ទីក្រុងគូឡាឡាំពួរ, ប្រទេសម៉ាឡេស៊ី៖ លោកយាយម្នាក់រស់នៅរដ្ឋចូហ័រ(Johor)ប្រទេសម៉ាឡេស៊ី ដែលមានព្រះជន្មន៨៣ឆ្នាំទៅហើយ បានទទួលអនិច្ចកម្មយ៉ាងតក់ក្រហល់ បន្ទាប់ពីគាត់ពីរនាក់ស្វាមីទទួលទានត្រីក្រពត (puffer fish)។ ឥឡូវនេះ ស្វាមីរបស់គាត់ក៏មិនដឹងយ៉ាងម៉េចយ៉ាងម៉ាទេ,…
ទីក្រុងគូឡាឡាំពួរ, ប្រទេសម៉ាឡេស៊ី៖ លោកយាយម្នាក់រស់នៅរដ្ឋចូហ័រ(Johor)ប្រទេសម៉ាឡេស៊ី ដែលមានព្រះជន្មន៨៣ឆ្នាំទៅហើយ បានទទួលអនិច្ចកម្មយ៉ាងតក់ក្រហល់ បន្ទាប់ពីគាត់ពីរនាក់ស្វាមីទទួលទានត្រីក្រពត (puffer fish)។ ឥឡូវនេះ ស្វាមីរបស់គាត់ក៏មិនដឹងយ៉ាងម៉េចយ៉ាងម៉ាទេ, គាត់កំពុងស្ថិតនៅក្នុងបន្ទប់សង្គ្រោះបន្ទាន់។ យោងតាមការផ្សព្វផ្សាយរបស់សារព័ត៌មានរបស់រដ្ឋ, ពីរនាក់ប្ដីប្រពន្ធគាត់បានកុម្ម៉ង់ទិញត្រីក្រពតតាមអនឡាញដែលគេដាក់លក់នៅលើហ្វេសប៊ុក។
ពួកគាត់ទាំង២នាក់ពុំដែលសោះឡើយញ៉ាំត្រីប្រភេទនេះ។ ម៉្លោះហើយ ពួកគាត់ចង់សាករសជាតិត្រីក្រពតម្ដងមើល ល្បីគេនិយាយគ្រប់មាត់ថាវាមានរសជាតិឆ្ងាញ់ពិសា។ ញ៉ាំរួចមិនទាន់បានប៉ុន្មានផង, លោកយាយក៏ចាប់ផ្ដើមក្ដៅខ្លួនស្រៀវស្រាញ និងដកដង្ហើមផុតៗ។ ប្រហែលជាជាតិពិសរបស់ត្រីចាប់ផ្ដើមជ្រាបចូលទៅក្នុងឈាម និងចាប់ផ្ដើមធ្វើទុក្ខ។ ប្រហែលមួយម៉ោងក្រោយមក, ស្វាមីរបស់គាត់ក៏ចាប់ផ្ដើមមានអាការៈរោគប្រហាក់ប្រហែលគ្នា។
គេក៏បានដឹកជញ្ជូនពួកគាត់ទៅសម្រាកនៅមន្ទីរពេទ្យ។ មិនយូរប៉ុន្មាន, គ្រូពេទ្យប្រកាសថាលោកយាយបានស្លាប់ហើយដោយសារពុលត្រីក្រពត។ សារធាតុពុលនេះបានទៅប៉ះពាល់ខ្លាំងទៅលើប្រព័ន្ធប្រសាត និងធ្វើឱ្យប្រព័ន្ធបេះដូងឈប់ដំណើរការ។ គ្រូពេទ្យបញ្ជាក់ថាអ្នកដែលបរិភោគត្រីក្រពតដទៃទៀតនៅក្នុងថ្ងៃជាមួយគ្នានោះហាក់ដូចជាមិនមានរបាយការណ៍ពីករណីធ្លាក់ខ្លួនឈឺ ឬពុលដូចករណីប្ដីប្រពន្ធទាំង២នាក់នេះទេ។
