កុមារាជនជាតិអាមេរិកាំងម្នាក់ឈ្មោះ អេលៀត ថេនណឺ (Elliott Tanner) ដែលមានអាយុទើបតែ១៣ឆ្នាំប៉ុណ្ណោះ, ប៉ុន្តែបានបញ្ចប់ថ្នាក់បរិញ្ញាបត្ររូបវិទ្យាដោយជោគជ័យពីសាកលវិទ្យាល័យមីនេសូតា (University of Minnesota)។ គាត់មិនទាន់បញ្ចប់មហិច្ឆតារបស់គាត់ត្រឹមហ្នឹងទេ។ គាត់ត្រៀមរៀនយកសញ្ញាប័ត្រថ្នាក់បណ្ឌិតថែមទៀតនៅក្នុងពេលឆាប់ៗនេះ។
ដំណឹងនេះបើស្ដាប់មួយភ្លែតហាក់ដូចជាមិនគួរឱ្យជឿ។ ប៉ុន្តែវាមិនមែនជារឿងថ្មីទេដែលមនុស្សអាយុក្រោមដប់ឆ្នាំ ឬជាងដប់ឆ្នាំអាចរៀនចប់ថ្នាក់បរិញ្ញាបត្រ ឬថ្នាក់បណ្ឌិត។ កាលពីឆ្នាំ១៩៩២, កុមារាឈ្មោះមៃឃើល ឃានី (Michael Kearney) អាយុត្រឹមតែដប់ឆ្នាំប៉ុណ្ណោះ អាចរៀនចប់បរិញ្ញាបត្រនរវិទ្យាពីសាកលវិទ្យាល័យអាឡាបាម៉ាខាងត្បូង (South Alabama)។ មានមនុស្សរាប់សិបនាក់ទៀតដែលរៀនចប់បណ្ឌិតនៅអាយុជាងដប់ឆ្នាំ។ មនុស្សចំពូកនេះត្រូវគេចាត់ទុកជាសិស្សពូកែវ័យក្មេង (prodigy)។
ប៉ាម៉ាក់របស់អេលៀតមានមោទកភាពយ៉ាងខ្លាំងដែលកូនរបស់ខ្លួនរៀនចប់បរិញ្ញាបត្រទាំងវ័យក្មេង។ ទៅថ្ងៃមុខ, អេលៀតចង់ធ្វើជាគ្រូបង្រៀនមហាវិទ្យាល័យ និងជាអ្នកឯកទេសខាងរូបវិទ្យា។ ប៉ាម៉ាក់របស់អេលៀតដឹងថាកូនរបស់ខ្លួនមានសតិបញ្ញាខ្ពស់តាំងពីមុនពេលចូលរៀនថ្នាក់ទី១ទៅទៀត។ អេលៀតពូកែភាសា និងគណិតវិទ្យាតាំងពីអាយុ៣ឆ្នាំ។ អាយុ៥ឆ្នាំ នៅពេលអេលៀតចូលរៀនថ្នាក់មត្តេយ្យបានតែបន្តិចប៉ុណ្ណោះ, គណៈគ្រប់គ្រងសាលាសង្កេតឃើញថាសមត្ថភាពរបស់គាត់ខ្ពស់ជាងកម្មវិធីសិក្សា។ ដូចនេះ គាត់អាចរៀននៅថ្នាក់ដែលខ្ពស់ជាងនេះ។
ប៉ាម៉ាក់ក៏សម្រេចចិត្តបង្រៀនកូននៅផ្ទះ។ ពួកគាត់សង្កេតឃើញថាកូនមានសមត្ថភាពខ្ពស់ជាងកម្មវិធីសិក្សាឆ្ងាយណាស់។ នៅពេលអេលៀតរៀនឆាប់រហ័សបែបនេះ ធ្វើឱ្យប៉ាម៉ាក់អស់សមត្ថភាពនឹងបង្រៀនកូនតទៅទៀត។ នៅក្នុងបន្ទប់របស់អេលៀតសុទ្ធតែសៀវភៅគរដូចភ្នំ។ នៅពេលចាប់សៀវភៅយកមកអានភ្លាម, អេលៀតអាចយល់បានស៊ីជម្រៅ-គ្រប់ជ្រុងជ្រោយនូវអត្ថន័យខ្លឹមសារដែលមាននៅក្នុងសៀវភៅ។ លុយដែលប៉ាម៉ាក់ឱ្យគាត់សម្រាប់ចាយ, គាត់សុខចិត្តយកទៅទិញសៀវភៅសម្រាប់អាន ជាជាងទិញរបស់ឥតប្រយោជន៍។
ត្រឹមអាយុ៩ឆ្នាំ, អេលៀតរៀនចេះទាំងអស់នូវកម្មវិធីសិក្សាចាប់ពីថ្នាក់ទី១ដល់ថ្នាក់ទី១២។ ប៉ាម៉ាក់ក៏យកកូនទៅរៀនថ្នាក់មហាវិទ្យាល័យនៅក្នុងសហគមន៍។ នៅពេលចូលរៀនរូបវិទ្យានៅទីនោះ, គាត់មានកម្លាំងចិត្តកាន់តែខ្លាំងដើម្បីសិក្សាស៊ីជម្រៅអំពីអាថ៌កំបាំងនៅក្នុងពិភពលោក។ អាយុ១១ឆ្នាំ, អេលៀតផ្លាស់ទៅរៀនបរិញ្ញាបត្ររូបវិទ្យា និងគណិតវិទ្យានៅសាកលវិទ្យាល័យមីនេសូតា (Minnesota)។ ដោយសារគាត់រៀនពូកែពេក ធ្វើឱ្យគ្រូបង្រៀន និងមិត្តរួមថ្នាក់របស់គាត់ភ្ញាក់ផ្អើលយ៉ាងខ្លាំង។
