ខេត្តបន្ទាយមានជ័យ ៖ រយៈពេលបីម៉ោង ចាប់ពីម៉ោង៥ល្ងាច ដល់ម៉ោង៨យប់ ថ្ងៃទី២៤ ខែមិថុនា ឆ្នាំ២០២៥នេះ មានពលរដ្ឋខ្មែរ វិលត្រឡប់ចូលប្រទេសវិញ…
ខេត្តបន្ទាយមានជ័យ ៖ រយៈពេលបីម៉ោង ចាប់ពីម៉ោង៥ល្ងាច ដល់ម៉ោង៨យប់ ថ្ងៃទី២៤ ខែមិថុនា ឆ្នាំ២០២៥នេះ មានពលរដ្ឋខ្មែរ វិលត្រឡប់ចូលប្រទេសវិញ មានចំនួន៦,៤៨៥នាក់ ក្នុងនោះស្ដ្រីចំនួន ៣,១៥២នាក់ នេះបើតាមលោក អ៊ុំ រាត្រី អភិបាលខេត្តបន្ទាយមានជ័យ ។
លោក អ៊ុំ រាត្រី បានបញ្ជាក់ថា នៅច្រកទ្វារអន្ដរជាតិប៉ោយប៉ែត ក្នុងរយៈពេលបីម៉ោងចុងក្រោយនេះ មានពលរដ្ឋខ្មែរវិលត្រឡប់ចូលប្រទេសវិញ ចំនួន៦,៤៨៥នាក់ ក្នុងនោះស្ដ្រីចំនួន ៣,១៥២នាក់ ។ លោកថា នៅម៉ោងដូចគ្នានេះ ជនជាតិថៃ ដែលធ្វើការនៅកម្ពុជា ជាពិសេសនៅក្រុងប៉ោយប៉ែត ក៏ត្រូវវិលត្រឡប់ចូលប្រទេសខ្លួនវិញដូចគ្នាដែរ ។
សូមជម្រាបថា លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ រួមជាមួយលោក ប៉ាន់ខែម ប៊ុនថន នាយរងខុទ្ទកាល័យសម្ដេចធិបតី នាយករដ្ឋមន្ត្រី ជារដ្ឋលេខាទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានក្រុងប៉ោយប៉ែត ព្រមទាំងអាជ្ញាធរក្រុង កងកម្លាំង បានសម្របសម្រួលជូនបងប្អូនប្រជាពលរដ្ឋខ្មែរ ដែលវិលត្រឡប់ចូលប្រទេសកម្ពុជាវិញ នៅវេលាម៉ោង៥ល្ងាចថ្ងៃនេះ ។
យោងតាមលិខិតមួយច្បាប់អាជ្ញាធរកម្ពុជា-ថៃ បានឯកភាពគ្នា ទុកពេលត្រឹម៣ម៉ោង ចាប់ពីម៉ោង៥ល្ងាច ដល់ម៉ោង៨យប់ ថ្ងៃទី២៤ ខែមិថុនា ឆ្នាំ២០២៥នេះ ដើម្បីឲ្យប្រជាពលរដ្ឋទាំងសងខាង អាចវិលត្រឡប់ចូលប្រទេសរៀងៗខ្លួនវិញ នៅច្រកទ្វារព្រំដែនអន្ដរជាតិប៉ោយប៉ែត មុនយោធាថៃ សម្រេចបិទខ្ទប់ច្រកទ្វារអន្ដរជាតិមួយនេះ ទាំងស្រុង បញ្ឈប់ឲ្យមានការឆ្លងកាត់ទៅវិញទៅមក ។
នៅម៉ោងដូចគ្នានេះ សម្រាប់រថយន្ដ នៃប្រទេសទាំងពីរ ក៏ត្រូវបើកត្រឡប់ទៅប្រទេសរៀងៗខ្លួនផងដែរ តែមិនអនុញ្ញាតឲ្យមានដឹកទំនិញអ្វីទាំងអស់ ។
ដោយឡែក សម្រាប់ច្រកទ្វារតំបន់ ដែលមាននៅក្នុងភូមិសាស្ដ្រខេត្តបន្ទាយមានជ័យ និងខេត្តស្រះកែវ គឺភាគីកម្ពុជា-ថៃ ឯកភាពគ្នាទុកពេលត្រឹម ១ម៉ោងប៉ុណ្ណោះ ពោលនៅម៉ោង៥ ដល់ម៉ោង៦ល្ងាចថ្ងៃនេះ ពលរដ្ឋត្រូវវិលត្រឡប់ ចូលប្រទេសរៀងៗខ្លួនវិញ ហើយបញ្ឈប់ឲ្យមានការចេញចូលឆ្លងកាត់បន្ដទៀត ។
សូមបញ្ជាក់ថា យោធាថៃ កាលពីថ្ងៃទី២៣ ខែមិថុនា ឆ្នាំ២០២៥ បានសម្រេចបិទជាឯកតោភាគី នូវច្រកព្រំដែនទាំងអស់ ជាមួយកម្ពុជា ដោយយកលេសស្ដីពីកំណើនឧក្រិដ្ឋកម្មឆ្លងដែន និងការរំលោភបំពានព្រំដែនពីកងទ័ពកម្ពុជា ៕
ចែករំលែកព័តមាននេះ