ប្រទេស​ថៃ៖ ​អ្នក​វិភាគ​​ព្រមាន​ពី​ការ​កើត​មាន​​ជម្លោះ ឬ​រដ្ឋ​ប្រហារ​​​​នៅ​ប្រទេស​ថៃ ​បើ​គណបក្ស​ «​ឆ្ពោះ​ទៅ​មុខ»​​ ​មិន​​អាច​បង្កើត​រដ្ឋាភិបាល​​​នៅ​អាណត្តិ​ថ្មី​​។ ​​​លោក​​ភីឆៃ​ (Phichai​) ជា​​ប្រធាន​កម្មវិធី​សិក្សា​ពី​យុទ្ធ​សាស្ត្រ​នយោ​បាយ​ និ​ងការ​អភិវឌ្ឍ​​នៃ​វិទ្យា​ស្ថាន​ជាតិ​​បរិបាល​កិច្ច​អភិវឌ្ឍ។ ​លោក​បាន​បង្ហោះ​នៅ​លើ​ហ្វេស​ប៊ុក​នូវ​សេណារីយោ​​ដែល​អាច​នឹង​កើត​មាន​ បើ​​​គណ​បក្ស​​ឆ្ពោះ​ទៅ​មុខ​បង្កើត​រដ្ឋាភិបាល​​មិន​ចេញ​​​។ ​​បច្ចុប្បន្ន​នេះ, ​សម្ព័ន្ធ​ភាព​នយោបាយ​ដែល​ដឹក​នាំ​ដោយ​គណ​បក្ស​ឆ្ពោះ​ទៅ​មុខ​ អាច​​រក​បាន​អ្នក​តំណាង​រាស្ត្រ​៣១៣​រូប​​។ ដូច​នេះ​ ត្រូវ​ការ​សំឡេង​ពី​សមាជិក​ព្រឹទ្ធ​សភា​​​៦៦រូប​ទៀត​ដើម្បី​​​បង្កើត​រដ្ឋា​ភិបាល​​​។​

លោក​ភីឆៃ​​យល់​ថា​​​គណបក្ស​ឆ្ពោះ​ទៅ​មុខ​មាន​​សិទ្ធិ​​​ជា​អាទិភាព​​ដើម្បី​បង្កើត​រដ្ឋាភិបាល ​​ក្នុង​នាម​ជា​​បក្ស​ដែល​​​​ទទួល​បាន​អាសនៈ​ច្រើន​ជាង​គេ​​​។ ​​«​បើ​គណបក្ស​នេះ​ដឹក​នាំ​រដ្ឋាភិបាល,​ ប្រទេស​ជាតិ​មាន​​​ស្ថិរ​​​​ភាព​នយោបាយ​​។ លទ្ធិ​ប្រជា​ធិបតេយ្យ​​​រីក​ចម្រើន​, សេដ្ឋកិច្ច​ក៏​រីក​ចម្រើន​។ ប្រទេស​ថៃ​​មាន​មុខ​ មាន​មាត់​ និង​ទទួល​បាន​ការ​កោត​សរសើរ​ពី​ប្រទេស​ដទៃ​ទៀត​។ ប៉ុន្តែ​​បើ​​​​​គណបក្ស​នេះ​បង្កើត​រដ្ឋា​ភិ​បាល​មិន​ចេញទេ​​​​​​, ​ប្រទេស​ជាតិ​នឹង​​​គ្មាន​ស្ថិរភាព។ ​មាន​តែ​​ការ​បែក​បាក់​ និង​ជម្លោះ​។ បញ្ហា​នេះ​នឹង​ធ្វើ​ឱ្យ​សេដ្ឋកិច្ច​​​ធ្លាក់​ចុះ​។ កេរ្តិ៍​ឈ្មោះ​របស់​ប្រទេស​ថៃ​ក៏​ត្រូវ​ចុះ​អន់​ថយ​​ផង​ដែរ​​​នៅ​ក្នុង​ក្រសែ​ភ្នែក​របស់​ប្រទេស​ដទៃ​ទៀត»​។

