្ចឹមជីវិតជាធម្មតា ។
យ៉ាងណាក៏ដោយចុះ ករណីរបស់លោកគ្រូ សាន សុជា ក៏មិនខុសពីអតីតព្រះសង្ឃជាច្រើនកន្លងមកទេ ។ លោកគ្រូ សាន សុជា ក្នុងភាពជាគ្រហស្ថ ក្នុងវ័យ៤៧ឆ្នាំ នៅឆ្នាំនេះក៏អាចរៀបការប្រពន្ធ និងកសាងគ្រួសារ ហើយបន្តរស់នៅប្រទេសអូស្ត្រាលី ក្នុងជីវិតដូចពលរដ្ឋខ្មែរយើងផ្សេងទៀត ។
ធម្មទានរបស់លោកគ្រូ សាន សុជា ក៏នៅតែមានតម្លៃសម្រាប់ប្រជាពុទ្ធបរិស័ទតាមរយៈការទស្សនា និងស្តាប់តាមហ្វេសប៊ុក និងយូធូប ។ ជាងនេះទៅទៀត ទោះជាភាពជាក្នុងភាពគ្រហស្ថ ប៉ុន្តែលោកគ្រូ សាន សុជា ក៏អាចបន្តចែករំលែក ឬក៏បង្រៀនធម៌ដល់ប្រជាពុទ្ធបរិស័ទ ឬក៏បង្រៀនព្រះសង្ឃក៏បានដូចអ្វីដែលលោកគ្រូៗ ជាច្រើននាក់បានធ្វើកន្លងមក ក្នុងនោះមានទាំងលោកគ្រូ ប៊ុត សាវង្ស ជាដើម ។
សំខាន់ពេលនេះ មិនអាស្រ័យលើលោកគ្រូ សាន សុជា នៅជាព្រះសង្ឃ ឬក៏សឹកជា ឧបាសក ទេ តែសំខាន់ប្រជាពុទ្ធបរិស័ទម្នាក់ៗ សូមសាងចិត្តឱ្យជ្រះថ្លា គោរពប្រតិបត្តិព្រះពុទ្ធសាសនា ហើយជឿដោយបញ្ញា ធ្វើតែអំពើល្អ និងយ៉ាងហោចណាស់ ពុទ្ធបរិស័ទសុំកាន់ត្រឹមតែសីល៥ គឺ១-មិនផឹកស្រា ២-មិនលួចរបស់គេ ៣-មិនប្រព្រឹត្តិខុសក្នុងកាម ៤-មិននិយាយកុហក់ និង៥-មិនសម្លាប់សត្វ ។ នោះសង្គមគ្រួសារ និងសង្គមជាតិយើងនឹងបានសុខសាន្តហើយ ៕
ចែករំលែកព័តមាននេះ