នៅពេលគាត់ចូលរៀនដំបូង, និស្សិតខ្លះឆ្លល់ថា «យកកូនក្មេងតូចតែមួយមករៀនថ្នាក់មហាវិទ្យាល័យធ្វើអ្វី?» ប៉ុន្តែក្រោយពេលរៀនបានតែបន្តិច ទើបគ្រប់គ្នាចាប់ផ្ដើមភ្លឺភ្នែក។ ក្រោយពីរៀនចប់បរិញ្ញាបត្រ, សាកលវិទ្យាល័យយល់ថាអេលៀតមិនចាំបាច់រៀនថ្នាក់អនុបណ្ឌិតទេ គឺរៀនថ្នាក់បណ្ឌិតតែម្ដងនៅរដូវស្លឹកឈើជ្រុះ។ ប៉ុន្តែគាត់កំពុងប្រឈមនឹងបញ្ហាខ្វះខាតថវិកា។
សាកលវិទ្យាល័យគ្មានគោលការណ៍ផ្ដល់ជូនគាត់នូវប្រាក់អាហារូបករណ៍, ការធានារ៉ាប់រងសុខភាព និងថ្លៃចំណាយផ្សេងៗទៀតទេ។ ទម្រាំរៀនចប់ថ្នាក់បណ្ឌិត, អេលៀតត្រូវចំណាយលុយប្រហែល៩ម៉ឺនដុល្លារ។ នេះជាបន្ទុកដ៏ធំគួរសមសម្រាប់គ្រួសាររបស់គាត់។ ប៉ាម៉ាក់របស់គាត់ពុំដែលនឹកស្មានទាល់តែសោះថាកូនរបស់ខ្លួនអាចចូលរៀនបរិញ្ញាបត្រនៅអាយុ៩ឆ្នាំ។
ឥឡូវនេះ កូនត្រូវចូលរៀនថ្នាក់បណ្ឌិតថែមទៀត។ ដូច្នេះ ពួកគាត់មិនអាចរកលុយទាន់ពេលវេលាដើម្បីបង់ថ្លៃសាលាទេ។ ពួកគាត់ចាប់ផ្ដើមបង្កើតមូលនិធិទ្រទ្រង់ការសិក្សា និងប្រមូលបានលុយជាង២ម៉ឺន ៨ពាន់ដុល្លារ។ ទឹកប្រាក់ប៉ុណ្ណេះអាចយកទៅរៀនសូត្របានរយៈពេល១ឆ្នាំ, ខណៈដែលថ្នាក់បណ្ឌិតត្រូវរៀនរយៈពេលបីឆ្នាំសម្រាប់និស្សិតទូទៅ។ គេមិនទាន់ដឹងថាកុមារអេលៀតអាចនឹងរៀនបានឆាប់រហ័សជាងនេះ ឬយ៉ាងណា ព្រោះគាត់ជាមនុស្សដែលមានសមត្ថភាពខ្ពស់មិនធម្មតា៕
ប្រភព៖ Live Science, People Magazine
https://www.livescience.com/13-year-old-physics-graduate-elliott-tanner
https://people.com/human-interest/13-year-old-boy-is-graduating-from-college-and-set-to-start-his-doctorate-in-physics-this-fall/
អត្ថបទដទៃទៀតដែលទាក់ទងនឹងវិស័យអប់រំ និងរៀនសូត្រ
មិននឹកស្មានថាសាលាកំពូលៗនៅវៀតណាមតម្លៃសិក្សាខ្ពស់កប់ពពក
និស្សិតម៉ាឡេស៊ីចាក់សាំងដុតខ្លួនឯង បន្ទាប់ពីប្រឡងធ្លាក់ញយដងពេក
ប្រឡងធ្លាក់១៨ដងទម្រាំនិស្សិតច្បាប់ម៉ាឡេស៊ីម្នាក់បញ្ចប់ថ្នាក់បរិញ្ញាបត្រ
រៀនពូកែពេក, យុវជនម្នាក់ត្រូវសាកលវិទ្យាល័យជិត១៩០ផ្ដល់អាហារូបករណ៍
កូនសិស្សសិង្ហបុរីជាប់លេខមួយពិភពលោកខាងពូកែអានសៀវភៅ និងអត្ថបទ
ចែករំលែកព័តមាននេះ