ឧប​មា​ថា​​​គណបក្ស​ឆ្ពោះ​ទៅមុខ​​​បង្កើត​រដ្ឋាភិបាល​មិន​ចេញ ត្រូវ​ផ្ទេរ​សិទ្ធិ​ទៅ​ឱ្យ​​​គណបក្ស​ភឿ​ថៃ​​​វិញ​ម្ដង។ ​លោក​ភីឆៃ​យល់​ថា​ដូច​តែ​គ្នា​ទេ​។ ព្រឹទ្ធ​សភា​មិន​ប្រាកដ​ជា​បោះ​ឆ្នោត​គាំទ្រ​បេក្ខ​ភាព​លោក​ស្រី​ផែ​ថង​ថាន​ទេ​​។​ ម៉្យាង​ទៀត​ ភឿថៃ​ប្រហែល​ជា​មិន​អាច​​​អូស​ទាញ​គណបក្ស​ដទៃ​​ដូច​ជា​​​ផាឡាំង​ប្រឆារ៉ាត់ និង​ភូមិ​ចៃថៃ​ដើម្បី​​រួម​គ្នា​នៅ​ក្នុង​រដ្ឋាភិបាល​ចម្រុះ​។​ ​មូល​ហេតុ​ដោយ​សារមាន​ក្រុម​អាវ​ក្រហម​នៅ​ក្នុង​គណបក្ស​​​ភឿថៃ​​។ ដូច្នេះ​អាវ​ក្រហម​នឹង​ប្រឆាំង​​នឹង​ការ​បង្កើត​សម្ព័ន្ធ​ភាព​ជា​មួយ​​​បក្ស​​​​២​នេះ​។​

​ដូច្នេះ​ អាច​នឹង​​កើត​មាន​ការ​បែកបាក់​​ និង​ជម្លោះ​​​, ហើយ​អាច​នឹង​មាន​​​រដ្ឋ​ប្រហារ​។ ពួក​យោធា​នឹង​​​​ធ្វើ​អន្តរាគមន៍​នៅ​ក្នុង​រឿង​នេះ​​ ហើយ​ឡើង​កាន់​អំណាច​តែ​ម្ដង​​​។ នៅ​ទី​បញ្ចប់​, អ្វី​ដែល​ធ្លាប់​កើត​មាន​​ពី​អតីត​កាល​ វា​វិល​ចុះ​វិល​ឡើង​ដដែល​ជា​ដដែល​។​

​អ្នក​វិភាគ​ម្នាក់ទៀតឈ្មោះ​​យុត្ថាផន ឥស្សរៈ​ឆៃ (Yutthaporn Issarachai) ជា​គ្រូ​បង្រៀន​វិទ្យាសាស្ត្រ​នយោបាយ​​នៅ​សាកល​វិទ្យា​ល័យ​សុខោទ័យ​ លោក​ថ្លែង​ថា​ក្រុម​អ្នក​លេង​បណ្ដាញ​សង្គម​ជា​អ្នក​ដែល​មាន​​ឥទ្ធិ​ពល​​ទៅ​លើ​​ការ​សម្រេច​ចិត្ត​របស់​​គណ​បក្ស​ឆ្ពោះ​ទៅមុខ​​។​ លោក​​យល់​ថា​​ពួក​គេ​ជា​អ្នក​បោះ​ឆ្នោត​ឱ្យ​គណបក្ស​​ឆ្ពោះទៅ​មុខ។

