ប្រធាន FIFA លើកពីបញ្ហាបាល់ទាត់នៅអាស៊ាន ក្រោយការប៉ះទង្គិចរវាងឥណ្ឌូណេស៊ី និងថៃ
ស្វីស ៖ លោក Gianni Infantino ប្រធានសហព័ន្ធកីឡាបាល់ទាត់ពិភពលោក FIFA ក៏បានបញ្ចេញមតិ
ស្វីស ៖ លោក Gianni Infantino ប្រធានសហព័ន្ធកីឡាបាល់ទាត់ពិភពលោក FIFA ក៏បានបញ្ចេញមតិខ្លះៗ ក៏ដូចជាការរិះគន់ ជុំវិញរឿងហេតុដែលបានកើតឡើងក្នុងការប្រកួតចុងក្រោយ វិញ្ញាសាបាល់ទាត់បុរសនៃព្រឹត្តិការណ៍កីឡាស៊ីហ្គេមលើកទី៣២ ឆ្នាំ ២០២៣ នៅប្រទេសកម្ពុជា រវាងក្រុមជម្រើសជាតិអាយុក្រោម២២ឆ្នាំ ឥណ្ឌូណេស៊ី ជាមួយនឹងថៃ កាលពីថ្ងៃទី១៦ ខែឧសភា ឆ្នាំ ២០២៣ កន្លងទៅ។ នេះបើយោងតាមប្រភពពីសារព័ត៌មានឥណ្ឌូណេស៊ី Liputan 6 ចេញផ្សាយកាលពីថ្ងៃទី២០ ខែឧសភា កន្លងទៅ។
ថ្នាក់ដឹកនាំកំពូលរបស់ FIFA រូបនេះ បានសម្តែងសោកស្ដាយចំពោះរឿងហេតុឈានដល់ការប្រើហិង្សារវាងក្រុមគ្រូបង្វឹក និងកីឡាករក្រុមឥណ្ឌូណេស៊ី និងថៃ នៅក្នុងការប្រកួតដ៏ចម្រូងចម្រាសបំផុត ដើម្បីដណ្តើមមេដាយមាសកីឡាស៊ីហ្គេមលើកទី៣២ ដែលឥណ្ឌូណេស៊ីបានយកឈ្នះថៃ នៅក្នុងម៉ោងបន្ថែម១៥នាទី ២ដង លទ្ធផល ៥-២ នៅឯពហុកីឡដ្ឋានជាតិអូឡាំពិក រាជធានីភ្នំពេញ។ លោក Infantino បានចាត់ទុកឈុតឆាកប្រយុទ្ធលើសមរភូមិវាលស្មៅរវាងឥណ្ឌូណេស៊ី នឹងថៃ ថា នាំមកនូវរូបភាពអវិជ្ជមានសម្រាប់វិស័យបាល់ទាត់។
ការប៉ះទង្គិចគ្នារវាងក្រុមឥណ្ឌូណេស៊ី នឹងថៃ បានក្លាយជាប្រធានបទសន្ទនាដ៏ក្តៅគគុកទាំងនៅក្នុងប្រទេស និងអន្តរជាតិ ដោយប្រព័ន្ធផ្សព្វផ្សាយធំៗបរទេសជាច្រើនបានរាយការណ៍អំពីរឿងហេតុនេះផងដែរ។ យ៉ាងណាមិញ កាលពីថ្មីៗនេះ លោក Gianni Infantino បានលើកឡើងអំពីការប៉ះទង្គិចនោះ ដោយលោកបានរិះគន់ការអភិវឌ្ឍបាល់ទាត់នៅអាស៊ាន ព្រោះវាច្រើនតែរារាំងដោយសារអំពើហិង្សា។
បុរសជនជាតិស្វីសវ័យ៥៣ឆ្នាំរូបនេះ បានលើកឡើងយ៉ាងដូច្នេះថា «បាល់ទាត់អាស៊ីអាគ្នេយ៍មានសក្តានុពលក្នុងការអភិវឌ្ឍន៍ស៊ីជម្រៅ និងទូលំទូលាយ ប៉ុន្តែនៅទីបញ្ចប់វាត្រូវបានរារាំងដោយអំពើហិ.ង្សា ទំនាក់ទំនងរវាងបាល់ទាត់ និងបញ្ហាសង្គមផ្សេងៗទៀត»។
លោកបន្ថែមថា «ជាក់ស្តែងរឿងហេតុ ដែលបានកើតឡើងកាលពីល្ងាចថ្ងៃទី ១៦ ខែឧសភា នៅពហុកីឡដ្ឋានជាតិអូឡាំពិក រាជធានីភ្នំពេញ ជារឿងអកុសលណាស់។ ប្រសិនបើវាជាបញ្ហានៃការប៉ះទង្គិចគ្នារវាងកីឡាករ ជំនួយការក្រុម និងគ្រូបង្វឹក គួរណាស់តែបញ្ឈប់វាទៅ។ រូបភាពពីការប្រកួតវគ្គផ្តាច់ព្រ័ត្រកីឡាស៊ីហ្គេមលើកទី៣២ គឺជាសារ និងរូបភាពអវិជ្ជមានខ្លាំងណាស់ក្នុងវិស័យកីឡាបាល់ទាត់»។
គួរបញ្ជាក់ថា ការប៉ះទង្គិចគ្នារវាងក្រុមឥណ្ឌូណេស៊ី នឹងថៃ ត្រូវបានសហព័ន្ធកីឡាបាល់ទាត់ទ្វីបប្រកាសបើកការបើកការស៊ើបអង្កេត។ ស្របពេលដែលសហព័ន្ធកីឡាបាល់ទាត់ប្រទេសថៃ ក៏បានធ្វើការសុំទោសចំពោះរឿងហេតុកើតឡើង ហើយថែមទាំងប្រកាសបើកការស៊ើបអង្កេតលើសមាជិករបស់ខ្លួន ដែលមានវត្តមានក្នុងហេតុការណ៍នោះ ដើម្បីដាក់ទោសទណ្ឌធ្ងន់ធ្ងរផងដែរ៕
ចែករំលែកព័តមាននេះ