និស្សិតច្បាប់ម្នាក់នៅប្រទេសម៉ាឡេស៊ីសម្រេចចិត្តបញ្ចប់ជីវិតខ្លួនឯងចោលតែម្ដងដោយប៉ុនប៉ងប្រើប្រាស់វិធីជាច្រើន។ គាត់ធ្វើបែបនេះដោយសារតូចចិត្តខ្លាំងពេក។ គាត់ប្រឡងធ្លាក់មុខវិជ្ជាច្បាប់រហូតដល់ទៅបីដង។ មុនដំបូង, គាត់ព្យាយាមធ្វើអត្តឃាតដោយចាក់សាំងស្រោចពេញខ្លួន និងកេះដែកកេះដុតសម្លាប់ខ្លួនតែម្ដង។ បន្ទាប់ពីធ្វើមិនបានសម្រេច, គាត់អង្គុយនៅលើផ្លូវឱ្យឡានបុក។
ប៉ុន្តែបុរសវ័យ២៤ឆ្នាំរូបនេះមិនបានស្លាប់ដូចការប៉ងប្រាថ្នារបស់គាត់ទេ។ គាត់បានត្រឹមតែបង្ករបួសស្នាមឱ្យខ្លួនឯងទៅវិញ។ តាមរយៈវីឌីអូឃ្លីបដែលគេទាញចេញពីកាមេរ៉ាសុវត្ថិភាព, គេឃើញនិស្សិតច្បាប់រូបនេះយកសាំង១ប៊ីដុងមកចាក់ស្រោចលើខ្លួនយ៉ាងជោគនៅរដ្ឋចូហ័រ (Johor)។ រួចគាត់កេះដែកកេះដុតខ្លួនឯងតែម្ដង បង្កជាអណ្ដាតភ្លើងយ៉ាងក្រហមឆ្អិនឆ្អៅ។
នៅក្នុងវីឌីអូឃ្លីប១ទៀតដែលគេបង្ហោះនៅលើបណ្ដាញសង្គម, គេឃើញបុរសម្នាក់ត្រូវភ្លើងឆេះពេញខ្លួន។ គាត់រត់ឆ្លេឆ្លាចុះឡើងៗនៅក្នុងស្ថានីយប្រេងឥន្ធនៈ។ បុរសម្នាក់ទៀតយកបំពង់ផ្សែងមកបាញ់ពីលើខ្លួនរបស់គាត់ដើម្បីពន្លត់ភ្លើង។ សមត្ថកិច្ចប្រាប់ថាអ្នកដែលពន្លត់ភ្លើងនោះជាម្ចាស់ការ៉ាស់សាំងដែលនៅទល់មុខនឹងអធិការដ្ឋាននគរបាលនៃកន្លែងកើតហេតុ។
បន្ទាប់ពីមានគេជួយពន្លត់ភ្លើងអស់ពីខ្លួនបែបនេះ, ប្រហែលជានិស្សិតច្បាប់រូបនោះខកចិត្តមិនស្ទើរទេដែលខ្លួនប៉ុនប៉ងធ្វើអត្តឃាតប៉ុន្តែមិនបានសម្រេចដូចបំណង។ និស្សិតច្បាប់រូបនេះក៏រត់តម្រង់ទៅកណ្ដាលផ្លូវ និងអង្គុយមួយកន្លែងដើម្បីឱ្យឡាន-ម៉ូតូបើកមកបុកសម្លាប់គាត់តែម្ដងទៅខ្ជិលរស់នាំឱ្យធ្ងន់ផែនដី។ ប៉ុន្តែលើកនេះគាត់នៅតែមិនស្លាប់ដូចបំណងទៀត។
នៅពេលមើលឃើញនិស្សិតនោះកំពុងអង្គុយកណ្ដាលផ្លូវ, អ្នកបើករថយន្តធុនធំក្រឡេកឃើញទាន់ក៏ជាន់ហ្វ្រាំងមួយទំហឹងឈប់ង៉ក់។ និស្សិតច្បាប់អត់មានបញ្ហា។ ប៉ុន្តែបញ្ហាឡានដែលបើកមកពីក្រោយដែលជាន់ហ្វ្រាំងមិនទាន់ក៏ទៅប៉ះរថយន្តធុនធំពីក្រោយ។ នេះបើយោងតាមការឱ្យដឹងពីសមត្ថកិច្ច។
បន្ទាប់ពីដឹកទៅសង្គ្រោះបន្ទាន់, គ្រូពេទ្យពិនិត្យឃើញថាស្បែករបស់គាត់៧០%បានរងការរលាកធ្ងន់ធ្ងរ។ ត្រឹមយប់ថ្ងៃអង្គារ, គាត់នៅតែបន្តសម្រាកព្យាបាលមុខរបួសសើស្បែក។ នៅពេលសមត្ថកិច្ចកំពុងស៊ើបអង្កេតសំណុំរឿងនេះ, ពួកគេជឿជាក់ថានិស្សិតច្បាប់ម្នាក់នេះដែលដាច់ចិត្តសម្លាប់ខ្លួនម្ដងហើយ ម្ដងទៀតដល់ថ្នាក់នេះទំនងជាដោយសារគាត់មានអារម្មណ៍អាប់ឱនកិត្តិយសខ្លាំងពេក។
គាត់ប្រឡងមុខវិជ្ជាច្បាប់រហូតដល់ទៅបីដង ធ្លាក់ទាំងបីដង។ ម៉្លោះហើយ គាត់គិតថាគាត់គ្មានមុខអ្វីដែលត្រូវទៅជួបក្រុមគ្រួសារទៀតទេ។ គាត់មិនចង់យកដំណឹងប្រឡងធ្លាក់នេះទៅប្រាប់ក្រុមគ្រួសារ។ ម៉្លោះហើយ គាត់សុខចិត្តស្លាប់វិញល្អជាង។ ពាក់ព័ន្ធនឹងផ្លូវច្បាប់វិញម្ដង, គាត់អាចនឹងជាប់ពន្ធនាគារ១ឆ្នាំ ឬពិន័យជាប្រាក់។ បើមិនដូច្នេះទេ អាចជាប់ពន្ធនាគារផង និងពិន័យជាប្រាក់ផង ពីបទប៉ុនប៉ងធ្វើអត្តឃាត។ ដោយសារគាត់ជានិស្សិតច្បាប់ស្រាប់ផង, ដូចនេះគាត់ប្រាកដជាយល់រឿងនេះច្បាស់ណាស់៕
ប្រភព៖ The Strait Times
អត្ថបទដទៃទៀតដែលទាក់ទងនឹងម៉ាឡេស៊ី
ម៉ាឡេស៊ីយល់ថាប្រទេសមហាអំណាចគួរឈប់បង្គាប់បញ្ជាប្រទេសដទៃ
បន្ទាប់ពីប៉ាម៉ាក់ស្លា.ប់ទាំង២នាក់, កូនស្រីស្នើសុំឱ្យពង្រឹងច្បាប់ត្រីក្រពត
ស្ត្រីវ័យ៨៣ឆ្នាំស្លា.ប់, ស្វាមីសង្គ្រោះបន្ទាន់ ដោយសារពុលត្រីក្រពត
ចែករំលែកព័តមាននេះ