ទីក្រុងវ៉ាស៊ីនតោន៖ ការវាយប្រហារទៅលើទីតាំងនុយក្លេអ៊ែររបស់អ៊ីរ៉ង់អាចពន្យារពេលប្រទេសនេះមិនឱ្យផលិតអាវុធនុយក្លេអ៊ែរត្រឹមតែរាប់ខែប៉ុណ្ណោះ។ នេះបើយោងប្រភពពីភ្នាក់ងារស៊ើបការណ៍សម្ងាត់អាមេរិក។ របាយការណ៍នេះរៀបចំដោយទីភ្នាក់ងារសម្ងាត់របស់ក្រសួងការពារជាតិអាមេរិកដែលរកឃើញថាអ៊ីរ៉ង់អាចនឹងចាប់ផ្ដើមកម្មវិធីនុយក្លេអ៊ែររបស់ខ្លួននៅក្នុងរយៈពេលប៉ុន្មានខែខាងមុខនេះ។ ប្រភពខ្លះថាអ៊ីរ៉ង់អាចចាប់ផ្ដើមត្រឹមមួយ ឬពីរខែទៀត។
ការវាយតម្លៃនេះផ្ទុយពីការអះអាងរបស់លោកត្រាំ និងមន្ត្រីជាន់ខ្ពស់របស់លោកដែលថាការវាយប្រហារនោះបានបោសសម្អាតកម្មវិធីនុយក្លេអ៊ែរអ៊ីរ៉ង់ទាំងស្រុង។ រដ្ឋាភិបាលរបស់លោកត្រាំថ្លែងប្រាប់ក្រុមប្រឹក្សាសន្តិសុខអង្គការសហប្រជាជាតិថាការវាយប្រហារកាលពីថ្ងៃអាទិត្យនោះបានកាត់បន្ថយសមត្ថភាពនុយក្លេអ៊ែររបស់អ៊ីរ៉ង់ច្រើនណាស់។ លោកត្រាំហ៊ានអះអាងថាបានបំផ្លាញទំាងស្រុងតែម្ដង។
អ្នកសារព័ត៌មានបានព្យាយាមសាកសួរសេតវិមានអំពីការវាយតម្លៃខាងលើនេះ។ សេតវិមានបានរំលឹកបទសម្ភាសរវាងអ្នកនាំពាក្យសេតវិមានលោកស្រីលេវីត ជាមួយទូរទស្សន៍ស៊ីអឹនអឹនដែលថានោះជាការវាយតម្លៃខុស។ គ្រប់គ្នាយល់ច្បាស់ណាស់ថាការទម្លាក់គ្រាប់បែកទម្ងន់៣ម៉ឺនផោន ឬស្មើនឹងជាង១៣តោនចំនួន១៤គ្រាប់ទៅលើទីតាំងនោះដោយឥតមានខុសគោលដៅបន្តិចណាសោះសួរថាតើមានអ្វីកើតឡើង? គឺខ្ទេចទាំងស្រុង។
ក្រុមអ្នកវិភាគយល់ថាបើសិនការវាយតម្លៃនេះធ្វើឡើងដោយផ្អែកតាមរូបភាពពីផ្កាយរណប គេមិនអាចមើលដឹងច្បាស់ថាតើការខូចខាតទៅលើទីតាំងចម្រាញ់សារធាតុអ៊ុយរ៉ាញ៉ូមនៅហ្វ័រដូ (Fordow) មានកម្រិតណាទេព្រោះវាស្ថិតនៅជ្រៅក្រោមរូងភ្នំ។ ការវាយតម្លៃទៅលើទំហំខូចខាតនៅហ្វ័រដូ, អ៊ីសហ្វាហាន និងណាថាន់ (Fordow, Isfahan & Natanz) ពិតជាពិបាកខ្លាំងណាស់។
មិនមែនតែភ្នាក់ងារសម្ងាត់របស់ក្រសួងការពារជាតិមួយប៉ុណ្ណោះទេដែលរ៉ាប់រងធ្វើការងារខាងវាយតម្លៃទំហំខូចខាតរបស់អ៊ីរ៉ង់នោះ។ មន្ត្រីជាន់ខ្ពស់អាមេរិកម្នាក់ប្រាប់ថាអាមេរិកមិនបានទាន់ដឹងច្បាស់ថាតើទំហំនៃការខូចខាតដោយសារវាយប្រហារនោះមានកម្រិតណាទេ។ លទ្ធផលវាយតម្លៃបឋមបង្ហាញថាការវាយប្រហារនោះមិនប្រាកដជាទទួលបានជោគជ័យខ្លាំងដូចការអះអាងរបស់លោកត្រាំឡើយ៕
ចែករំលែកព័តមាននេះ