ដូច្នេះ គណបក្ស​​ត្រូវ​តែ​​ធ្វើ​​តម្រូវ​ចិត្ត​ពួក​គេ​​​​​។​​ ​គណបក្ស​​កំពុង​​ជួប​នឹង​បញ្ហា​២​​។​ ទី១-​ បើ​គណបក្ស​​តាំង​ចិត្ត​ថា​ត្រូវ​តែ​​​ធ្វើ​វិសោធ​ន​កម្ម​មាត្រា​១១២​,​ ព្រឹទ្ធ​សភា​នឹង​បោះ​ឆ្នោត​ជំទាស់នឹង​​បេក្ខ​ភាព​លោក​ភីថា​​។ សូម្បី​តែ​គណបក្ស​នៅ​ក្នុង​សម្ព័ន្ធ​ភាព​ក៏​​ជំទាស់​​នឹង​គម្រោង​ធ្វើ​វិសោធ​នកម្ម​​​នេះ​ផង​ដែរ​​។​

ទី២- បើ​​​​មិន​សើ​រើ​មាត្រា​​​១១២​ទេ​​​, ​ពួក​អ្នក​គាំទ្រនឹង​ខក​ចិត្ត ព្រោះ​​​ពួក​គេ​​​ខំ​បោះ​ឆ្នោត​ឱ្យ​គណបក្ស​នេះ​ដើម្បី​​​កែ​មាត្រា១១២​។ ប្រធាន​គណបក្ស​សេរី​រួម​ថៃ​​ (Seri Ruam Thai Party)​ ដែល​ចូលរួម​​ជា​មួយ​គណ​បក្ស​ឆ្ពោះ​ទៅ​មុខ​​ លោក​យល់​ថា​អនុស្សា​រ​ណៈ​​យោគ​យល់​គ្នានោះ​​ហាក់​ដូច​ជា​​ភ្ជាប់​​ករណីយ​កិច្ច​ច្រើន​ពេក​សម្រាប់​គណ​បក្ស​​ដៃ​គូ​។​​ ប៉ុន្តែ​លោក​ថា​​​គ្មាន​ការ​ដាក់​បញ្ចូល​​ការ​ធ្វើ​វិសោធន​កម្ម​មាត្រា​១១២​នៅ​ក្នុង​អនុស្សារណៈ​នោះ​ទេ​។​

ប្រភព​ពី​​យោធា​ថៃ​បង្ហើប​ឱ្យ​ដឹង​ថា​ទោះ​បី​គណបក្ស​ឆ្ពោះ​ទៅ​មុខ​បង្កើត​រដ្ឋាភិបាល​មិន​ចេញ​ ក៏​គ្មាន​រដ្ឋ​ប្រហារ​ទេ​។​ ប៉ុន្តែ​អ្នក​គាំ​ទ្រ​អាច​នឹង​​​ហែ​បាតុកម្ម​​​នៅ​តាម​ផ្លូវ​។​ ​កាល​ពី​​មុន, ​​មាន​​​មែន​រដ្ឋ​ប្រហារ​ នៅ​ពេល​​​រដ្ឋាភិបាល​​បង្កើត​​​មិន​ចេញ​។ ប៉ុន្តែ​ឥឡូវ​នេះ​គ្មាន​ទៀត​ឡើយ​​។​ ​យ៉ាង​ខ្លាំង​, ​ពួក​យោធា​​​​បាន​ត្រឹម​​ចាត់​វិធាន​ការ​​​ដើម្បី​ការ​ពារ​សណ្ដាប់​ធ្នាប់​។ អគ្គ​បញ្ជា​ការ​កង​ទ័ព​ថៃ​​បញ្ជាក់​ថា «​​គ្មាន​ការ​ធ្វើ​រដ្ឋ​ប្រហារ​ទេ​ដរាប​ណា​គាត់​នៅ​កាន់​តំណែង​នេះ​។​ លោក​ថា​រដ្ឋ​ប្រហារ​គឺ​០%​។ ពាក្យ​រដ្ឋ​ប្រហារ​មិន​សម​មាន​នៅ​ក្នុង​​ការ​និយាយ​ស្ដី​របស់​មនុស្ស​ណា​ម្នាក់​ឡើយ​​»​៕​

ប្រភព៖ Bangkok Post
https://www.bangkokpost.com/thailand/politics/2574864/conflict-or-coup-possible-warns-academic