អាជ្ញាធរបានយកសំណាកត្រីក្រពតដែលដាក់លក់នៅលើទីផ្សារទៅធ្វើពិសោធ។ នៅថ្ងៃដែលលោកតាលោកយាយពីរនាក់ប្ដីប្រពន្ធបានកុម្ម៉ង់ទិញត្រីក្រពតនោះ, បូកសរុបទៅត្រីក្រពតទម្ងន់១៥គីឡូក្រាមត្រូវបានលក់ចេញសម្រាប់អតិថិជន។ អ្នកខ្លះទៀតមិនទាន់យកត្រីទៅកែច្នៃធ្វើជាអាហារនៅឡើយទេ។ ពួកគេក្លាស្សេនៅក្នុងទូទឹកកកសិន។ សមត្ថកិច្ចស្រាវជ្រាវឃើញថាត្រីក្រពតទាំងនេះចាប់បានពីក្នុងទឹកសមុទ្រដោយអ្នកនេសាទ។ ក្រោយមក មានអ្នកទៅទទួលដល់កន្លែងនេសាទ និងលក់បន្តទៅឱ្យអតិថិជន។
គ្រូពេទ្យសូមរម្លឹកបងប្អូនប្រជាពលរដ្ឋដែលនិយមចូលចិត្តបរិភោគត្រីក្រពតឱ្យបានជ្រាបថាពួកគេគួរតែប្រយ័ត្នប្រយែងខ្ពស់ ព្រោះត្រីខ្លះអាចនឹងមានជាតិពុលកម្រិតខ្ពស់រហូតដល់ស្លាប់។ ទោះបីមានករណីស្លាប់ជាបន្តបន្ទាប់ដោយសារត្រីក្រពតមិនថានៅម៉ាឡេស៊ី ឬនៅប្រទេសដទៃទៀតនោះទេ, មនុស្សនៅតែចាប់អារម្មណ៍សាច់ត្រីក្រពត ព្រោះវាមានរសជាតិឆ្ងាញ់។
កាលពីឆ្នាំ២០១៧ ក្រសួងសុខាភិបាលធ្លាប់ពិចារណាចេញសារាចរ ឬបទបញ្ជាដែលតម្រូវឱ្យអ្នកលក់ត្រីក្រពតត្រូវតែមានអាជ្ញាប័ណ្ណត្រឹមត្រូវ។ បើមិនដូច្នេះទេ ការលក់ត្រីក្រពតត្រូវចាត់ទុកជាអំពើខុសច្បាប់។ យោងតាមគណៈកម្មការត្រួតពិនិត្យគុណភាពឱសថ និងចំណីអាហាររបស់អាមេរិក, ត្រីក្រពតមានផ្ទុកសារធាតុពុលកម្រិតខ្ពស់ដែលអាចផ្ដាច់ផ្ដិលជីវិតរបស់អ្នកបរិភោគ។
អ្នកបរិភោគត្រីក្រពតដែលផ្ទុកសារធាតុពុលនេះ ពួកគេនឹងធ្លាក់ខ្លួនឈឺធ្ងន់។ បើជួយសង្គ្រោះមិនទាន់ទេគឺមានតែផ្លូវស្លាប់មួយមុខតែប៉ុណ្ណោះ។ ព្រោះគ្មានវិធីណាអាចកម្ចាត់ជាតិពុលពីក្នុងសាច់ត្រីក្រពតនោះបានឡើយ។ ទោះបីយកត្រីនោះទៅចម្អិន ឬក្លាស្សេយ៉ាងណាក៏មិនអាចកម្ចាត់ជាតិពុលពីខ្លួនវាបានដែរ។ ប៉ុន្តែមិនប្រាកដជាត្រីក្រពត១០០%មានជាតិពុលទាំងអស់នោះទេ។
ដូច្នេះ ការបរិភោគត្រីប្រភេទនេះអាស្រ័យលើការផ្សងព្រេង។ បើរើសប៉ះចំត្រីក្រពតស្លូតក៏ធ្វើឱ្យទទួលទានសាច់របស់វាសុខសប្បាយទៅតាមនោះ។ ប៉ុន្តែបើសំណាងអាក្រក់បរិភោគប៉ះចំត្រីក្រពតផ្ទុកជាតិពុលប្រភេទហ្នឹងគឺមានតែស្លាប់។ វាជារបស់ដែលមើលមិនឃើញទាំងអស់គ្នា។ លុះត្រាយកត្រីក្រពតទៅធ្វើតេស្តនៅមន្ទីរពិសោធទើបដឹងថាមានជាតិពុល ឬគ្មាន៕
ប្រភព៖ Channel News Asia
អត្ថបទដែលទាក់ទង
ប៉ូលិសថៃឆែកហាងបាយ១កន្លែង ឃើញត្រីមានពិសខ្លាំងបំផុតក្នុងលោក
ចែករំលែកព័តមាននេះ